រដ្ឋមន្ត្រីសន្តិសុខអង់គ្លេសចោទ លោកពូទីនចំៗ លើករណីបំពុលអតីតភ្នាក់ងារចារកម្មរុស្ស៊ី

អន្តរជាតិ

រដ្ឋមន្ត្រីសន្តិសុខអង់គ្លេសចោទ លោកពូទីនចំៗ លើករណីបំពុលអតីតភ្នាក់ងារចារកម្មរុស្ស៊ី

07, Sep 2018 , 9:39 pm

រូបភាព

ដោយ:

រដ្ឋមន្ត្រីសន្តិសុខអង់គ្លេស បាននិយាយកាលពីថ្ងៃទី៦ ខែកញ្ញាថា លោកប្រធានាធិបតីរុស្ស៊ី វ្លាឌីមៀ ពូទីន ត្រូវទទួលខុសត្រូវយ៉ាងដាច់ណាត់លើករណីបំពុលអតីតភ្នាក់ងារចារកម្មរុស្ស៊ី នៅ អង់គ្លេស។ ការលើកឡើងនេះ គឺធ្វើឡើង ខណៈដែលរដ្ឋាភិបាលអង់គ្លេស បានត្រៀមខ្លួនទៅរាយការណ៍នៅក្រុមប្រឹក្សាសន្តិសុខអង្គការសហប្រជាជាតិ។

ទីក្រុងឡុងដ៏ កាលពីពេលកន្លងទៅ បានចោទប្រកាន់លើសមាជិកភ្នាក់ងារចារកម្មយោធារុស្ស៊ី GRU ចំនួនពីររូប ដែលបានប្រើប្រាស់សារធាតុពុលឈ្មោះ «Novichok» ដើម្បីព្យាយាមសម្លាប់អតីតភ្នាក់ងារចារកម្មរុស្ស៊ី លោក Sergei Skripal និងកូនស្រីរបស់លោក នៅភាគនិរតីនៃទីក្រុង Salisbury ប្រទេសអង់គ្លេស។ រដ្ឋមន្ត្រីសន្តិសុខអង់គ្លេស លោក Ben Wallace បាននិយាយចំៗថា លោក ពូទីន ត្រូវទទួលខុសត្រូវទាំងស្រុងចំពោះការបំពុលនេះ។

លោក Wallace បាននិយាយប្រាប់វិទ្យុ BBC ថា៖ «ប្រាកដណាស់ លោកពូទីន ធ្វើរឿងទាំងនេះពីចម្ងាយក្នុងឋានៈជាប្រធានាធិបតីរុស្ស៊ី ហើយវាជារដ្ឋាភិបាលរបស់លោក ដែលគ្រប់គ្រង ផ្ដល់លុយ និងបញ្ជាដោយផ្ទាល់លើភ្នាក់ងារចារកម្មយោធា GRU តាមរយៈក្រសួងការពារជាតិ»។

លោក បន្តថា «ខ្ញុំគិតថា គ្មានអ្នកណាផ្សេងទៀតទេ ក្រៅពីលោកពូទីន ដែលអាចគ្រប់គ្រងរុស្ស៊ី ហើយភ្នាក់ងារចារកម្មយោធា GRU គឺជាអង្គភាពព្រៃផ្សៃបំផុត។ អ្នកបញ្ជានៅពីក្រោយអង្គភាពនេះ គឺមានទាំងកំពូលមេទ័ពរុស្ស៊ី និងរដ្ឋមន្ត្រីការពារជាតិ ហើយត្រូវឆ្លងកាត់ទៅដល់ដៃវិមានក្រែមឡាំង និងការិយាល័យប្រធានាធិបតី»។

ជាមួយគ្នានេះ អគ្គរដ្ឋទូតអាមេរិកប្រចាំទីក្រុងឡុងដ៏ លោក Woody Johnson និងរដ្ឋាភិបាលអូស្ត្រាលី បានគាំទ្រជំហររបស់អង់គ្លេសប្រឆាំងនឹងរុស្ស៊ី។

លោកWallace បាននិយាយទៀតថា រដ្ឋាភិបាលរបស់លោក ត្រៀមដាក់សម្ពាធលើរុស្ស៊ី ដើម្បីឲ្យរដ្ឋាភិបាលក្រែមឡាំងព្រមនិយាយថា ទង្វើដែលអង់គ្លេសបានឃើញនេះ ជារឿងមិនអាចទទួលយកបាននោះទេ។ « យើងនឹងលើកយកការដាក់ទណ្ឌកម្មបន្ថែមលើរុស្ស៊ី ទៅជជែកពិភាក្សានៅឯក្រុមប្រឹក្សាសន្តិសុខ»។

ទោះបីជាយ៉ាងនេះក្តី លោក បានសង្កត់ធ្ងន់ថា រុស្ស៊ី ទំនងជាប្រើប្រាស់សិទ្ធិ «វេតូ» ដើម្បីច្រានចោលរាល់ការលើកឡើងទាំងអស់ ដែលពាក់ព័ន្ធនឹងបញ្ហានេះ៕