ក្រុងប៉េកាំងក្តៅស្លឹកត្រចៀក ដោយសារនាវាចម្បាំងអាមេរិកហ៊ានទៅកៀកសមុទ្រចិនខាងត្បូង

អន្តរជាតិ

ក្រុងប៉េកាំងក្តៅស្លឹកត្រចៀក ដោយសារនាវាចម្បាំងអាមេរិកហ៊ានទៅកៀកសមុទ្រចិនខាងត្បូង

02, Oct 2018 , 10:19 pm

រូបភាព

ដោយ:

នៅថ្ងៃទី០១ ខែតុលា ក្រុងប៉េកាំង បានបង្ហាញការខឹងសម្បាខ្លាំង ក្រោយនាវាពិឃាដអាមេរិកមួយគ្រឿងបានចូលទៅកៀកដែនទឹកដែលខ្លួនទាមទារក្នុងសមុទ្រចិនខាងត្បូង។ លើសពីនេះរដ្ឋាភិបាលចិនបានអះអាងថា ខ្លួនប្រឆាំងដាច់ខាតរាល់ប្រតិបត្តិការទាំងឡាយណា ដែលខ្លួនចាត់ទុកជាការគំរាមកំហែងដល់សន្តិសុខ និងអធិបតេយ្យភាពរបស់ខ្លួនដែរ។

មន្ត្រីអាមេរិកម្នាក់ដែលសុំមិនបញ្ចេញឈ្មោះបាននិយាយថា នាវាពិឃាដ USS Decatur មួយគ្រឿងបានធ្វើដំណើរចម្ងាយត្រឹមតែ ២២ គីឡូម៉ែត្រប៉ុណ្ណោះពីតំបន់ថ្មប៉ប្រះទឹក Johnson និងGaven ក្នុងប្រជុំកោះ Spratly កាលពីថ្ងៃទី ៣០ ខែកញ្ញា។ នេះបើតាមទីភ្នាក់ងារព័ត៌មាន Reuters។

គេមើលឃើញថា ប្រតិបត្តិការថ្មីនេះគឺជាកិច្ចខិតខំចុងក្រោយបង្អស់របស់រដ្ឋបាលលោកដូណាល់ ត្រាំ សម្រាប់ទប់ទល់នឹងការរឹតត្បិតរបស់ក្រុងប៉េកាំងទាក់ទិននឹង «សេរីភាពនៃការធ្វើនាវាចរណ៍» ក្នុងដែនសមុទ្រយុទ្ធសាស្ត្រនេះ ទីដែលនាវាចម្បាំងរបស់ចិន ជប៉ុន និងបណ្ដារដ្ឋអាស៊ានមួយចំនួនអាចបើកប្រតិបត្តិការបានដោយសេរី។

ដើម្បីឆ្លើយតបនឹងសកម្មភាពនេះ ក្រសួងការពារជាតិចិនបានសម្រេចបញ្ជូននាវាចម្បាំងមួយគ្រឿងទៅស្វាគមន៍ និងព្រមានអាមេរិកឲ្យដកនាវាពិឃាដរបស់ខ្លួនចេញ ពីដែនទឹកនោះ។ លើសពីនេះក្រសួងបានបញ្ជាក់ទៀតថា ចិនពុំអាចប្រកែកបានទេក្នុងការទាមទារកាន់កាប់ដែនអធិបតេយ្យ ក្នុងសមុទ្រចិនខាងត្បូង ព្រមទាំងដែនទឹកនៅជុំវិញនោះ។ បច្ចុប្បន្នស្ថានភាពនៅទីនោះកំពុងដំណើរការទៅយ៉ាងល្អ អរគុណដល់កិច្ចខិតខំប្រឹងប្រែងរបស់ចិន និងបណ្តាប្រទេសក្នុងតំបន់អាស៊ីអាគ្នេយ៍។

