អន្តរជាតិ
យន្តហោះដឹកអ្នកដំណើររបស់ប៉ាពូអាស៊ីធ្លាក់ចូលសមុទ្រ តែពុំមានអ្នកស្លាប់
× យន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ Niugini បានធ្លាក់ចូលក្នុងសមុទ្រ នៅថ្ងៃទី២៨ កញ្ញា ក្រោយពីរអិលចេញពីផ្លូវចុះចតនៅលើកោះដាច់ស្រយាលមីក្រូណេស៊ី។
យន្តហោះរបស់ក្រុមហ៊ុនអាកាសចរណ៍ជាតិ ប៉ាពូអាស៊ី នូវែលហ្គីណេ (Papua New Guinea) នេះ បានត្រៀមចុះចតនៅឯអាកាសយានដ្ឋាន Weno ប៉ុន្តែជាអកុសលបានធ្លាក់ចូលទៅក្នុងសមុទ្រក្នុងរដ្ឋChuuk នៃរដ្ឋសហព័ន្ធមីក្រូណេស៊ី (Micronesia)។ នេះបើតាមការចុះផ្សាយរបស់សារព័ត៌មានក្នុងស្រុក Pacific Daily ។
សារព័ត៌មានដដែលនេះ បានស្រង់សម្ដីមន្ត្រីអាកាសចរណ៍លោក Jimmy Emilio ថា អ្នកដំណើរចំនួន៣៦នាក់ និងអ្នកបម្រើលើយន្តហោះចំនួន១១ទៀតមានសុវត្ថិភាពទាំងអស់ និងពុំមានរបួសអ្វីនោះទេ។ យ៉ាងណាមិញពួកគេត្រូវបានគេបញ្ជូនទៅកាន់មន្ទីរពេទ្យ ដើម្បីទទួលការពិនិត្យ។ លោក Emilio បានបញ្ជាក់ថា មូលហេតុនៃហេតុការណ៍នេះពុំទាន់មានការបកស្រាយច្បាស់នៅឡើយទេ។ «អាជ្ញាធរកំពុងស៊ើបអង្កេតលើរឿងនេះ ហើយយើងនឹងទទួលព័ត៌មានឆាប់ៗនេះ»។
គណៈកម្មការទទួលបន្ទុកស៊ើបអង្កេតឧបទ្ទវហេតុរបស់ប៉ាពូអាស៊ី នូវែលហ្គីណេ បានត្រៀមបញ្ជូនក្រុមរបស់ខ្លួនទៅកាន់ទីកន្លែងកើតហេតុ។ យោងតាមការចុះផ្សាយរបស់សារព័ត៌មាន ABC របស់អូស្ត្រាលី៕
Tag:
ប៉ាពូអាស៊ី នូវែលហ្គីណេ
លោក Jimmy Emilio
© រក្សាសិទ្ធិដោយ thmeythmey.com