អន្តរជាតិ
ក្រុងប៉េកាំងថា បញ្ហារ៉ូហ៊ីងយ៉ាមិនគួរពង្រីកឲ្យក្លាយជា «បញ្ហាអន្តរជាតិ» ឡើយ
× ប្រមុខការទូតចិន បាននិយាយនៅថ្ងៃទី២៧ កញ្ញាថា វិបត្តិរ៉ូហ៊ីងយ៉ាមិនគួរស្មុគស្មាញ ឬពង្រីកឲ្យក្លាយជា «បញ្ហាអន្តរជាតិ» ឡើយ។ ការលើកឡើងរបស់លោកគឺធ្វើឡើង ស្របពេលដែលអង្គការសហប្រជាជាតិត្រៀមប្រមែប្រមូលភស្តុតាង ដើម្បីប្រឆាំងនឹងអំពើរំលោភសិទ្ធិមនុស្សក្នុងមីយ៉ាន់ម៉ា។
ក្រុមប្រឹក្សាសិទ្ធិមនុស្ស UN នៅថ្ងៃទី២៧ កញ្ញា បានបោះឆ្នោតបង្កើតភ្នាក់ងារមួយ ដែលមានតួនាទីស្វែករកចម្លើយទាក់ទងនឹងអំពើប្រល័យពូជសាសន៍នៅភាគខាងលិចរដ្ឋរ៉ាក់ឃីន (Rakhine)។ ចិន និងហ្វីលីពីន បានបោះឆ្នោតប្រឆាំងនឹងការបង្កើតនេះ ខណៈជាង១០០ប្រទេសផ្សេងទៀតបានគាំទ្រ។
និយាយទៅកាន់រដ្ឋមន្ត្រីការបរទេសបង់ក្លាដេស លោក Abul Hasan Mahmood Ali និងរដ្ឋមន្ត្រីខុទ្ទកាល័យទីប្រឹក្សារដ្ឋមីយ៉ាន់ម៉ា លោក Kyaw Tint Swe ក្នុងទីក្រុងញូវយ៉ក នៅថ្ងៃទី២៧ កញ្ញា រដ្ឋមន្ត្រីការបរទេសចិន លោកវ៉ង់ យី (Wang Yi) បាននិយាយថា បញ្ហារ៉ូហ៊ីងយ៉ាគឺពិតជាប្រវត្តិសាស្ត្រដ៏ស្មុគស្មាញមួយ។
«បញ្ហានៅក្នុងរដ្ឋរ៉ាក់ឃីន (Rakhine) ជាបញ្ហាប្រវត្តិសាស្ត្ររវាងមីយ៉ាន់ម៉ានិងបង់ក្លាដេសប៉ុណ្ណោះ។ ចិនមិនយល់ស្របឲ្យពង្រីកឲ្យក្លាយជាបញ្ហាអន្តរជាតិនោះឡើយ»។ នេះការបញ្ជាក់របស់លោក វ៉ង់ យី យោងតាមសេចក្តីប្រកាសរបស់ក្រសួងការទេសចិននៅថ្ងៃទី២៨ កញ្ញា។
ទន្ទឹមនឹងនេះ លោក វ៉ង់បន្តថា ក្រុងប៉េកាំងសង្ឃឹមថា មីយ៉ាន់ម៉ានិងបង់ក្លាដេសអាចស្វែងរកដំណោះស្រាយដោយការពិភាក្សាបាន ហើយចិននឹងជួយផ្ដល់វេទិកាមួយសម្រាប់កិច្ចពិភាក្សានេះ។ «សហគមន៍អន្តរជាតិរួមមានអង្គការសហប្រជាជាតិ ក៏អាចចូលរួមដើរតួនាទីយ៉ាងសំខាន់ក្នុងបញ្ហានេះផងដែរ»។
គួរបញ្ជាក់ដែរថា កាលពីឆ្នាំ២០១៧ ជនជាតិភាគតិចរ៉ូហ៊ីងយ៉ាជាង៧ពាន់នាក់ ត្រូវបានកងយោធាមីយ៉ាន់ម៉ាបង្ខំឲ្យជម្លៀសចេញពីផ្ទះសម្បែងទៅកាន់បង់ក្លាដេស។ ក្នុងយុទ្ធនាការដ៏ឃោរឃៅនេះ គឺរួមមានដូចជា ការសម្លាប់ក្រៅប្រព័ន្ធច្បាប់, ការរំលោភ និងដត់ផ្ទះសម្បែងជាដើម។ រដ្ឋាភិបាលមីយ៉ាន់ម៉ា ត្រូវបានអន្តរជាតិថ្កោលទោសជាខ្លាំងជុំវិញបញ្ហានេះ។ អង្គារសហប្រជាជាតិបានហៅសកម្មភាពនេះជា«អំពើប្រល័យពូជសាសន៍» តែមីយ៉ាន់ម៉ាបានទាត់ចោលការចោទប្រកាន់នេះដោយបានហៅរឿងនេះថា «ការកម្ទេចក្រុមឧទ្ទាម»៕
Tag:
ចិន
មីយ៉ាន់ម៉ា
វិបត្តិរ៉ូហ៊ីងយ៉ា
© រក្សាសិទ្ធិដោយ thmeythmey.com