«ប៉ុន្តែភាគីអាមេរិកចេះតែបន្តបញ្ជូននាវាយោធារបស់ខ្លួនចូលទៅកៀកសមុទ្រចិនខាងត្បូង ដោយគ្មានការអនុញ្ញាត។ ក្រុងប៉េកាំងចាត់ទុកសកម្មភាពនេះ ជាការបង្កការគំរាមកំហែងយ៉ាងធ្ងន់ធ្ងរដល់សន្តិសុខ និងអធិបតេយ្យភាពរបស់ខ្លួន។ ហើយវាក៏បំផ្លាញដល់ចំណងយោធារវាងចិននិ ងអាមេរិក ព្រមទាំងប៉ះពាល់ដល់ស្ថិរភាព និងសន្តិភាពតំបន់ផងដែរ។ ម្យ៉ាងវិញទៀតយោធាចិនប្ដេជ្ញាប្រឆាំងដាច់ខាតរាល់សកម្មភាពទាំងនេះ»។ នេះបើតាមការបញ្ជាក់របស់ក្រសួងការពារជាតិចិន។ ជាមួយគ្នានេះកងកម្លាំងចិននឹងបន្តប្រើប្រាស់ចំណាត់ការចាំបាច់គ្រប់បែបយ៉ាង ដើម្បីការពារសន្តិសុខ និងអធិបតេយ្យភាពរបស់ខ្លួន។

ចំណែកក្រសួងការបរទេសចិន បានបញ្ជាក់ក្នុងសេចក្ដីថ្លែងការណ៍ដាច់ដោយឡែកមួយថា ខ្លួនទទូចឲ្យក្រុងវ៉ាស៊ីនតោនបញ្ឈប់រាល់សកម្មភាពបង្កជម្លោះដូច្នេះ និងកែប្រែកំហុសរបស់ខ្លួនភ្លាមៗផងដែរ។

បើពិតទៅ ក្រុងប៉េកាំង និងក្រុងវ៉ាស៊ីនតោនកំពុងជាប់គាំងក្នុងជម្លោះពាណិជ្ជកម្ម ដែលភាគីទាំងពីរបានបង្កើនការវាយបកទៅវិញទៅមក ជុំវិញការដំឡើងពន្ធនាំចូលលើទំនិញនៃប្រទេសទាំងពីរ។ ហើយប្រតិបត្តិការនេះដែរក៏បានកើតឡើង ស្របពេលដែលចំណងយោធារវាងប្រទេសទាំងពីរកំពុងធ្លាក់ចុះយ៉ាងខ្លាំងដោយសារតែចិនបានខឹងសម្បា ក្រោយអាមេរិកបានសម្រេចដាក់ទណ្ឌកម្មលើយោធាចិន ជុំវិញការទិញសព្វាវុធពីរុស្ស៊ី និងទទួលស្គាល់កោះតៃវ៉ា់ន់ ដែលចិនចាត់ទុកជាខេត្តរបស់ខ្លួន។

យ៉ាងណាមិញ រដ្ឋមន្ត្រីការពារជាតិអាមេរិក លោក ជេម ម៉ាធីស ( Jim Mattis) នៅថ្ងៃទី០១ តុលាបាននិយាយថា លោកមិនមើលឃើញថាទំនាក់ទំនងរវាងសហរដ្ឋអាមេរិកនិងចិនកាន់តែអាក្រក់នោះទេ។ ជាក់ស្ដែងការបញ្ជាក់របស់លោកគឺធ្វើឡើងក្រោយពីទស្សនកិច្ចរបស់លោកទៅកាន់ប្រទេសចិន ត្រូវបានលុបចោល។

ទីភ្នាក់ងារ Reuters បានចុះផ្សាយនៅថ្ងៃទី ៣០ ខែកញ្ញាថា ចិនបានសម្រេចលុបចោលកិច្ចពិភាក្សាយោធាមួយជាមួយលោក ម៉ាធីស ដែលគ្រោងនឹងធ្វើឡើងនៅខែតុលានេះ។ ជុំវិញរឿងលុបចោលកិច្ចប្រជុំជាមួយប្រមុខការពារអាមេរិកនេះ រដ្ឋាភិបាលចិនពុំទាន់ចេញមុខបកស្រាយនៅឡើយទេ។ ទន្ទឹមនឹងនេះរដ្ឋមន្ត្រីការពារជាតិចិន Wei Fenghe គ្រោងនឹងធ្វើដំណើរទៅកាន់សហរដ្ឋអាមេរិកនាចុងឆ្នាំ២០១៨នេះ ប៉ុន្តែកាលពីសប្តាហ៍មុនក្រសួងការពារជាតិចិនបានប្រកាសថា ទស្សនកិច្ចនេះនឹងមិនអាចកើតឡើងនោះឡើយ៕