អន្តរជាតិ
រញ្ជួយដីនៅជប៉ុន៖ អ្នកស្លាប់កើនដល់ ១៨នាក់ ឯផ្ទះច្រើនជាង១លានខ្នង គ្មានអគ្គិសនីប្រើប្រាស់ គ្រោះថ្នាក់ធម្មជាតិនៅជប៉ុន (រូបភាព AFP)
× រញ្ជួយដីដ៏ខ្លាំងក្លាមួយដែលបានប្រហារភាគខាងជើងនៃកោះហុកកៃដូ ប្រទេសជប៉ុន បានសម្លាប់មនុស្សដល់១៨នាក់ហើយ។ នេះបើតាមការបញ្ជាក់របស់លោកនាយករដ្ឋមន្ត្រីជប៉ុន ស៊ុនហ្សូ អាបេ នៅថ្ងៃទី០៧ កញ្ញានេះ។ ចំណែកឯផ្ទះប្រជាជនប្រមាណជាង ២,៩លានខ្នង ពុំមានភ្លើងអគ្គិសនីប្រើប្រាស់។
រញ្ជួយដីកម្រិត៦,៦វ៉ិចទ័រ ដែលបានវាយប្រហារកាលពីថ្ងៃទី០៦ កញ្ញា បានបង្កឲ្យមានការបាក់ដីជាច្រើនកន្លែង ហើយផ្ទះប្រជាពលរដ្ឋជាច្រើន ត្រូវបានកប់នៅក្រោមបាតដីបាក់ទាំងនោះផងដែរ។ លើសពីនេះ ថាមពលអគ្គិសនី និងការធ្វើដំណើរនានា ត្រូវបានកាត់ផ្ដាច់។
តាមរបាយការណ៍បឋមនៅយប់ថ្ងៃទី០៦ កញ្ញា ចំនួនអ្នកស្លាប់ មានត្រឹមតែ ៨នាក់ប៉ុណ្ណោះ ប៉ុន្តែសារព័ត៌មានជប៉ុន NHK នៅថ្ងៃ០៧ កញ្ញានេះ បានដកស្រង់សម្ដីរបស់លោក អាបេ ថាអ្នកស្លាប់បានកើនឡើងជាង២ដង គឺដល់ទៅ ១៦នាក់។ ការបញ្ជាក់របស់លោក គឺធ្វើឡើង បន្ទាប់ពីចូលរួមបានរៀបចំកិច្ចប្រជុំបន្ទាន់មួយនៅថ្ងៃដដែលនេះ។ ដោយឡែកទីភ្នាក់ងារព័ត៌មាន AFP ផ្សាយថា អ្នកស្លាប់កើនដល់១៨នាក់ហើយ។
ជាមួយគ្នានេះ អាជ្ញាធរគ្រប់គ្រងគ្រោះមហន្តរាយជប៉ុន បាននិយាយថា មនុស្សប្រមាណ២៦នាក់ផ្សេងទៀត បានបាត់ខ្លួន ក្នុងហេតុការណ៍គ្រោះធម្មជាតិដ៏អាក្រក់នេះ។
ទាក់ទិននឹងបញ្ហាដាច់ចរន្តអគ្គិសនី លោកស្រី Hiroshige Seko រដ្ឋមន្ត្រីសេដ្ឋកិច្ច ពាណិ្ជកម្ម និងឧស្សាហកម្មជប៉ុន បាននិយាយថា ផ្ទះប្រជាជនប្រមាណ ១,៣១លានខ្នង ទទួលបានភ្លើងអគ្គិសនីប្រើប្រាស់ឡើងវិញ គិតត្រឹមព្រឹកថ្ងៃទី០៧ កញ្ញានេះ។ ប៉ុន្តែក្រសួង ត្រូវការពេលយ៉ាងហោចណាស់មួយសប្តាហ៍ ដើម្បីស្តារថាមពលអគ្គិសនីទាំងអស់ឡើងវិញបាន។
សូមជម្រាបថា ការរញ្ជួយដីនេះ ជាគ្រោះធម្មជាតិទី២ហើយ ដែលបានវាយប្រហារទៅលើប្រទេសជប៉ុន គិតត្រឹមមួយសប្ដាហ៍នេះ។ ក្រោយពីរងគ្រោះរញ្ជួយដី និងព្យុះទីផុងនោះ ប្រទេសជប៉ុន ក៏បានរងគ្រោះដោយសារគ្រោះទឹកជំនន់ និងរលកកម្ដៅ ដែលបានសម្លាប់មនុស្សរាប់រយនាក់ផងដែរ៕
Tag:
ជប៉ុន
គ្រោះធម្មជាតិ
ស៊ុនហ្សូ អាបេ
© រក្សាសិទ្ធិដោយ thmeythmey.com