អន្តរជាតិ
អូស្ត្រាលីនិងនូវែលសេឡង់ បញ្ជូនយន្តហោះល្បាតទៅជប៉ុន ដើម្បីជួយពង្រឹងទណ្ឌកម្មលើកូរ៉េខាងជើង ឧបនាយករដ្ឋមន្រ្តីនូវែលសេឡង់-Winston-Peters-(រូបភាព-AFP)
× អូស្ត្រាលី និងនូវែលសេឡង់ បានប្រកាសនៅថ្ងៃទី ០៧ កញ្ញាថា រដ្ឋាភិបាលរបស់ពួកគេ បានបញ្ជូនយន្តហោះល្បាតចំនួន ៣គ្រឿងទៅកាន់ប្រទេសជប៉ុន ដើម្បីជាជំនួយសម្រាប់ការដាក់ទណ្ឌកម្មរបស់អង្គការសហប្រជាជាតិលើកូរ៉េខាងជើង។
អូស្ត្រាលី នឹងបញ្ជូនយន្តហោះល្បាតចំនួន ២ទៀត ដើម្បីបើកប្រតិបត្តិការយកការណ៍នៅដែនសមុទ្រ ជាមួយយន្តហោះរបស់ខ្លួនមួយគ្រឿងទៀត ដែលត្រូវបានបញ្ជូនកាលពីដើមឆ្នាំនេះ។ នេះយោងតាមការចុះផ្សាយរបស់ទីភ្នាក់ងារសារព័ត៌មាន Reuters ដោយដកស្រង់សម្តីរបស់រដ្ឋមន្ត្រីការពារជាតិអូស្ត្រាលី លោក Christopher Pyne ។
លោក Pyne បានបញ្ជាក់ថា៖ «សម្រាប់ការបញ្ជូនយន្តហោះល្បាតថ្មីទៀតនេះ អូស្ត្រាលី មានបំណងបន្តជំហរយ៉ាងម៉ឺងម៉ាត់របស់ខ្លួន ក្នុងទប់ស្កាត់ការធ្វើពាណិជ្ជកម្មខុសច្បាប់ និងសកម្មភាពល្មើសនឹងទណ្ឌកម្មរបស់អង្គការសហប្រជាជាតិ ពីសំណាក់កូរ៉េខាងជើង និងបណ្ដាញសមាគមរបស់ពួកគេ» ។
ជាមួយគ្នាដែរនេះ ឧបនាយករដ្ឋមន្ត្រីនូវែលសេឡង់ លោក Winston Peters បាននិយាយថា រដ្ឋាភិបាលរបស់លោក បានបញ្ជូនយន្តហោះល្បាតមួយគ្រឿងប្រភេទ Air Force P-3K2 ដើម្បីបើកប្រតិបត្តិការល្បាតនៅសមុទ្រអន្តរជាតិ ក្នុងតំបន់អាស៊ីខាងជើង។ ក្នុងប្រតិបត្តិការនេះដែរ គឺមានបំណងស្វែងរកសញ្ញានាវា ដែលបានធ្វើសកម្មភាពល្មើសនឹងទណ្ឌកម្មរបស់ UN ប្រឆាំងនឹងកូរ៉េខាងជើង ក្នុងនោះរួមមាន ការដឹកជញ្ជួនទំនិញពីនាវាមួយទៅនាវាមួយទៀតជាដើម។
លោក Peters បានបន្តទៀតថា យន្តហោះដែលត្រូវបញ្ជូនទៅនោះ នឹងហោះទៅកាន់មូលដ្ឋានទ័ពអាកាស Kadena ក្នុងប្រទេសជប៉ុន។
គួរបញ្ជាក់ដែរថា ដើម្បីបង្ខំឲ្យកូរ៉េខាងជើងសម្រេចបោះបង់កម្មវិធីអាវុធនុយក្លេអ៊ែររបស់ខ្លួន សហរដ្ឋអាមេរិក បានដាក់សម្ពាធយ៉ាងធ្ងន់ធ្ងរលើប្រទេសនេះ។ តួយ៉ាង នៅក្នុងខែសីហាកន្លងទៅ ទីក្រុងវ៉ាស៊ីនតោន បានដាក់ពិន័យលើក្រុមហ៊ុនដឹកជញ្ជូនតាមនាវារបស់រុស្ស៊ីចំនួន២ និងនាវាចំនួន ៦ផ្សេងទៀត។ សម្រាប់ការដាក់ពិន័យនេះ សហរដ្ឋអាមេរិក បានអះអាងថា ក្រុមហ៊ុន និងនាវាទាំងនេះ ជាប់ពាក់ព័ន្ធនឹងការដឹកជញ្ជូនផលិតផលប្រេងឥន្ធនៈ ទៅឲ្យនាវាកូរ៉េខាងជើង។ ការណ៍នេះ គឺល្មើសទៅនឹងការហាមឃាត់យ៉ាងតឹងរ៉ឹងរបស់ក្រុមប្រឹក្សាសន្តិសុខ៕
Tag:
អូស្ត្រាលី
នូវែលហ្សេឡង់
កូរ៉េខាងជើង
អង្គការសហប្រជាជាតិ
© រក្សាសិទ្ធិដោយ thmeythmey.com