អន្តរជាតិ
ត្រាំ ប្រាប់មហាសន្និបាត UN៖ អាមេរិកជ្រើសឯករាជ្យ និងសហប្រតិបត្តិការជំនួសការគ្រប់គ្រង ឬក្តោបកា្តប់ពិភពលោក
×![]()
ដោយ: ថ្មីៗ
ប្រធានាធិបតីអាមេរិក ដូណាល់ ត្រាំ បានពន្យល់ប្រាប់អង្គមហាសន្និបាតអង្គការសហប្រជាជាតិនាថ្ងៃ ២៥ ខែកញ្ញាថា អាមេរិកឲ្យតម្លៃលើជំនឿ ទំនៀមទម្លាប់ខុសប្លែកៗគ្នារបស់ប្រជាជាតិនីមួយៗ ហើយអាមេរិកមិនបង្គាប់បញ្ជាឲ្យប្រទេសដទៃធ្វើអ្វីតាមខ្លួនឡើយ។ អ្វីដែលអាមេរិកចង់បាននោះគឺ ការគោរពសិទ្ធិអធិបតេយ្យ ឯករាជ្យ និងសហការគ្នាដើម្បីប្រយោជន៍រួម។
ក្នុងសុន្ទរកថាជាង៣០នាទី ប្រមុខរដ្ឋអាមេរិកបានបញ្ជាក់ឡើងវិញថា នៅពេលដែលប្រជាជាតិនីមួយៗអាចការពារប្រយោជន៍ប្រជាជនខ្លួន និងគោរពសិទ្ធិអធិបតេយ្យរបស់គ្នាទៅវិញទៅមកនោះ សន្តិសុខ ស្ថិរភាព សន្តិភាព និងវិបុលភាពនឹងកើតឡើងជាក់ជាមិនខាន។
មេដឹកនាំរូបនេះទទួលស្គាក់ថា ប្រជាជាតិទាំងអស់នៅលើពិភពលោកមានជំនឿ ប្រវត្តិសាស្ត្រ វប្បធម៌ និងទំនៀមទម្លាប់ដែលមានគុណតម្លៃផ្សេងគ្នា។ ដូច្នេះហើយ ការសហការគ្នាផ្អែកលើគោលការណ៍ស្មើភាពគ្នា និងគោរពសិទ្ធិអធិបតេយ្យជាគន្លឹះ ហើយអាមេរិកមិនជ្រើសរើសឡើយនូវប្រព័ន្ធអភិបាលកិច្ចសាកល, ការគ្រប់គ្រង ឬក្តោបក្តាប់ពិភពលោកនោះ។
លោក ត្រាំ សង្កត់ធ្ងន់ដែរថា ជាមហាអំណាចពិភពលោក អាមេរិកមិនដើរបង្គាប់បញ្ជា ឬបង្រៀនគេឯងពីរបៀបរស់នៅ របៀបធ្វើការ ឬរបៀបគោរពឡើយ។ ប៉ុន្តែអ្វីដែលអាមេរិកចង់បានពីប្រទេសទាំងអស់ជាដៃគូ និងជាមិត្តនោះគឺ ការគោរពនិងឲ្យតម្លៃដល់អធិបតេយ្យអាមេរិកប៉ុណ្ណោះ។
«ខ្ញុំឲ្យតម្លៃលើសិទ្ធិរបស់ប្រជាជាតិនីមួយៗក្នុងសាលប្រជុំនេះក្នុងការការពារទំនៀមទម្លាប់, ជំនឿ និងប្រពៃណីខ្លួន។ អាមេរិកមិនទៅប្រាប់អ្នកពីរបៀបនៃការរស់នៅ ធ្វើការឬគោរពប្រណិប័តន៍អ្វីឡើយ។ យើងសុំមកវិញ ត្រឹមតែអ្នកគោរពអធិបតេយ្យរបស់យើងប៉ុណ្ណោះ»។
លើពីទាត់ចោលអភិបាលកិច្ចពិភពលោក និងគោលការណ៍សាកល លោក ត្រាំ ក៏បានលើកឡើងជាថ្មីទៀតដែរថា គោលនយោបាយការបរទេសអាមេរិក គឺដើរតាមគោលគំនិត «ប្រាកដនិយមជាគោលការណ៍» (Principled Realism) ដែលផ្អែកលើលទ្ធផល និងស្ថានភាពជាក់ស្តែង មិនមែនផ្អែកលើទ្រឹស្តីឬមនោគមន៍វិជា្ជឡើយ។
វាមានការបកស្រាយច្រើនជុំវិញ អ្វីដែលលោក ត្រាំ លើកឡើងនេះ។ ប៉ុន្តែមេដឹកនាំរូបនេះទំនងជាមានន័យថា អាមេរិកនឹងមិនបង្រៀនគេឯង ឬបង្ខំឲ្យគេឯងធ្វើតាមខ្លួនជុំវិញបញ្ហាសិទ្ធិមនុស្ស និងប្រជាធិបតេយ្យឡើយ។ អ្វីដែលសំខាន់ គឺប្រយោជន៍ប្រជាជាតិនីមួយដែលកើតចេញពីកិច្ចសហប្រតិបត្តិការ ហើយវាអាចជាប្រយោជន៍សេដ្ឋកិច្ច សន្តិសុខ និងនយោបាយ។
គេនៅចាំបាននៅក្នុងការពេលឃោសនាបោះឆ្នោតប្រធានាធិបតីអាមេរិកកាលពីចុងឆ្នាំ ២០១៦ លោក ត្រាំ បានបញ្ជាក់ច្បាស់ថា បើសិនជាលោកក្លាយជាប្រធានាធិបតី លោកនឹងបញ្ចប់ការអនុវត្តគោលនយោបាយកសាងប្រជាជាតិ (Nation Building) និងយុទ្ធសាស្ត្រប្តូររបបនៅបរទេស(Regime Change)។
ក្រោយស្បថចូលកាន់តំណែងជាប្រធានាធិបតី ក្រសួងការបរទេសអាមេរិកក៏បានសម្រេចដកចំណុចពាក់ព័ន្ធនឹងការលើកស្ទួយសិទ្ធិមនុស្ស និងប្រជាធិបតេយ្យចេញពីគោលការណ៍នៃបេសកម្មការងាររបស់ខ្លួនថែមទៀតផង៕
Tag:
ដូណាល់ ត្រាំ
UNGA
អាមេរិក
© រក្សាសិទ្ធិដោយ thmeythmey.com
