អន្តរជាតិ
ជប៉ុនប្រើនាវាមុជទឹកជាលើកដំបូងក្នុងសមយុទ្ធនៅសមុទ្រចិនខាងត្បូងដើម្បីផ្គើនចិន
×![]()
នាវាមុជទឹកមួយគ្រឿងត្រូវបានរដ្ឋាភិបាលជប៉ុន ប្រើប្រាស់ជាលើកដំបូងក្នុងសមយុទ្ធមួយនៅសមុទ្រចិនខាងត្បូងសប្តាហ៍មុន។ សមយុទ្ធនេះធ្វើឡើង ស្របពេលដែលចិនបន្តសាងសង់មូលដ្ឋានយោធាលើកោះសិប្បនិម្មិតក្នុងតំបន់នោះ។
ក្រសួងការពារជាតិជប៉ុន នៅថ្ងៃទី១៧ កញ្ញា ឆ្នាំ២០១៨ បានបញ្ជាក់ថា ខ្លួនបានបញ្ជូននាវាមុជទឹកមួយគ្រឿងឈ្មោះថា Kuroshio របស់កងកម្លាំងស្វ័យការពារជើងទឹកជប៉ុន (MSDF) ទៅចូលរួមនៅក្នុងសមយុទ្ធប្រឆាំងនឹងនាវាមុជទឹកមួយ ដែលបានធ្វើឡើងកាលពីថ្ងៃទី១៣ កញ្ញា។
នាវាមុជទឹកនេះ បានចូលរួមធ្វើសមយុទ្ធដ៏កម្រនេះ ជាមួយនាវាយោធា ៣គ្រឿងផ្សេងទៀត ក្នុងនោះក៏មាននាវាដឹកឧទ្ធម្ភាគចក្រ Kaga ផងដែរ ។ នាវាយោធាទាំង៣នេះដែរ កំពុងស្ថិតក្នុងបេសកកម្មរយៈពេលវែងមួយ នៅក្នុងតំបន់អាស៊ីអាគ្នេយ៍។
សមយុទ្ធដែលក្នុងនោះរួមបញ្ចូលទាំងវិញ្ញាសាពង្រឹងសមត្ថភាពនាវាមុជទឹកដើម្បីបើកគេចពីប្រព័ន្ធរ៉ាដាផង ត្រូវបានធ្វើឡើងឆ្ងាយពីមូលដ្ឋានយោធារបស់ចិន ដែលបានសាងសង់ឡើងនៅលើកោះសិប្បនិមិត្ត ក្នុងសមុទ្រចិនខាងត្បូង។ យោងតាមការចុះផ្សាយរបស់កាសែត Japan Times ។
សកម្មភាពយោធាថ្មីរបស់ជប៉ុនអាចជាគោលដៅត្រួតពិនិត្យលើឥទ្ធិពលរបស់ចិន នៅក្នុងដែនសមុទ្រជម្លោះដ៏ស្មុគស្មាញនេះ។ ប៉ុន្តែវាអាចបង្កជាកំហឹងទៅដល់ទីក្រុងប៉េកាំង ដ្បិតថានាវាមុជទឹក គឺតំណាងឲ្យការគំរាមកំហែងដ៏ខ្លាំងក្លាមួយដល់ការដឹកជញ្ជូនទំនិញតាមនាវា ច្រើនជាងនាវាផ្សេងៗដែលបើកលើផ្ទៃសមុទ្រ។
ជាមួយគ្នានេះ នាវាមុជទឹក Kuroshio នៅថ្ងៃទី១៧ កញ្ញា បានចូលសំចតនៅឯកំពង់ផែយុទ្ធសាស្ត្រមួយក្នុងទីក្រុង Cam Ranh ប្រទេសវៀតណាម ដែលជាចំណុចប្រសព្វសំខាន់មួយរវាងប្រជុំកោះ Paracel និង Spratly ។ កំពង់ផែនេះដែរ ជាទីតាំងដ៏សំខាន់មួយសម្រាប់វៀតណាម ដើម្បីការពារផលប្រយោជន៍របស់ខ្លួន ក្នុងការទាមទារកាន់កាប់ដែនអធិបតេយ្យភាពក្នុងសមុទ្រចិនខាងត្បូង។ គេមើលឃើញថា ការចូលសំចតជាលើកដំបូងរបស់នាវាមុជទឹកជប៉ុននេះ គឺដើម្បីបង្ហាញប្រាប់ចិនត្រង់ៗថា ជប៉ុន និងវៀតណាម កំពុងពង្រឹងកិច្ចសហប្រតិបត្តិការជាមួយគ្នាក្នុងវិស័យការពារជាតិ។
គួរបញ្ជាក់ថា ការធ្វើសមយុទ្ធរបស់ជប៉ុនកាលពីសប្ដាហ៍មុននេះ គឺធ្វើឡើងក្រោយពីនាវាពិឃាដរបស់កងទ័ពជើងទឹកភូមិន្ទអង់គ្លេសមួយគ្រឿង កាលពីខែមុនបានធ្វើដំណើរនៅក្បែរប្រជុំកោះ ដែលក្រុងប៉េកាំង បានអះអាងថាជាដែនអធិបតេយ្យភាពរបស់ខ្លួន។ ការធ្វើនាវាចរណ៍នេះដែរ ក្រុងឡុងដ៏ បានអះអាងថា ខ្លួនបានអនុវត្តសិទ្ធិ «សេរីភាពក្នុងការធ្វើនាវាចរណ៍» ដែលបានចែងនៅក្នុងច្បាប់អន្តរជាតិ។
ដើម្បីឆ្លើយតបនឹងសកម្មភាពនេះ រដ្ឋាភិបាលចិន បានបញ្ជូនយន្តហោះចម្បាំង និងនាវាចម្បាំង ដើម្បីទៅស្វាគមន៍នាវាអង់គ្លេសផងដែរ៕
Tag:
ជប៉ុន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com
