ចិនព្រមានប្រឆាំងនឹងគម្រោងលក់អាវុធរបស់អាមរិកទៅឲ្យតៃវ៉ាន់

អន្តរជាតិ

ចិនព្រមានប្រឆាំងនឹងគម្រោងលក់អាវុធរបស់អាមរិកទៅឲ្យតៃវ៉ាន់

26, Sep 2018 , 8:39 pm

រូបភាព

ដោយ:

ក្រុងប៉េកាំង នៅថ្ងៃទី២៥កញ្ញា បានទាមទារឲ្យវ៉ាស៊ីនតោនលុបចោលគម្រោងលក់សម្ភារៈយោធាទៅឲ្យតៃវ៉ាន់ ដែលគិតជាទឹកប្រាក់ចំនួន៣៣០លានដុល្លារ ។ ខ្លួនក៏បានព្រមានពីការធ្លាក់ចុះកាន់ធ្ងន់ធ្ងរនៃទំនាក់ទំនងទ្វេភាគីផងដែរ ប្រសិនបើក្រុងវ៉ាស៊ីនតោនមិនព្រមធ្វើតាមការស្នើសុំទេនោះ។

ថ្លែងនៅមុខក្រុមអ្នកសារព័ត៌មាន អ្នកនាំពាក្យក្រសួងការបរទេសចិន លោក Geng Shuang បាននិយាយថា៖ «យើងទទូចភាគីអាមេរិកឲ្យលុបចោលភ្លាមៗនូវគម្រោងលក់អាវុធ និងកាត់ផ្តាច់ទំនាក់ទំនងជាមួយតៃវ៉ាន់ដើម្បីជៀសវាង ការបំផ្លិចបំផ្លាញដល់ទំនាក់ទំនងចិន-អាមេរិក, ស្ថិរភាពនិងសន្តិភាពក្នុងតំបន់ ព្រមទាំងកិច្ចសហប្រតិបត្តិការរវាងអាមេរិក និងចិនក្នុងវិស័យសំខាន់ៗផងដែរ»។

ទន្ទឹមនឹងនេះក្រសួងការពារចិន ក៏បានចេញសេចក្ដីប្រកាសមួយផងដែរ ដោយបានលើកឡើងថា សំណើលក់អាវុធនេះបានជ្រៀតជ្រែកដល់កិច្ចការផ្ទៃក្នុងរបស់ចិន និងគំរាមកំហែងដល់អធិបតេយ្យភាព និងផលប្រយោជន៍សន្តិសុខរបស់ក្រុងប៉េកាំងទៀតផង។

គួរបញ្ជាក់ដែរថា កិច្ចព្រមព្រៀងលក់អាវុធនេះបានធ្វើឡើង មិនដល់មួយសប្ដាហ៍ផងក្រោយក្រសួងការបរទេសអាមេរិកបានដាក់ទណ្ឌកម្មលើយោធាចិន ដែលបានទិញយន្តហោះចម្បាំង និងមីស៊ីលពីរុស្ស៊ី។ ការដាក់ទណ្ឌកម្មនេះគឺប្រៀបដូចជា ការចាក់សាំងបន្ថែមទៅលើភ្លើងសង្គ្រាមពាណិជ្ជកម្មដែលកំពុងឆាបឆេះ ដោយសារការវាយបកទៅមកពីសំណាក់ប្រមុខដឹកនាំចិននិងអាមេរិក ជុំវិញការដំឡើងពន្ធនាំចូល៕