មេដឹកនាំម៉ាសេដ្វាន ប្តេជ្ញាជំរុញការបោះឆ្នោតក្នុងសភាដើម្បីប្តូរឈ្មោះប្រទេស ក្រោយបរាជ័យក្នុងប្រជាមតិ

អន្តរជាតិ

មេដឹកនាំម៉ាសេដ្វាន ប្តេជ្ញាជំរុញការបោះឆ្នោតក្នុងសភាដើម្បីប្តូរឈ្មោះប្រទេស ក្រោយបរាជ័យក្នុងប្រជាមតិ

02, Oct 2018 , 8:39 am

រូបភាព

ដោយ: ថ្មីៗ

ប្រមុខរដ្ឋាភិបាលម៉ាសេដ្វានបានប្រកាសថា លោកនឹងព្យាយាមជំរុញឲ្យមានការបោះឆ្នោតក្នុងសភាដើម្បីអនុម័តប្តូរឈ្មោះប្រទេសទៅជា«ម៉ាសេដ្វានខាងជើង» តាមការព្រមព្រៀងជាមួយរដ្ឋាភិបាលក្រិក។ ការប្រកាសនេះធ្វើឡើង បន្ទាប់ពីប្រជាជនម៉ាសេដ្វានតិចជាង ៥០ភាគរយនាំគ្នាទៅបោះឆ្នោតក្នុងប្រជាមតិដែលវាធ្វើឲ្យលទ្ធផលនេះមិនបានការ។

ប្រជាមតិដើម្បីសម្រេចលើការប្តូរឈ្មោះប្រទេសម៉ាសេដ្វានទៅជា «ម៉ាសេដ្វានខាងជើង» ដែលរៀបចំកាលពីថ្ងៃអាទិត្យទី ៣០ ខែកញ្ញានោះមិនត្រូវបានគេចាត់ទុកថា បានការឡើយ ដោយសារអ្នកទៅចូលរួមមានត្រឹម៣៦ភាគរយប៉ុណ្ណោះ។

បើតាមការចុះផ្សាយរបស់ទីភ្នាក់ងារ ដោយសារបញ្ហានេះ នាយករដ្ឋមន្ត្រីក្រុងស្កុបជេ លោក សូរាន សាអេវ បានបញ្ជាក់ជាថ្មីថា លោកនឹងប្រឹងប្រែងជំរុញឲ្យសភាបោះឆ្នោតអនុម័តប្តូរឈ្មោះប្រទេសតាមការព្រមព្រៀងគ្នា។

លោក សាអេវ មិនបានលើកឡើងចំៗពីលទ្ធផលប្រជាមតិទេ ប៉ុន្តែលោកប្តេជ្ញាថា ការបោះឆ្នោតក្នុងសភានឹងត្រូវរៀបចំឡើងឆាប់ៗដើម្បីសម្រេចលើការវិសោធនកម្មរដ្ឋធម្មនុញ្ញដែលត្រួសត្រាយសម្រាប់ការប្តូរឈ្មោះប្រទេសនេះ។

យ៉ាងណាមិញ មិនមែនអ្នកនយោបាយទាំងអស់គាំទ្រការប្តូរឈ្មោះប្រទេសដែលជាចំណុចស្ថិតក្នុងកិច្ចព្រមព្រៀងរវាងម៉ាសេដ្វា និងក្រិកឡើយ។ ចំណែកសមាជិកសភាម៉ាសេដ្វានបានបញ្ជាក់ថា ខ្លួននឹងគោរពឆន្ទៈប្រជាជនក្នុងការបោះឆ្នោតប្រជាមតិនេះដែរ ដែលវាមានន័យថា ក្រុមប្រឆាំងអាចមានលទ្ធភាពក្នុងការបោះឆ្នោតប្រឆាំងនឹងកិច្ចព្រមព្រៀងនេះ។

