អន្តរជាតិ
ចិនសង្ឃឹមថា អង់គ្លេសនឹងគោរពអធិបតេយ្យភាពខ្លួនក្នុងដែនជម្លោះសមុទ្រចិនខាងត្បូង
×![]()
ប្រមុខការទូតចិនប្រាប់ទៅកាន់សមភាគីអង់គ្លេសនៅថ្ងៃ ២៤ ខែកញ្ញាថា ចិនសង្ឃឹមថាចក្រភពអង់គ្លេសអាចរក្សាជំហរដោយមិនលម្អៀងទៅភាគីខាងណាក្នុងជម្លោះសមុទ្រចិនខាងត្បូងឡើយ។ ចិនក៏ចង់ឃើញអងើគ្លេសព្រមទាំងគោរពអធិបតេយភាព និងបូរណភាពទឹកដីខ្លួនដោយស្មោះស្ម័គ្រក្នុងដែនជម្លោះដែរ។
ក្រុងប៉េកាំងបានបង្ហាញការខឹងសម្បាខ្លាំង បន្ទាប់ពីនាវាចម្បាំងអង់គ្លេសមួយគ្រឿងកាលពីខែសីហា ធ្វើដំណើរក្បែរ ប្រជុំកោះនៅសមុទ្រចិនខាងត្បូង ដែលចិនចាត់ទុកជាដែនដីរបស់ខ្លួននោះ។
យោងតាមទីភ្នាក់ងារព័ត៌មាន Reuters រដ្ឋាភិបាលកុម្មុយនីស្តនេះបានចាត់ទុកសកម្មភាពរបស់អង់គ្លេសថា «ជាសកម្មភាពបង្ករឿង» ហើយក៏បានព្រមានថា ចំណងទំនាក់ទំនងរវាងប្រទេសទាំងពីរអាចនឹងប្រេះស្រាំ ក្រោយពីហេតុការណ៍នេះផងដែរ។
ទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី (Wang Yi) នៅថ្ងៃទី២៤ កញ្ញា បានជួបពិភាក្សាជាមួយរដ្ឋមន្ត្រីការបរទេសអង់គ្លេស Jeremy Hunt នៅដោយឡែកកិច្ចប្រជុំមហាសន្និបាតអង្គការសហប្រជាជាតិនាទីក្រុងញូវយ៉ក។ យោងតាមក្រសួងការបរទេសចិន នាជំនួបនៅថ្ងៃទី២៥ កញ្ញានេះជាមួយលោក Hunt លោក វ៉ាង បានបង្ហាញពីជំហរដ៏រឹងមាំរបស់រដ្ឋាភិបាលចិននៅលើជម្លោះសមុទ្រចិនខាងត្បូង។
«ក្រុងប៉េកាំងសង្ឃឹមថា ចក្រភពអង់គ្លេសនឹងអនុវត្តគោលជំហររបស់ខ្លួនយ៉ាងពិតប្រាកដ ដោយមិនប្រកាន់យកភាគីណាមួយឡើយក្នុងបញ្ហាសមុទ្រចិនខាងត្បូង។ ហើយអង់គ្លេស គួរតែគោរពបូរណភាព និងអធិបតេយ្យភាពរបស់ចិនដោយស្មោះត្រង់ ព្រមទាំងមិនធ្វើសកម្មភាពនានាដែលប៉ះពាល់ដល់ ទំនាក់ទំនងរវាងប្រទេសទាំងពីរនោះទេ»។ នេះបើតាមការបញ្ជាក់របស់លោក Wang ក្នុងសេចក្ដីប្រកាសដែលបានចេញផ្សាយដោយក្រសួងការបរទេសចិន ។
គួររម្លឹកផងដែរថា ចិន និងចក្រភពអង់គ្លេសកាលពីខែមុន បានយល់ព្រមស្វែងរកឱកាសពាណិជ្ជកម្មជាមួយគ្នាបន្ថែមទៀត នៅក្រោយពេលអង់គ្លេសចាកចេញពីសហភាពអឹរ៉ុប។ យ៉ាងណាមិញសេចក្តីប្រកាសរបស់ចិនជុំវិញជំនួបរវាងលោក Wang និងលោក Huntមិនបានលើកឡើងពីការលែងលះគ្នារបស់អង់គ្លេសជាមួយសភាពអឺរ៉ុប (Brixit) ឬកិច្ចព្រមព្រៀងពាណិជ្ជកម្មសេរីនោះឡើយ៕
Tag:
ចិន
ចក្រភពអង់គ្លេស
សមុទ្រចិនខាងត្បូង
© រក្សាសិទ្ធិដោយ thmeythmey.com
