ជាតិ
នយោបាយជាតិ
អធិការបតីអាល្លឺម៉ង់សាទរសម្តេច ហើយត្រៀមជួយកម្ពុជាពង្រឹងប្រជាធិបតេយ្យ និងកិច្ចសន្ទនានយោបាយ
× អធិការបតីអាល្លឺម៉ង់លោកស្រី អែនជេឡា មឺហ្គែល បានផ្ញើសារអបអរសាទរសម្តេច ហ៊ុន សែន ក្នុងឱកាសចូលកាន់តំណែងជានាយករដ្ឋមន្ត្រីក្នុងអាណត្តិសភានីតិកាលទីប្រាំមួយនៅថ្ងៃទី ៦ ខែកញ្ញាឆ្នាំ ២០១៨។ លោកស្រីក៏សន្យាជួយកម្ពុជាពង្រឹងប្រជាធិបតេយ្យ និងធានាកិច្ចសន្ទនានយោបាយដោយបើកចំហដែរ។
«ខ្ញុំសូមជូនពរសម្តេចឲ្យទទួលបានជោគជ័យគ្រប់ប្រការក្នុងអាណត្តិថ្មី»។ នេះជាសម្តីរបស់លោកស្រី មឺហ្គែល ក្នុងសេចក្តីប្រកាសព័ត៌មានក្រសួងការបរទេសអាល្លឺម៉ង់ចុះផ្សាយដោយក្រសួងការបរទេសកម្ពុជា។
អធិការបតីអាល្លឺម៉ង់រូបនេះបានគូសបញ្ជាក់ផងដែរពីទំនាក់ទំនងល្អរវាងប្រទេសនិងប្រទេស ក៏ដូចជារវាងប្រជាជនកម្ពុជានិងប្រជាជនអាល្លឺម៉ង់ដែលមានកន្លងមកដែរដែលផ្អែកលើស្មារតីនៃសន្ធិសញ្ញាក្រុងប៉ារីសឆ្នាំ ១៩៩១។
«កិច្ចសហប្រតិបត្តិការទ្វេភាគីនេះឈរលើមូលដ្ឋាននៃកិច្ចព្រមព្រៀងក្រុងប៉ារីសឆ្នាំ ១៩៩១ ដែលធានាពីការគោរពសិទ្ធិមនុស្ស នីតិរដ្ឋ និងគោលការណ៍ប្រជាធិបតេយ្យ ព្រមទាំងការបោះឆ្នោតដោយសេរី និងយុត្តិធម៌»។ នេះជាការលើកឡើងរបស់លោកស្រី មឺហ្គែលក្នុងសេចក្តីប្រកាសព័ត៌មានដដែល។
បន្ថែមពីលើការជូនពរនាយករដ្ឋមន្ត្រីកម្ពុជាឲ្យជោគជ័យក្នុងអាណត្តិដឹកនាំថ្មី ប្រមុខរដ្ឋាភិបាលអាល្លឺម៉ង់រូបនេះបានបញ្ជាក់ផងដែរថា អាល្លឺម៉ង់ត្រៀមខ្លួនដើម្បីជួយកម្ពុជាពង្រឹងលទ្ធិប្រជាធិបតេយ្យ ក៏ដូចជាការសន្ទនានយោបាយនៅកម្ពុជាដែលបើកចំហដែរ។
លោកស្រីនិយាយបែបនេះ៖ «ចំពោះកិច្ចការពង្រឹងលទ្ធិប្រជាធិបតេយ្យ និងការចូលរួមតាមរយៈកិច្ចសន្ទនានយោបាយដោយបើកចំហនៅកម្ពុជា សម្តេចអាចពឹងផ្អែកលើអាល្លឺម៉ង់បាន»។
សូមបញ្ជាក់ថា រដ្ឋាភិបាលកម្ពុជាអាណត្តិទីប្រាំមួយ ត្រូវបានសភាបោះឆ្នោតគាំទ្រជាផ្លូវការកាលពីថ្ងៃ ៦ ខែកញ្ញាកន្លងទៅ។ រដ្ឋាភិបាលអាណត្តិទីប្រាំមួយដែលមានសម្តេច ហ៊ុន សែនជាប្រមុខនេះ គឺមានសមាជិកជារដ្ឋមន្ត្រីទាំង២៨រូប ដែលធ្លាប់កាន់ការងារក្រសួងនីមួយៗក្នុងអាណត្តិទីប្រាំ៕
Tag:
អាល្លឺម៉ង់
សម្តេច ហ៊ុន សែន
អែនជេឡា មឺហ្គែល
ប្រជាធិបតេយ្យ
© រក្សាសិទ្ធិដោយ thmeythmey.com