បច្ចុប្បន្ន សភាម៉ាសេដ្វានមានអាសនៈសរុប ១២០ ហើយក្រុមប្រឆាំងដែលជាអ្នកជាតិនិយមកាន់កាប់អាសនៈ ៤៩ឯណោះ។ ពួកគេអាចមានលទ្ធភាពក្នុងការទប់ស្កាត់ការបោះឆ្នោតអនុម័តក្នុងសំឡេងពីរភាគបីដែលត្រូវការសម្រេចវិសោធនកម្មរដ្ឋធម្មនុញ្ញ។

តាមពិតទៅ កិច្ចព្រមព្រៀងបឋមដែលបានឯកភាពគ្នារវាងរដ្ឋាភិបាលក្រិក និងម៉ាសេដ្វានកាលពីខែមិថុនាកន្លងមកនេះមានគោលដៅ ប្តូរឈ្មោះរដ្ឋបាល់កង់ និងជាអតីតសាធារណរដ្ឋយូហ្គោស្លាវីម៉ាសេដ្វានទៅជា «សាធារណរដ្ឋម៉ាសេដ្វានខាងជើង» (Republic of North Macedonia) វិញ។ បើសិនជាសមាម៉ាសេដ្វានព្រមផ្តល់សច្ចាប័នលើកិច្ចព្រមព្រៀងព្រមប្តូរឈ្មោះនេះ វាក៏នឹងអនុញ្ញាតឲ្យរដ្ឋម៉ាសេដ្វាននេះក្លាយជាសមាជិកបក្សសម្ព័ន្ធយោធាណាតូ និងសហភាពអឺរ៉ុបដូចគ្នាដែរ។

ម៉ាសេដ្វានប្រកាសឯករាជ្យពីយូហ្គោស្លាវីនៅឆ្នាំ ១៩៩១ ហើយចាប់ពីពេលនោះមកប្រទេសយ៉ាងតិចណាស់ ១៣០លើពិភពលោករួមទាំងអាមេរិក រុស្ស៊ី និងមហាអំណាចផ្សេងទៀតផងនោះទទួលស្គាល់ឈ្មោះ «អតីតសាធារណរដ្ឋយូហ្គោស្លាវី នៃម៉ាសេដ្វាន»។

ជម្លោះរឿងឈ្មោះជាមួយក្រិកនេះ កើតឡើងដោយសារក្រិកមានខេត្តមួយដែលឈ្មោះ ម៉ាសេដ្វានដែរ (Greek Macedonia) ដែលជាទឹកដីមានវប្បធម៌ អរិយធម៌ ភាសានិងទំនៀមទម្លាប់ពីយូរលង់ណាស់មកហើយ។ អ្វីដែលសំខាន់វាជាទឹកដីកំណើតរបស់ស្តេច អាឡិចហ្សាន់ឌ័រ ដឹកហ្ក្រេត (Alexander The Great) ផងដែរ។ ប្រជាជនក្រិកជានិច្ចជាកាលបានចោទប្រកាន់ថា ម៉ាសេដ្វាន ដែលសម្រេចយកឈ្មោះដូចគ្នានឹងខេត្តខ្លួននោះមានចេតនាមិនល្អឡើយ។

ក្នុងឆ្នាំ ១៩៩៤ បន្ទាប់ពីមានការប្រឈមមុខដាក់គ្នាខ្លាំង រដ្ឋាភិបាលក្រុងអាថែន បានសម្រេចដាក់ការហ៊ុមព័ទ្ធពាណិជ្ជកម្មប្រឆាំងក្រុងស្កុបជេ និងប្រកាសថា គោលនយោបាយរបស់រដ្ឋស្លាវ (Slavic State) មួយនេះកំពុងបង្កើតគ្រោះថ្នាក់ធំដល់ប្រទេសក្រិកផង។ ចាប់ពីពេលនោះមកប្រទេសជិតខាងទាំងពីរមើលមុខគ្នាមិនចំឡើយដោយសារតែឈ្មោះនេះ ហើយក្រិកតែងជំទាស់ការចរចាចូលជាសមាជិកបក្សសម្ព័ន្ធណាតូ និងសហភាពអឺរ៉ុបរបស់ម៉ាសេដ្វានជានិច្ច៕