អន្តរជាតិ
លោក អាបេ ចង់ជួបលោក គីម ជុងអ៊ុន ទល់មុខ ដើម្បីដោះស្រាយសំណុំរឿងចាប់ជំរិតជនជាតិជប៉ុន
×![]()
ថ្លែងនាមហាសន្និបាតអង្គការសហប្រជាជាតិកាលពីថ្ងៃទី២៥ កញ្ញា នាយករដ្ឋមន្ត្រីជប៉ុន ស៊ីនហ្សូ អាបេ បានបង្ហាញឆន្ទៈជួបមុខគ្នាផ្ទាល់ជាមួយមេដឹកនាំកូរ៉េខាងជើង គីម ជុងអ៊ុន។ ការបង្ហាញឆន្ទៈរបស់មេដឹកនាំរូបនេះគឺមិនមែនផ្តោតលើបញ្ហារំសាយអាវុធនុយក្លេអ៊ែរនោះទេ ប៉ុន្តែគឺដើម្បីស្វែងរកដំណោះស្រាយ ជុំវិញបញ្ហាការចាប់ពង្រាត់ប្រជាជនជប៉ុនពីសំណាក់ភ្នាក់ងារចារកម្មកូរ៉េខាងជើងកាលពីចន្លោះទសវត្សរ៏ទី៨០ និង៩០។
«ដើម្បីដោះស្រាយបញ្ហាការចាប់ពង្រាត់ជប៉ុននេះ ខ្ញុំត្រៀមខ្លួនរួចរាល់ដើម្បីទម្លាយមន្ទិលនៃការពុំទុកចិត្តគ្នាជាមួយកូរ៉េខាងជើង ហើយបង្កើតការចាប់ផ្ដើមថ្មីមួយ ជាពិសេសនោះគឺជួបមុខគ្នាផ្ទាល់ជាមួយនឹងលោក គីមជុងអ៊ុនតែម្តង។ ប៉ុន្តែប្រសិនបើយើងបានជួបគ្នាមែននោះ ខ្ញុំជឿជាក់ថាយើងអាចនឹងស្វែងរកដំណោះស្រាយចំពោះបញ្ហានេះបាន»។ នេះជាការបញ្ជាក់របស់លោក ស៊ីនហ្សូ អាបេ នៅឯមហាសន្និបាត UN នៅឯបុរីញូវយ៉ក។
យោងតាមកាសែត Japan Times ប្រធានាធិបតីកូរ៉េខាងត្បូង ម៉ូន ចេអ៊ីន បានប្រាប់លោកនាយករដ្ឋមន្ត្រីជប៉ុន អំឡុងជំនួបនៅថ្ងៃទី២៥ កញ្ញាថា លោក គីម ជុងអ៊ុនក៏ត្រៀមខ្លួនជួបពិភាក្សាផ្ទាល់ជាមួយជប៉ុននៅពេលវេលាសមប្រកបណាមួយ ដើម្បីពង្រឹងទំនាក់ទំនងនៃប្រទេសទាំងពីរផងដែរ។
គួររម្លឹកថា ភ្នាក់ងារចារកម្មកូរ៉េខាងជើងបានចាប់ពង្រាត់ប្រជាជនជប៉ុនជាច្រើននាក់ កាលពីចន្លោះទសវត្សរ៍ឆ្នាំ១៩៧០ និង១៩៨០ ។ ការចាប់ពង្រាត់នេះគឺដើម្បីបង្ខំឲ្យប្រជាជនជប៉ុនទាំងនោះ បង្រៀនភាសានិងវប្បធម៌ជប៉ុន ដល់ភ្នាក់ងារចារកម្មកូរ៉េខាងជើង។
ក្នុងឆ្នាំ២០០២ និង២០០៤ អតីតនាយករដ្ឋមន្ត្រីជប៉ុន Junichiro Koizumi បានធ្វើដំណើរទៅកាន់ក្រុងព្យុងយ៉ាងដើម្បី ស្វែងរកទំនាក់ទំនងថ្មីជាមួយមេដឹកនាំកូរ៉េខាងជើងកាលជំនាន់នោះ លោក គីម ជុងអ៊ីល ។ យ៉ាងណាមិញកូរ៉េខាងជើងបានបញ្ជាក់ប្រាប់ជប៉ុនថា ជនរងគ្រោះដែលត្រូវបានចាប់ពង្រាត់ទាំងនោះ បានបាត់បង់ជីវិតអស់ហើយ៕
Tag:
ជប៉ុន
កូរ៉េខាងជើង
ស៊ីនហ្សូ អាបេ
គីម ជុងអ៊ុន
© រក្សាសិទ្ធិដោយ thmeythmey.com
