អន្តរជាតិ
ប៉ារ៉ាហ្គាយ រើស្ថានទូតចេញពីហ្ស៊េរុយសាឡិមវិញ ក្រោយប្រកាសដូរបាន៤ខែ
ស្ថានទូតប៉ារ៉ាហ្កាយនៅទីក្រុងហ្ស៊េរុយសាឡិម (រូបភាព AFP)
×![]()
រដ្ឋាភិបាលប៉ារ៉ាហ្គាយថ្មី បានប្រកាសរើស្ថានទួតរបស់ខ្លួននៅអ៊ីស្រាអែលចេញពីទីក្រុងហ្ស៊េរុយសាឡិមត្រឡប់ទៅកាន់ទីក្រុងតែលអាវីវវិញ។ ការផ្លាស់ប្ដូរនេះ គឺធ្វើឡើង បន្ទាប់ពីរដ្ឋាភិបាលចាស់ កាលខែឧសភាកន្លងទៅ បានសម្រេចរើស្ថានទូតទៅកាន់ទីតាំងថ្មីតាមសហរដ្ឋអាមេរិក។
លោកប្រធានាធិបតី Mario Abdo Benítez នៅថ្ងៃទី ០៥ កញ្ញា ឆ្នាំ២០១៨ ដែលបានឡើងកាន់អំណាចកាលពីខែមុន បាននិយាយពន្យល់ពីការផ្លាស់ប្ដូរនេះថា ប៉ារ៉ាហ្គាយ ចង់ជួយបង្កើតសន្តិភាពដ៏យូរអង្វែង នៅតំបន់មជ្ឈិមបូព៌ា។ ប៉ារ៉ាហ្គាយ ប្រកាសរើស្ថានទូតពីតែលអាវីវ ទៅកាន់ហ្ស៊េរុយសាឡិមកាលពីថ្ងៃទី៧ ខែឧសភាកន្លងទៅ។
អ៊ីស្រាអែលឯណោះ ក្ដៅស្លឹកត្រចៀកយ៉ាងខ្លាំងនឹងការសម្រេចចិត្តរបស់រដ្ឋាភិបាលប៉ារ៉ាហ្កាយ។ ឆ្លើយតបនឹងការផ្លាស់ប្ដូរនេះ អ៊ីស្រាអែល បានសម្រេចបិទស្ថានទូតរបស់ខ្លួនប្រចាំទីក្រុងអាសង់ស្យុងតែម្ដង។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters ។ ជាមួយគ្នានេះដែរ លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយថា ទង្វើរបស់ប៉ារ៉ាហ្គាយ បានបង្កើតនូវភាពស្រពិចស្រពិលលើទំនាក់ទំនងរវាងប្រទេសទាំង២។
ស្របពេលអ៊ីស្រាអែលមិនសប្បាយចិត្ត ប៉ាឡេស្ទីនរីកមុខរីកមាត់យ៉ាងខ្លាំង។ អាជ្ញាធរប៉ាឡេស្ទីន បានប្រកាសថា ខ្លួននឹងបើកស្ថានទូតភ្លាមៗ នៅក្នុងប្រទេសប៉ារ៉ាហ្គាយ។ ប៉ាឡេស្ទីន ចាត់ទុកចំណាត់ការរបស់រដ្ឋាភិបាលលោក Benítez ជាជោគជ័យលើឆាកអន្តរជាតិរបស់ខ្លួន។
ហ្ស៊េរុយសាឡិម ជាទីក្រុងមួយដែលស្ថិតក្នុងស្ថានភាពមិនដាច់ស្រេច។ អ៊ីស្រាអែលបានគ្រប់គ្រងហ្ស៊េរុយសាឡិមពាក់កណ្ដាល និងបានភ្ជាប់ជាទឹកដីភាគខាងលិចរបស់ទីក្រុងនេះក្រោយសង្គ្រាមឆ្នាំ១៩៦៧ ។ អ៊ីស្រាអែលបានទាមទារចំណែកទីក្រុងនេះទាំងមូល និងបានភ្ជាប់តំបន់ភាគខាងកើត ដែលធ្វើឲ្យទីក្រុងទាំងមូលស្ថិតក្រោមការគ្រប់គ្រងរបស់ខ្លួន។ ឯប៉ាឡេស្ទីនចាត់ទុកតំបន់ខាងកើតជារដ្ឋធានីរបស់ខ្លួននៅថ្ងៃអនាគត៕
Tag:
ប៉ារ៉ាហ្កាយ
អ៊ីស្រាអែល
ហ្ស៊េរុយសាឡិម
© រក្សាសិទ្ធិដោយ thmeythmey.com
