រៀងរាល់ម៉ោងនៅថៃ មានមនុស្ស៦នាក់ប៉ុនប៉ងធ្វើអត្តឃាត ដោយសារវិបត្តិផ្លូវចិត្ត

សុខភាព

អន្តរជាតិ

រៀងរាល់ម៉ោងនៅថៃ មានមនុស្ស៦នាក់ប៉ុនប៉ងធ្វើអត្តឃាត ដោយសារវិបត្តិផ្លូវចិត្ត

30, Sep 2018 , 10:19 pm

រូបភាព

នាង Kanyakorn Supakarnkacharoen ហៅ Kae Lederer ដែលជាតារាបង្ហាញម៉ូតដ៏ល្បីល្បាញ បានលោតសម្លាប់ខ្លួនពីលើអាគារនៅក្រុងបាងកក

ដោយ: ធីតា

ថៃកំពុងមានកង្វល់យ៉ាងខ្លាំងទាក់ទងនឹងវិបត្តិផ្លូវចិត្តរបស់ពលរដ្ឋខ្លួនដែលបណ្តាលឲ្យមានករណីអត្តឃាតជាបន្តបន្ទាប់។ អគ្គនាយកសុខភាពផ្លូវចិត្តថៃ បានបញ្ជាក់ឲ្យដឹងថា រៀងរាល់ម៉ោង មានមនុស្សប្រមាណ៦នាក់ ប៉ុនប៉ងធ្វើអត្តឃាត។ នេះបើតាមការផ្សាយរបស់សារព័ត៌មាន Khaosod English។

កាលពីពេលថ្មីៗកន្លងមកនេះ បុរសម្នាក់បានសម្លាប់ខ្លួនក្នុងរថយន្តនាទីក្រុងបាងកក បន្ទាប់មក តារាបង្ហាញម៉ូតដ៏ល្បីឈ្មោះ ម្នាក់បានលោតពីលើអាគារសម្លាប់ខ្លួនដូចគ្នា។ នេះជាគ្រាន់តែជាឧទាហរណ៍ជាក់ស្តែងទាក់ទងនឹងករណីដែលកើតនៅក្នុងក្រុងបាងកក ប៉ុណ្ណោះ ប៉ុន្តែនៅទូទាំងប្រទេសថៃទាំងមូល ករណីអត្តឃាត កំពុងក្លាយជាក្តីកង្វល់ដ៏ធំក្នុងសង្គម។

លោក Setthayus Apisatthapitak អាយុ៣៨ឆ្នាំ ដែលបានដុតកំដៅខ្លួនក្នុងរថយន្តនោះ ត្រូវបានក្រុមគ្រួសាររាយការណ៍ថា គាត់មានវិបត្តិផ្លូវចិត្តជាយូរមកហើយ ពីព្រោះការបរាជ័យក្នុងមុខជំនួញ ហើយលង់ខ្លួនក្នុងបំណុល។

ចំណែកករណីអត្តឃាតរបស់តារាបង្ហាញម៉ូត Kanyakorn Supakarnkacharoen ហៅ Kae Lederer ដែលលោតសម្លាប់ខ្លួនពីលើអាគារនោះវិញ ត្រូវបានមិត្តភក្តិម្នាក់អះអាងប្រាប់សមត្ថកិច្ចផងដែរថា នារីវ័យក្មេងរូបនេះ មានវិបត្តិផ្លូវចិត្តអស់រយៈពេលជាច្រើនឆ្នាំមកហើយ។

លោក Boonreung Traireungworarat អគ្គនាយកទទួលបន្ទុកសុខភាពផ្លូវចិត្តរបស់ថៃ បានបញ្ជាក់ប្រាប់ Khaosod English ថា មនុស្ស៦នាក់ប៉ុនប៉ងធ្វើអត្តឃាតជារៀងរាល់ម៉ោងនៅប្រទេសថៃ ពោលគឺមានប្រមាណ៥៣០០០នាក់ ជារៀងរាល់ឆ្នាំ។

ទោះបីជាយ៉ាងណាក៏ដោយ អ្នកជំនាញរូបនេះ បានបញ្ជាក់ថា ការព្យាយាមភាគច្រើនមិនបានជោគជ័យនោះឡើយ។ កាលពីឆ្នាំ២០១៧ មានមនុស្ស៣៩៣៤នាក់ បានធ្វើអត្តឃាត ដោយចំនួននេះ មានការថយចុះតិចតួចបំផុត បើប្រៀបធៀបទៅនឹងឆ្នាំ២០១៦ ដែលមាន៤១៣១នាក់។ ករណីទាំងនេះ បានធ្វើឲ្យសេដ្ឋកិច្ចរដ្ឋប្រចាំឆ្នាំខាតបង់ជាង៤០០លានបាត (ជាង១២លានដុល្លារអាមេរិក)។

«របៀបរស់នៅប្រចាំថ្ងៃរបស់ពលរដ្ឋថៃនាពេលបច្ចុប្បន្ននេះ ពិតជាគួរឲ្យព្រួយបារម្ភខ្លាំងណាស់ ជាពិសេសអ្នករស់នៅតំបន់ទីក្រុង។ ពួកគេរស់នៅបែបប្រញាប់ប្រញាល់ ពួកគេព្យាយាមសម្របខ្លួនទៅនឹងស្ថានភាពដែលមិនដែលធ្លាប់ជួប ហើយពួកគេមិនដែលមានពេលវេលាគ្រប់គ្រាន់ដើម្បីពិចារណាអ្វីនោះឡើយ»។ នេះជាការរៀបរាប់របស់លោក Boonreung ដោយបញ្ជាក់ថា ការធ្វើអ្វីដែលមិនបានគិតទុកច្បាស់លាស់ តែងតែនាំឲ្យមានការខកចិត្ត

កាលពីឆ្នាំមុន នៅថៃ មានរហូតដល់ក្មេងអាយុក្រោម១០ឆ្នាំ ក៏បានធ្វើអត្តឃាតផងដែរ។ មនុស្សអាយុចន្លោះពី៣០ទៅ៥៩ឆ្នាំភាគច្រើន សម្លាប់ខ្លួន ដោយសារតែបញ្ហាគ្រឿងញៀន ជាតិស្រវឹង និងវិបត្តិផ្លូវចិត្ត។ ចំពោះអ្នកមានអាយុចន្លោះពី៦០ទៅ៦៤ឆ្នាំ ភាគច្រើន មានអារម្មណ៍ស្រងេះស្រងោច ដោយសារតែគ្រួសារមិនសូវអើពើ។

នៅឆ្នាំ២០១៦ នាយកដ្ឋានសុខភាពផ្លូវចិត្តថៃ (MHD) បានលើកឡើងក្នុងរបាយការណ៍ថា ថៃ ស្ថិតនៅចំណាត់ថ្នាក់លេខបី បន្ទាប់ពីជប៉ុន និងស៊ុយអែត លើករណីអត្តឃាតច្រើនជាងគេ ដោយ៧០ភាគរយដោយចងក ២០ភាគរយដោយការបំពុល និង១០ភាគរយដោយការបាញ់សម្លាប់ខ្លួនឯង៕