កូរ៉េទាំងពីរ ចាប់ផ្ដើមដោះមីននៅតាមព្រំដែនតាមការឯកភាពគ្នា

អន្តរជាតិ

កូរ៉េទាំងពីរ ចាប់ផ្ដើមដោះមីននៅតាមព្រំដែនតាមការឯកភាពគ្នា

01, Oct 2018 , 10:19 pm

រូបភាព

ទាហានកូរ៉េខាងត្បូងឈរក្នុងតំបន់សន្តិសុខរួម JSA (រូបភាព AFP)

ដោយ: តន ចាន់រិទ្ធារ៉ា

កូរ៉េទាំងពីរ នៅថ្ងៃទី១ ខែតុលា បានចាប់ផ្ដើមការងាររបស់ខ្លួនក្នុងការដោះមីនចេញពីផ្នែកនៃតំបន់គ្មានកងទ័ព (DMZ) ដែលខណ្ឌចែកឧបទ្វីបកូរ៉េជាពីរ។ ក្រសួងការពារជាតិកូរ៉េខាងត្បូងនិយាយថា ការដោះមីននេះ គឺស្របតាមកិច្ចព្រមព្រៀងថ្មីៗនេះក្នុងការកាត់បន្ថយភាពតានតឹង និងបញ្ចៀសការប៉ះទង្គិចជាយថាហេតុ។ មេដឹកនាំកូរ៉េទាំងពីរបានត្រូវបានឯកភាពគ្នាបញ្ចប់ជម្លោះក្នុងជំនួបខែមេសា ហើយកិច្ចព្រមព្រៀងយោធាមួយ ក៏ត្រូវបានចុះហត្ថលេខានាជំនួបមេដឹកនាំនៅខែកញ្ញា។

យោធាមកពីកូរ៉េខាងត្បូង និងកូរ៉េខាងជើង បានចាប់ផ្ដើមដោះមីននៅតំបន់សន្តិសុខរួម (JSA) ក្នុងភូមិប៉ាន់មុនជុមដែលជាព្រំដែនកូរ៉េទាំងពីរ។ ការដោះមីននេះ ធ្វើឡើងបន្ទាប់ពីការចុះកិច្ចព្រមព្រៀងរវាងរដ្ឋមន្ត្រីការពារជាតិកូរ៉េទាំងពីរអំឡុងជំនួបរវាងប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកូរ៉េខាងជើង គីម ជុងអ៊ុន ថ្ងៃទី១៨-២០ ខែកញ្ញានៅទីក្រុងព្យុងយ៉ាង។

ក្នុងសេចក្ដីប្រកាសព័ត៌មានថ្ងៃទី១ ខែតុលា ក្រសួងការពារជាតិកូរ៉េខាងត្បូងបញ្ជាក់ថា ជាមួយនឹងចាប់ផ្ដើមដោះមីននេះ យោធានៃកូរ៉េទាំងពីរនឹងប្រឹងប្រែងរួមគ្នាដើម្បីធានាថា កិច្ចព្រមព្រៀងយោធាថ្មីៗនេះ នឹងត្រូវអនុវត្តជាប្រព័ន្ធ និងតាមធម្មតា។ ការដោះមីននៅ JSA ដែលស្ថិតក្នុងតំបន់គ្នាយោធា នឹងធ្វើឡើងរយៈពេល២០ថ្ងៃ ហើយអំឡុងពេលនេះ កូរ៉េទាំងពីរ និងទីបញ្ជាការអង្គការសហប្រជាជាតិ (UNC) ដែលត្រួតពិនិត្យ JSA នឹងជជែកគ្នាពីបញ្ហាផ្សេងទាក់ទងការដោះមីននេះ។

ក្រៅពីការដោះមីន កូរ៉េទាំងពីរក៏ព្រមព្រៀងរុះរើប៉ុស្តិ៍យាម និងដកអាវុធចេញពី JSA ដែរ ខណៈទាហានដែលប្រចាំការនៅទីនោះ នឹងមិនត្រូវបានបំពាក់អាវុធឡើយ។ JSA ជាចំណុចមួយក្នុងព្រំដែនប្រវែង២៥០គីឡូម៉ែត្របែងចែកូរ៉េឧបទ្វីបកូរ៉េ ជាទីតែមួយគត់ដែលទាហានកូរ៉េទាំងពីរអាចប្រឈមមុខគ្នាបាន។ ទីនេះហើយដែលទាហានកូរ៉េខាងជើងម្នាក់រត់ភៀសខ្លួនចូលកូរ៉េខាងត្បូង ហើយត្រូវបានបាញ់ជាច្រើនគ្រាប់ មុនត្រូវបានទាហានកូរ៉េខាងត្បូងសង្គ្រោះ។

ក្រៅពីតំបន់ JSA កូរ៉េទាំងពីរក៏ដោះមីននៅជ្រលងក្នុងតំបន់ Cheorwon ក្នុងខេត្តហ្កាងវុនផងដែរ។ ក្រោយការដោះមីននេះដែលនឹងបន្តដល់ថ្ងៃទី៣០ ខែវិច្ឆិកា កូរ៉េទាំងពីរនឹងចាប់ផ្ដើមគាស់រកសាកសពទាហានសម័យសង្គ្រាមកូរ៉េបន្តទៀត។ ជ្រលងនេះជាសមរភូមិប្រយុទ្ធខ្លាំងក្លាអំឡុងពេលសង្គ្រាមត្រជាក់ ហើយគេជឿថា មានសាកសពទាហានចំនួន៥០០ ដែលក្នុងនោះមានទាហានក្រោមឆត្រអង្គការសហប្រជាជាតិ៣០០នាក់ផង។ នេះបើតាមទីភ្នាក់ងារព័ត៌មាន Yonhap ។

អ្នកជំនាញមីនអះអាងថា មីនច្រើនជាងមួយលានគ្រាប់ត្រូវបានកប់តាមបណ្ដោយព្រំដែនកូរ៉េខាងត្បូង និងខាងជើង រាប់ទាំងតំបន់គ្មានកងទ័ព និងតំបន់គ្រប់គ្រងដោយស៊ីវិលនៅភាគខាងត្បូងខ្សែព្រំដែនផង។ កន្លងមក ជនស៊ីវិល និងទាហានមួយចំនួនបានស្លាប់ និងរងរបួសដោយសារគ្រាប់មីននេះ។ ករណីគួរឲ្យកត់សម្គាល់ គឺក្នុងឆ្នាំ២០១៥ ដែលទាហានកូរ៉េខាងត្បូងពីរនាក់បានពិការដោយសារជាន់មីន តែកូរ៉េខាងជើងបានបដិសេធ៕