អន្តរជាតិ
ក្រុងប៉េកាំង ប្រាប់តៃវ៉ាន់ឲ្យបញ្ឈប់សកម្មភាពចារកម្ម ខណៈទំនាក់ទំនងទ្វេភាគីកាន់តែដុនដាប
× ក្រុងប៉េកាំង នៅថ្ងៃទី ១៦ កញ្ញា បានចោទប្រកាន់ភ្នាក់ងារចារកម្មរបស់កោះតៃវ៉ាន់ថា បានព្យាយាមលួចព័ត៌មានសម្ងាត់របស់ខ្លួន ក្នុងគោលបំណងបំផ្លាញសន្តិសុខ និងសណ្ដាប់ធ្នាប់ចិនដើម្បីផលប្រយោជន៍នយោបាយ។ ជាមួយគ្នានេះ រដ្ឋាភិបាលកុម្មុយនិស្តចិន បានព្រមានក្រុងតៃប៉ិថា កំពុងបំផ្លាញទំនាក់ទំនងរវាងភាគីទាំង២ ដែលមានភាពតានតឹងស្រាប់ផងនោះ។
អ្នកនាំពាក្យមួយរូបរបស់រដ្ឋាភិបាលចិន នៅថ្ងៃ១៦ កញ្ញា បានទទូចតៃវ៉ាន់ឲ្យបញ្ឈប់សកម្មភាពចារកម្មរបស់ខ្លួនជាបន្ទាន់។
យោងតាមទីភ្នាក់ងារសារព័ត៌មាន Xinhua លោក An Fengshan អ្នកនាំពាក្យការិយាល័យនៃក្រុមប្រឹក្សារដ្ឋចិនទទួលបន្ទុកកិច្ចការតៃវ៉ាន់ បាននិយាយបែបនេះថា៖ «អាជ្ញាធរតៃវ៉ាន់ ត្រូវតែបញ្ចៀសរាល់សកម្មភាពចារកម្មរបស់ខ្លូន ដែលអាចប៉ះពាល់ដល់ទំនាក់ទំនងរវាងភាគីចិន និងតៃវ៉ាន់ ដែលកំពុងមានភាពតានតឹង និងស្មុគស្មាញស្រាប់ផងនោះ»។
កាលពីថ្ងៃទី ១៥ កញ្ញា ទូរទស្សន៍រដ្ឋចិន CCTV បានចាក់ផ្សាយកម្មវិធីមួយរបស់ខ្លួនដែលបង្ហាញព័ត៌មានលម្អិត ពាក់ព័ន្ធនឹងអំពើចារកម្មរបស់រដ្ឋាភិបាលក្រុងតៃប៉ិទៅលើនិស្សិតចិន ដែលកំពុងសិក្សានៅក្នុងកោះតៃវ៉ាន់។ និស្សិតចិនទាំងនោះ ត្រូវបានបទយកការណ៍នេះបង្ហាញថា ពួកគេ ត្រូវបានគេលួងលោមដោយប្រើប្រាស់ទឹកប្រាក់ ទំនាក់ទំនងស្នេហា និងមិត្តភាព ជាថ្នូរនឹងដោះដូរព័ត៌មានសម្ងាត់នយោបាយ។
ជុំវិញការចោទប្រកាន់របស់ទូរទស្សន៍រដ្ឋចិន CCTV នេះ រដ្ឋាភិបាលតៃវ៉ាន់ បានចេញមុខបកស្រាយថា ការលើកឡើងរបស់ក្រុងប៉េកាំងនេះ ជារឿងប្រឌិតសុទ្ធសាធ។ ជាមួយគ្នានេះ ក្រុងតៃប៉ិ បានប្រាប់ទៅកាន់រដ្ឋាភិបាលចិនទៀតថា កុំប្រើប្រាស់និស្សិតចិនដែលកំពុងសិក្សានៅតៃវ៉ាន់ ជាឧបករណ៍នយោបាយឲ្យសោះ។ យោងតាមការចុះផ្សាយរបស់ទស្សនាវដ្ដីហុងកុង The South China Sea Morning។
គួរឲ្យដឹងដែរថា សម្រាប់ការចោទប្រកាន់បែបនេះ វាមិនមែនជារឿងចម្លែកអ្វីនោះទេ ដ្បិតថា ចិន និងតៃវ៉ាន់ ជារឿយៗ ចោទប្រកាន់គ្នាទៅវិញទៅមក ទាក់ទងនឹងសកម្មភាពចារកម្ម។ តួយ៉ាងក្នុងឆ្នាំ២០១៧ និស្សិតចិនមួយរូបដែលបានសិក្សានៅកោះតៃវ៉ាន់ ត្រូវបានតុលាការក្រុងតៃប៉ិចាប់ដាក់ពន្ធនាគារពីបទប្រមូលព័ត៌មានសំខាន់ៗរបស់រដ្ឋាភិបាលតៃវ៉ាន់ ដោយប្រើប្រាស់បណ្ដាញទំនាក់ទំនងក្នុងសាលា និងក្នុងជួររដ្ឋាភិបាលតៃវ៉ាន់ផ្ទាល់តែម្តង។ លើសពីនេះពួកគេ ក៏បានព្យាយាមបង្កើតបណ្ដាញចារកម្មក្នុងប្រទេសតៃវ៉ាន់ថែមទៀតផង។
បើពិតទៅតៃវ៉ាន់ បានសម្រេចអនុញ្ញាតឲ្យនិស្សិតចិនទៅសិក្សានៅសកលវិទ្យាល័យរបស់ខ្លួន ចាប់តាំងពីឆ្នាំ ២០០៩មកម្ល៉េះ៕
Tag:
ចិន
តៃវ៉ាន់
ចារកម្ម
លោក An Fengshan
© រក្សាសិទ្ធិដោយ thmeythmey.com