អន្តរជាតិ
កាណាដាដកហូតសញ្ជាតិកិត្តិយសរបស់លោកស្រី ស៊ូជី ជុំវិញវិបតិ្តរ៉ូហ៊ីងយ៉ា
× រដ្ឋសភាកាណាដានៅថ្ងៃទី២៧កញ្ញា បានបោះឆ្នោតជាឯកច្ឆន្ទដើម្បីដកហូតសញ្ជាតិកិត្តិយសរបស់មេដឹកនាំមីយ៉ាន់ម៉ាលោកស្រី អ៊ុងសាន ស៊ូជី (Aung San Suu Kyi ) ជុំវិញវិបត្តិរ៉ូហ៊ីងយ៉ា។ បច្ចុប្បន្នលោកស្រី អ៊ុងសាន ស៊ូជី គឺជាទីប្រឹក្សារដ្ឋ និងជារដ្ឋមន្ត្រីការបរទេសមីយ៉ាន់ម៉ា។
រដ្ឋាភិបាលក្រុងអ៊ូតាវ៉ា (Ottawa) កាលពីឆ្នាំ២០០៧ បានផ្ដល់សញ្ជាតិកិត្តិយសកាណាដាដ៏កម្រដល់លោកស្រី ស៊ូជី។ ប៉ុន្តែកេរ្តិ៍ឈ្មោះអន្តរជាតិរបស់លោកស្រីបានបាត់បង់ ដោយសារការព្រងើយកន្តើយរបស់លោកស្រី ពាក់ព័ន្ធនឹងការនិយាយពីការធ្វើទុក្ខបុកម្នេញរបស់យោធា ប្រឆាំងនឹងជនជាតិភាគតិចម៉ូស្លីមរ៉ូហ៊ីងយ៉ា។ សម្រាប់សកម្មភាពរបស់យោធាមីយ៉ាន់ម៉ានេះ កាណាដាកាលពីសប្ដាហ៍មុន បានប្រកាសថាជា «អំពើប្រល័យពូជសាសន៍»។
យោងតាមទីភ្នាក់ងារព័ត៌មាន AFP អ្នកនាំពាក្យក្រសូងការបរទេសកាណាដា លោក Adam Austen បាននិយាយថា៖ «ក្នុងឆ្នាំ២០០៧ សភាកាណាដា បានផ្ដល់សញ្ជាតិកិត្តិយសកាណាដាទៅឲ្យលោកស្រី អ៊ុងសាន ស៊ូជី។ តែថ្ងៃនេះសភាបានអនុម័តជាឯកច្ឆន្ទសម្រេចដកហូតសញ្ជាតិនេះពីលោកស្រីវិញ»។
ទន្ទឹមនឹងនេះ លោក Austen បានលើកឡើងទៀតថា ការព្រងើយកន្តើយរបស់លោកស្រី ស៊ូជី ក្នុងការប្រកាសអំពើប្រល័យពូជសាសន៍លើជនជាតិរ៉ូហ៊ីងយ៉ាជាសាធារណៈនោះ ជាហេតុផលដែលធ្វើឲ្យកាណាដាសម្រេចដកហូតសញ្ជាតិកិត្តិយសពីលោកស្រី។ យ៉ាងណាមិញលោកបន្តថា៖ «យើងនឹងបន្តជួយគាំទ្រជនជាតិរ៉ូហ៊ីងយ៉ា ដោយការផ្ដល់ជំនួយមនុស្សធម៌ និងដាក់ទណ្ឌកម្មប្រឆាំងនឹងមេទ័ពមីយ៉ាន់ម៉ា ព្រមទាំងទាមទារឲ្យពួកគេទាំងនោះទទួលខុសត្រូវលើបញ្ហានេះទៀតផង»។
បើពិតទៅ យុទ្ធនាការយោធាដ៏ឃោរឃៅមួយរបស់រដ្ឋាភិបាលមីយ៉ាន់ម៉ា ដែលបានចាប់ផ្ដើមកាលពីឆ្នាំ២០១៧ បានបង្ខំឲ្យជនជាតិម៉ូស្លីមរ៉ូហ៊ីងយ៉ាជាង ៧០ម៉ឺននាក់ ចាកចេញពីប្រទេសនេះចូលទៅកាន់បង់ក្លាដេស។ នៅទីនោះពួកគេកំពុងសម្ងំរស់នៅក្នុងជំរំជនភៀសខ្លួន ហើយភ័យខ្លាចនឹងវិលត្រឡប់ទៅកាន់មីយ៉ាន់ម៉ាវិញ ទោះបីជាមានកិច្ចព្រមព្រៀងមាតុភូមិនិវត្តន៍ក៏ដោយក្តី។ យោធាទាំងនោះត្រូវបានអន្តរជាតិចោទប្រកាន់ ពីបទសម្លាប់មនុស្សក្រៅប្រព័ន្ធច្បាប់, រំលោភបំពានផ្លូវភេទ និងដុតផ្ទះជាដើម។
ប៉ុន្តែក្រុមយោធាមីយ៉ាន់ម៉ា បានចេញមុខច្រានចោលការចោទប្រកាន់ស្ទើរតែទាំងស្រុង ដោយបានអះអាងថា ពួកគេបានធ្វើតាមច្បាប់ប៉ុណ្ណោះដើម្បីកម្ទេចសំបុកក្រុមឧទ្ទាមរ៉ូហ៊ីងយ៉ា។ យ៉ាងណាមិញអង្គការសហប្រជាជាតិនៅថ្ងៃទី២៧ កញ្ញា បានបង្កើតការពិភាក្សា ដើម្បីរៀបចំចោទប្រកាន់ជាផ្លូវលើអគ្គបញ្ជាការយោធាមីយ៉ាន់ម៉ា និងមេទ័ពជាន់ខ្ពស់ចំនួន៥រូបផ្សេងទៀត ជុំវិញឧក្រិដ្ឋកម្មប្រឆាំងនឹងមនុស្សជាតិ៕
Tag:
កាណាដា មីយ៉ានម៉ា
លោកស្រី អង់ស៊ាន ស៊ូជី
© រក្សាសិទ្ធិដោយ thmeythmey.com