ជាតិ
លោក ហោ ណាំហុង ជាព្រះរាជតំណាងព្រះមហាក្សត្រចូលរួមបុណ្យជាតិកូរ៉េខាងជើងនៅព្យុងយ៉ាង លោក ហោ ណាំហុង នាសន្និសីទសារព័ត៌មានមួយនៅអាកាសយានដ្ឋានអន្តរជាតិភ្នំពេញកាលពីឆ្នាំ២០១១ (រូបភាព AFP)
× ឧបនាយករដ្ឋមន្ត្រីកម្ពុជាលោក ហោ ណាំហុង នឹងចូលរួមពិធីបុណ្យខួបទី៧០ឆ្នាំ ថ្ងៃបង្កើតកូរ៉េខាងជើង នៅទីក្រុងព្យុងយ៉ាង នៅថ្ងៃទី៩ ខែកញ្ញា។ លោក ហោ ណាំហុង គឺជាតំណាងរបស់ព្រះមហាក្សត្រសម្ដេចព្រះបរមនាថ នរោត្តម សីហមុនី ដែលទ្រង់មិនអាចយាងដោយផ្ទាល់បានតាមការអញ្ជើញរបស់ថ្នាក់ដឹកនាំកូរ៉េខាងជើង។ នេះបើតាមការផ្សាយរបស់ទូរទស្សន៍ជាតិកម្ពុជានៅថ្ងៃទី៧ ខែកញ្ញា។
លោក ហោ ណាំហុង ឧបនាយករដ្ឋមន្ត្រីនៃរាជរដ្ឋាភិបាលកម្ពុជា នៅថ្ងៃទី៧ ខែកញ្ញា បានចាកចេញទៅកាន់ទីក្រុងព្យុងយ៉ាង ដើម្បីចូលរួមខួបទី៧០ឆ្នាំ ថ្ងៃបង្កើតសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) ដែលនឹងងរៀបចំនៅថ្ងៃទី៩ ខែកញ្ញា។ មេដឹកនាំពិភពលោកជាច្រើន ត្រូវបានអញ្ជើញឲ្យចូលរួមក្នុងពិធីដែលនឹងរៀបចំឡើងយ៉ាងអធិកអធមបំផុត។
លោក គីម យ៉ុងណាម ដែលជាប្រមុខរដ្ឋ និងជាប្រធានសភាកូរ៉េខាងជើង ក៏បានយាងអញ្ជើញព្រះករុណាព្រះបាទសម្ដេចព្រះបរមនាថ នរោត្តម សីហមុន ព្រះមហាក្សត្រកម្ពុជាដែរ។ ប៉ុន្តែព្រះអង្គមិនអាចយាងទៅបាន ទើបចាត់តាំងលោក ហោ ណាំហុង ជាព្រះរាជតំណាងព្រះមហាក្សត្រ។
សូមបញ្ជាក់ថា ទិវាកំណើតកូរ៉េខាងជើង គឺជាថ្ងៃឈប់សម្រាកដ៏ធំមួយក្នុងចំណោមពិធីសំខាន់ៗរបស់កូរ៉េខាងជើង។ នៅថ្ងៃទី៩ ខែកញ្ញា ឆ្នាំ១៩៤៨ លោក គីម អ៊ីលស៊ុង បានប្រកាសបង្កើតសាធារណរដ្ឋប្រជាធិបតេយ្យប្រជាមានិតកូរ៉េ បន្ទាប់ពីការរំដោះឧបទ្វីបកូរ៉េចេញពីការគ្រប់គ្រងរបស់ទាហានជប៉ុននៅឆ្នាំ១៩៤៥ ៕
Tag:
កម្ពុជា
កូរ៉េខាងជើង
ហោ ណាំហុង
© រក្សាសិទ្ធិដោយ thmeythmey.com