អន្តរជាតិ
ស៊ី ជិនភីង ប្រាប់មេដឹកនាំម៉ាល់ឌីវថ្មីថា ចិនចង់ពង្រឹងកិច្ចសហប្រតិបត្តិការជាមួយម៉ាល់ឌីវ
× ក្នុងសារអបអរសាទរទៅកាន់ប្រធានាធិបតីម៉ាល់ឌីវថ្មី នៅថ្ងៃទី ០៩ កញ្ញា ប្រធានាធិបតីចិន លោក ស៊ី ជិនភីង បាននិយាយថា ចិនចង់ពង្រឹងកិច្ចសហប្រតិបត្តិការជាមួយម៉ាល់ឌីវ។ ការលើកឡើងរបស់មេដឹកនាំចិនរូបនេះធ្វើឡើង ក្រោយពីមេដឹកនាំបក្សប្រឆាំងដែលទើបតែជាប់ឆ្នោតនេះ បានប្ដេជ្ញាសើរើគម្រោងហេដ្ឋារចនាសម្ព័ន្ធមួយចំនួនរបស់ចិន។
នៅមុនពេលបោះឆ្នោត មេដឹកនាំសម្ព័ន្ធបក្សប្រឆាំង លោក Ibrahim Mohamed Solih ដែលជាទើបតែឡើងកាន់តំណែងជាប្រធានាធិបតីម៉ាល់ឌីវថ្មី បាននិយាយថា ខ្លួននឹងសើរើការវិនិយោគរបស់ចិនក្នុងគំនិតផ្ដួចផ្ដើមហេដ្ឋារចនាសម្ព័ន្ធ «វិថី និងខ្សែក្រវាត់ ( Belt and Road initiative) » ដែលលោកស៊ីបានដាក់ចេញកាលពីឆ្នាំ២០១៣។ ការប្រកាសសើរើនេះគឺធ្វើឡើង ក្រោយពីអ្នកជំនាញមួយចំនួនបានព្រមានថា រដ្ឋក្នុងមហាសមុទ្រឥណ្ឌានេះអាចធ្លាក់ចូលក្នុងអន្ទាក់បំណុលរបស់ក្រុងប៉េកាំង។
បើតាមទីភ្នាក់ងារព័ត៌មាន Xinhua លោកស៊ី ជិនភីង បានប្រាប់លោក Solih ថា ចិន និងម៉ាល់ឌីវបានចែករំលែកចំណងមិត្តភាពដ៏យូរអង្វែងជាមួយគ្នា។ លោកនិយាយដូច្នេះថា៖«ចិនមានឆន្ទៈធ្វើការជាមួយម៉ាល់ឌីវដើម្បីបន្តពង្រឹងចំណងមិត្តភាព និងកិច្ចសហប្រតិបត្តិការក្នុងផ្នែកសំខាន់ៗ ក្នុងគោលបំណងផ្តល់ផលប្រយោជន៍ដល់ប្រជាពលរដ្ឋនៃប្រទេសទាំងពីរ»។
អគ្គលេខាធិការនៃបក្សកុម្មុយនិស្តចិនរូបនេះ បានឲ្យតម្លៃការអភិវឌ្ឍនៃទំនាក់ទំនងរវាងប្រទេសទាំងពីរ និងបង្ហាញឆន្ទៈចូលរួមជាមួយមេដឹកនាំម៉ាល់ឌីវថ្មីដើម្បីដំឡើងភាពជាដៃនៃកិច្ចសហប្រតិបត្តិការគ្រប់ជ្រុងជ្រោយរវាងចិន និងម៉ាល់ឌីវ ឲ្យដល់កម្រិតថ្មីមួយទៀត។
គួររម្លឹកថា ចាប់ពីឆ្នាំ ២០១៣មក ទំនាក់ទំនងចិន និងម៉ាល់ឌីវកាន់តែជិតស្និទ្ធគ្នា ក្រោមអាណត្តិរបស់ប្រធានាធិបតីចាញ់ឆ្នោត Abdulla Yameen ដែលបានយកចិនជាខ្នងបង្អែកដើម្បីអភិវឌ្ឍគម្រោងហេដ្ឋារចនាសម្ព័ន្ធនៅក្នុងប្រទេសខ្លួន៕
Tag:
ចិន
ម៉ាល់ឌីវ
BRI
© រក្សាសិទ្ធិដោយ thmeythmey.com