អន្តរជាតិ
រុស្ស៊ីរិះគន់ម៉ាសេដ្វានដែលចង់ប្ដូរឈ្មោះប្រទេស ខណៈអឺរ៉ុបជំរុញប្ដូរឲ្យបានលឿន ប្រធានាធិបតីរុស្ស៊ី Vladimir Putin និងសមភាគីម៉ាសេដ្វាន Gjorge Ivanov (រូបភាព AFP)
× ប្រជាមតិនៅម៉ាសេដ្វានថ្ងៃទី៣០ ខែកញ្ញាដើម្បីសម្រេចលើការប្តូរឈ្មោះប្រទេសទៅជា «ម៉ាសេដ្វានខាងជើង» មិនត្រូវបានចាត់ទុកថា បានការឡើយ ព្រោះអ្នកទៅចូលរួមមានត្រឹម៣៦ភាគរយប៉ុណ្ណោះ។ ប៉ុន្តែរដ្ឋាភិបាលក្រុងស្កុបជេនឹងប្រឹងប្រែងរុញសភាឲ្យអនុម័តការប្ដូរឈ្មោះនេះ ខណៈអឺរ៉ុបចង់ឲ្យម៉ាសេដ្វានពន្លឿននីតិវិធីដែរដើម្បីចាប់ផ្ដើមដំណើរការសមាជិកភាពសហភាពអឺរ៉ុប។ ក្រុងមូស្គូ នៅថ្ងៃទី១ ខែតុលា បានរិះគន់ការបោះឆ្នោតប្ដូរឈ្មោះប្រទេសដែលខ្លួនហៅថា ជាការបង្ខិតបង្ខំ។
អ្នកចូលរួមត្រឹម៣៦ភាគរយ ធ្វើឲ្យប្រជាមតិប្ដូរឈ្មោះនៅម៉ាសេដ្វាន មិនបានការ។ នេះជាការសេចក្ដីថ្លែងការណ៍របស់ក្រសួងការបរទេសរុស្ស៊ីនៅថ្ងៃទី១ ខែតុលា មួយថ្ងៃបន្ទាប់ពីប្រជាមតិត្រូវបានរៀបចំ។ ក្រសួងការបរទេសរុស្ស៊ីបន្តថា កង្វះការចាប់អារម្មណ៍ពីសំណាក់ប្រជាជនម៉ាសេដ្វានចំពោះប្រជាមតិប្ដូរឈ្មោះនេះ មានន័យថា ប្រជាជនម៉ាសេដ្វានបានពហិការការសម្រេចចិត្តដោយបង្ខំរបស់រដ្ឋាភិបាល។
តាមពិតទៅ អ្នកចូលរួមប្រជាមតិស្ទើរមួយរយភាគរយទៅហើយដែលគាំទ្រការផ្លាស់ប្ដូរឈ្មោះទៅជា «សាធារណរដ្ឋម៉ាសេដ្វានខាងជើង» ប៉ុន្តែចំនួនអ្នកចូលរួមត្រឹម៣៦ភាគរយ ធ្វើឲ្យលទ្ធផលប្រជាមតិនេះមិនអាចយកជាការបាន ទោះជាវាមិនមានចំណងផ្លូវច្បាប់ក្ដី។ បើតាមទីភ្នាក់ងារព័ត៌មាន AFP ក្រុងមូស្គូអះអាងថា ចំនួនតិចតួចបែបនេះ មិនអាចធ្វើឲ្យប្រជាមតិជោគជ័យឡើយ ហើយជាការទាត់ចោលលទ្ធផលចរចារវាងក្រុងស្កុបជេ និងក្រុងអាថែន។
អ្វីគួរឲ្យចាប់អារម្មណ៍នោះ ក្រុងមូស្គូក៏រិះគន់អឺរ៉ុបដែលចង់ឃើញការផ្លាស់ប្ដូរឈ្មោះរបស់ម៉ាសេដ្វាន។ សេចក្ដីថ្លែងការណ៍របស់ក្រសួងការបរទេសរុស្ស៊ីលើកឡើងថា អ្នកនយោបាយនៅអឺរ៉ុបបានចូលរួមក្នុងយុទ្ធនាការឃោសនា និងលូកលាន់ក្នុងកិច្ចការផ្ទៃក្នុងរបស់ប្រទេសបាល់កង់មួយនេះដោយគ្មានការអៀនខ្មាស់អ្វីសោះ។ នេះក៏ព្រោះតែការផ្លាស់ប្ដូរឈ្មោះនេះ នឹងបើកផ្លូវឲ្យរដ្ឋមួយនេះក្លាយជាសមាជិកបក្សសម្ព័ន្ធយោធាណាតូ និងសហភាពអឺរ៉ុបដូចគ្នាដែរ។
ដោយសារបរាជ័យនៅប្រជាមតិ លោកនាយករដ្ឋមន្ត្រី សូរាន សាអេវ បានបញ្ជាក់ជាថ្មីថា លោកនឹងប្រឹងប្រែងជំរុញឲ្យសភាបោះឆ្នោតអនុម័តប្តូរឈ្មោះប្រទេសតាមការព្រមព្រៀងជាមួយក្រិក។ លោក សាអេវ ប្តេជ្ញាថា ការបោះឆ្នោតក្នុងសភានឹងត្រូវរៀបចំឡើងឆាប់ៗដើម្បីសម្រេចលើការវិសោធនកម្មរដ្ឋធម្មនុញ្ញដែលត្រួសត្រាយសម្រាប់ការប្តូរឈ្មោះប្រទេស។ ប៉ុន្តែលោកត្រូវជម្នះសមាជិកសភាបក្សប្រឆាំងដែលប្រកាសគាំទ្រលទ្ធផលប្រជាមតិ។
សូមរំឭកថា ម៉ាសេដ្វានប្រកាសឯករាជ្យពីយូហ្គោស្លាវីនៅឆ្នាំ ១៩៩១ ហើយចាប់ពីពេលនោះមកប្រទេសយ៉ាងតិចណាស់ ១៣០លើនោះទទួលស្គាល់ឈ្មោះ «អតីតសាធារណរដ្ឋយូហ្គោស្លាវី នៃម៉ាសេដ្វាន»។ ឈ្មោះនេះ ក៏នាំឲ្យមានជម្លោះជាមួយក្រិក ដែលមានខេត្តមួយឈ្មោះដូចគ្នានេះដែរ។ ប្រជាជនក្រិកជានិច្ចជាកាលបានចោទប្រកាន់ ម៉ាសេដ្វានដែលសម្រេចយកឈ្មោះដូចគ្នានឹងខេត្តខ្លួននោះ ថា មានចេតនាមិនល្អឡើយ៕
Tag:
រុស្ស៊ី
អឺរ៉ុប
ម៉ាសេដ្វាន
© រក្សាសិទ្ធិដោយ thmeythmey.com