កីឡាជាតិ
ជាតិ
វាយសីរំពឹងអាចយកឈ្នះប្រទេសមួយចំនួននៅព្រឹត្តិការណ៍យុវជនអូឡាំពិក កីឡាករ វ៉ាត វ៉ាន់ធុន (អាវខៀវ)ប្រកួតសមក្នុងអំឡុងពេលហ្វឹកហាត់នៅទីលានវាយសីក្នុងពហុកីឡដ្ឋានជាតិ
× សហព័ន្ធកីឡាវាយសីកម្ពុជា នឹងបញ្ជូនកីឡាករ វ៉ាត វ៉ាន់ធុន ទៅចូលរួមប្រកួតកីឡាយុវជនអូឡាំពិក(Youth Olympic)នៅទីក្រុងប៊ុយណូស៊ែប្រទេសអាហ្សង់ទីន នៅចុងសប្តាហ៍នេះ។ ទោះបីមិនរំពឹងអាចដណ្តើមបានមេដាយ តែទាំងកីឡាករនិងថ្នាក់ដឹកនាំ សុទ្ធតែរំពឹងអាចយកឈ្នះប្រទេសមួយចំនួន សម្រាប់ការចូលរួមដោយសិទ្ធិអនុគ្រោះមួយនេះ។
លោក ជាម សុភា អគ្គលេខាធិការស្តីទីនៃសហព័ន្ធកីឡាវាយសីកម្ពុជា ហាក់ជឿជាក់ថា កីឡាករ វ៉ាត វ៉ាន់ធុន នឹងអាចយកឈ្នះប្រទេសមួយចំនួន សម្រាប់ការប្រកួតកីឡាយុវជនអូឡាំពិក ដែលរៀបចំនៅទីក្រុងប៊ុយណូស៊ែប្រទេសអាហ្សង់ទីន ចន្លោះពីថ្ងៃទី៦-១៨ ខែតុលា ឆ្នាំ២០១៨។ តែ លោក មិនហ៊ានដាក់ក្តីរំពឹងឈានដល់ដណ្តើមបានមេដាយឡើយ។ យុវជនថ្នាល វ៉ាត វ៉ាន់ធុន ជាកីឡាករតែម្នាក់គត់ ដែលត្រូវបានសហព័ន្ធបញ្ជូនឲ្យចូលរួមព្រឹត្តិការណ៍នេះ បន្ទាប់ពីសហព័ន្ធនេះ ទទួលបានសិទ្ធិអនុគ្រោះជាលើកដំបូងពីគណៈកម្មាធិការអូឡាំពិកអន្តរជាតិ។
នេះមិនមែនជាបទពិសោធលើឆាកអន្តរជាតិលើកទី១នោះទេ សម្រាប់កីឡាករវ័យក្មេងរូបនេះ ពោលគឺរូបគេធ្លាប់ចូលរួមប្រកួតកម្រិតអន្តរជាតិ៣លើករួចមកហើយ។ តែរូបគេមិនធ្លាប់ទទួលបានមេដាយណាមួយពីការចូលរួមនេះឡើយ។ «ការប្រកួតយុវជនអូឡាំពិកនេះ ជាបទពិសោធថ្មីសម្រាប់គេ។ វ៉ាន់ធុន ជាកីឡាករថ្នាលល្អជាងគេ ក្នុងចំណោមថ្នាលទាំង១០នាក់របស់យើង ខ្ញុំរំពឹងថា គេនឹងអាចយកឈ្នះបានប្រទេសខ្លះ ដើម្បីជាកិត្តិយសរបស់ប្រទេសជាតិយើង»។ ការលើកឡើងបែបនេះរបស់ ជាម សុភា ធ្វើឡើងក្នុងពិធីទទួលសម្ភារនិងថវិកាមួយចំនួនពីក្រុមហ៊ុនប៉ូការីស្វេត កាលពីថ្ងៃទី២៦ ខែកញ្ញា ឆ្នាំ២០១៨ នៅទីលានវាយសីក្នុងពហុកីឡដ្ឋានជាតិ។
ជាមួយគ្នានេះ កីឡាករ វ៉ាត វ៉ាន់ធុន បានប្តេជ្ញាថា រូបគេនឹងប្រឹងប្រែងឲ្យអស់ពីសមត្ថភាពក្នុងការស្វែងរកលទ្ធផលល្អមួយ ដែលអាចទទួលយកបាន។ កីឡាករមកពីខេត្តកំពង់ឆ្នាំងរូបនេះអះអាងថា៖«ខ្ញុំនឹងប្រឹងប្រែងប្រកួតឲ្យអស់ពីសមត្ថភាព ហើយបើសិនជាប៉ះកីឡាករមកពីប្រទេស ដែលមានសមត្ថភាពប្រហាក់ប្រហែលគ្នា ខ្ញុំសង្ឃឹមថា ខ្ញុំអាចឈានដល់វគ្គ១/៨ ឬវគ្គ១/៤»។
កីឡាករ វ៉ាត វ៉ាន់ធុន ជាកីឡាករម្នាក់ ក្នុងចំណោមអត្តពលិកកម្ពុជា២រូបទៀត រួមមានកីឡាការិនីចំបាប់ ស៊ឹម សុភាឡៃ និងកីឡាការិនីហែលទឹក ពៅពេជ្រចរ៉ា ប៊ុណ្ណា ដែលត្រូវបានគណៈកម្មាធិការអូឡាំពិកអន្តរជាតិ(IOC) និងសហព័ន្ធកីឡាអន្តរជាតិផ្តល់សិទ្ធិអនុគ្រោះឲ្យទៅចូលរួមការប្រកួតកីឡាយុវជនអូឡាំពិក នៅអាហ្សង់ទីនលើកនេះ៕
Tag:
កីឡាវាយសី
ជាម សុភា
វ៉ាត វ៉ាន់ធុន
Youth Olympic
© រក្សាសិទ្ធិដោយ thmeythmey.com