អន្តរជាតិ
អាមេរិកនិងកាណាដា សម្រេចកិច្ចព្រមព្រៀងពាណិជ្ជកម្មថ្មីជំនួស NAFTA រូបភាព AFP
× ទីបំផុតអាមេរិក និងកាណាដា បានឈានដល់កិច្ចព្រមព្រៀងមួយដើម្បីបង្កើតកិច្ចព្រមព្រៀងពាណិជ្ជកម្មនៅទ្វីបអាមេរិកខាងជើង ដែលនឹងបញ្ចូលម៉ិកស៊ិកផង។ កិច្ចព្រមព្រៀងថ្មីនេះ នឹងជំនួសកិច្ចព្រមព្រៀងចាស់ ដែលប្រធានាធិបតីអាមេរិក ដូណាល់ ត្រាំ គំរាមហែកចោល បន្ទាប់ពីត្រូវបានអនុវត្តតាំងពីឆ្នាំ១៩៩៤ មក។ ការចរចាអស់ពេលជាយូរ កាណាដា និងម៉ិកស៊ិកហាក់ធ្វើសម្បទានច្រើនទៅឲ្យអាមេរិកដើម្បីឲ្យកិច្ចព្រមព្រៀងថ្មីលេចជារូបរាងឡើង។
លាហើយកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) និងស្វាគមន៍កិច្ចព្រមព្រៀងអាមេរិក-កាណាដា-ម៉ិកស៊ិក (USMCA) ។ ក្រោយចរចាតានតឹងបំផុត អាមេរិក និងកាណាដា បានឯកភាពគ្នាលើកិច្ចព្រមព្រៀងពាណិជ្ជកម្មថ្មីមួយសម្រាប់អាមេរិកខាងជើង ដែលបានសង្គ្រោះតំបន់ផ្លាស់ប្ដូរទំនិញពាណិជ្ជកម្មទំហំ១.២ទ្រីលានដុល្លារ។ វាជាជោគជ័យដ៏ធំរបស់ប្រធានាធិបតីអាមេរិក ដូណាល់ ត្រាំ ដែលគំរាមលុបចោល NAFTA ។
កាលពីខែសីហា អាមេរិក និងម៉ិកស៊ិកបានឯកភាពរួចហើយលើកិច្ចព្រមព្រៀងនេះ តែមិនអាចស្វែងរកចំណុចរួមជាមួយកាណាដា។ តមកទៀត អាមេរិក និងកាណាដាក៏ចរចាគ្នាយ៉ាងតឹងតែងបំផុតរហូតដល់វិនាទីចុងក្រោយទៅហើយ។ ដោយសារប្រទេសទាំងបីព្រមព្រៀងគ្នាបែបនេះ កិច្ចព្រមព្រៀងថ្មីអាចត្រូវបានចុះហត្ថលេខានៅខែវិច្ឆិកាខាងមុខ ហើយអាមេរិកនឹងសុំការឯកភាពពីសភាសិន មុនចាប់ផ្ដើមកិច្ចព្រមព្រៀង USMCA ។
ក្នុងសេចក្ដីថ្លែងការណ៍រួមគ្នានៅថ្ងៃទី៣០ ខែកញ្ញា រដ្ឋមន្ត្រីការបរទេសកាណាដា Chrystia Freeland និងតំណាងពាណិជ្ជកម្មរបស់អាមេរិក Robert Lighthizer បានប្រកាសថា កិច្ចព្រមព្រៀងថ្មីនឹងបង្កើតទីផ្សារដែលកាន់តែសេរី ពាណិជ្ជកម្មដែលកាន់តែយុត្តិធម៌ និងកំណើនសេដ្ឋកិច្ចរស់រវើកនៅក្នុងតំបន់។ បើតាមទីភ្នាក់ងារព័ត៌មាន AFP នាយករដ្ឋមន្ត្រីកាណាដា ចាស្ទីន ទ្រូដូ ចាត់ទុកលទ្ធផលនេះ ជាថ្ងៃល្អសម្រាប់កាណាដា។
ទម្រាំសម្រេចបានកិច្ចព្រមព្រៀងថ្មីនេះ អាមេរិកទទួលបានប្រយោជន៍ច្រើន ខណៈកាណាដា និងម៉ិកស៊ិកបានលះបង់ច្រើនដូចគ្នា។ កិច្ចព្រមព្រៀងថ្មី នឹងរក្សាយន្តការដោះស្រាយជម្លោះដែលកាណាដាចង់បានសម្រាប់ការពារឧស្សាហកម្មឈើ និងវិស័យផ្សេងទៀតរបស់ខ្លួនពីនយោបាយពន្ធរបស់អាមេរិក។ កាណាដាក៏ត្រូវបើកទីផ្សារទំនិញប្រើប្រាស់ប្រចាំថ្ងៃសម្រាប់កសិករអាមេរិកចំនួន៣.៥ភាគរយនៃទីផ្សារក្នុងស្រុករបស់ខ្លួន។
កិច្ចព្រមព្រៀងនេះក៏តម្រូវឲ្យសម្ភាររថយន្តភាគច្រើនត្រូវផលិតនៅតំបន់អាមេរិកខាងជើង ដែលជាយុទ្ធសាស្ត្ររបស់អាមេរិកទាក់ទាញអ្នកផលិតឡានពីម៉ិកស៊ិក និងបង្កើតការងារនៅអាមេរិកវិញ ខណៈកាណាដា និងម៉ិកស៊ិកក៏ឯកភាពនាំចេញរថយន្តអ្នកដំណើរចំនួន២.៦លានគ្រឿងអាមេរិកទៅកាន់អាមេរិកផងដែរ។ យ៉ាងណាមិញ កិច្ចព្រមព្រៀងថ្មីនៅតែមិនអាចដោះស្រាយបញ្ហាសំខាន់ដដែល គឺការដំឡើងពន្ធរបស់អាមេរិកលើការនាំចេញអាលុយមីញ៉ូម និងដែកថែបរបស់កាណាដា៕
Tag:
អាមេរិក
កាណាដា
ម៉ិកស៊ិក
© រក្សាសិទ្ធិដោយ thmeythmey.com