ឥណ្ឌានឹងចុះហត្ថលេខាលើកិច្ចព្រមព្រៀងទិញប្រព័ន្ធខែលមីស៊ីល S-400 ជាមួយរុស្ស៊ី អំឡុងជំនួបប្រចាំឆ្នាំរវាងនាយករដ្ឋមន្ត្រីឥណ្ឌា នារិន្ទ្រា ម៉ូឌី (Narendra Modi) និងប្រធានាធិបតីរុស្ស៊ី វ្ល៉ាឌីមៀ ពូទីន ក្នុងសប្ដាហ៍នេះ។ ជុំវិញការបញ្ជាទិញអាវុធនេះ រដ្ឋាភិបាលក្រុងញូវដេលីសង្ឃឹមថា ខ្លួនអាចនឹងគេចផុតពីការដាក់ទណ្ឌកម្មរបស់ក្រុងវ៉ាស៊ីនតោន។
គណៈកម្មាធិការនៃគណៈរដ្ឋមន្ត្រីទទួលបន្ទុកផ្នែកសន្តិសុខជាតិឥណ្ឌា (CCS) ដែលដឹកនាំដោយនាយករដ្ឋមន្ត្រី ម៉ូឌី កាលពីខែ ២៦ កញ្ញាកន្លងទៅ បានបញ្ជាក់យ៉ាងច្បាស់ពីជំហររបស់ខ្លួនក្នុងការបញ្ជាទិញប្រព័ន្ធការពារមីស៊ីល S-400 ចំនួន ៥គ្រឿង ពីរុស្ស៊ី។
យោងតាមសារព័ត៌មាន The Times of India រុស្ស៊ីនិងឥណ្ឌានឹងចុះហត្ថលេខាលើកិច្ចព្រមព្រៀងបញ្ជូនប្រព័ន្ធមីស៊ីល ដែលមានតម្លៃ ៥ពាន់លានដុល្លារ អំឡុងជំនួបកំពូលមួយរវាងមេដឹកនាំនៃប្រទេសទាំងពីរ ដែលនឹងប្រព្រឹត្តទៅនាថ្ងៃទី០៥ ខែតុលានេះ។
ក្រុងញូវដេលីធ្លាប់បាននិយាយថា ខ្លួននៅបន្តគម្រោងបញ្ជាទិញមីស៊ីល S-400 របស់រុស្ស៊ី បើទោះបីអាមេរិកព្រមានដាក់ទណ្ឌកម្មប្រឆាំងនឹងប្រទេសណា ដែលហ៊ានទិញអាវុធពីរុស្ស៊ីក្តី។ ឥណ្ឌាបានបង្ហាញអាមេរិកអំពីជំហររបស់ខ្លួន ក្នុងការសម្រេចបញ្ជាទិញប្រព័ន្ធមីស៊ីល S-400 និងបានស្នើសុំការអនុគ្រោះពីប្រធានាធិបតីអាមេរិក ជុំវិញការអនុវត្តច្បាប់ប្រឆាំងសត្រូវអាមេរិកតាមរយៈការដាក់ទណ្ឌកម្ម (CAATSA)។ ប៉ុន្តែក្រុងវ៉ាស៊ីនតោនបានបញ្ជាក់ថាខ្លួនមិនអាចធានាបានទេថា ឥណ្ឌានឹងអាចរួចពីការដាក់ទណ្ឌកម្មនោះ។
«សហរដ្ឋអាមេរិកមិនអាចធានាបានទេថា ឥណ្ឌាអាចគេចផុតពីការដាក់ទណ្ឌកម្ម ប្រសិនបើខ្លួនបញ្ជាទិញអាវុធ និងប្រព័ន្ធការពារពីរុស្ស៊ីនោះ»។ នេះជាការបញ្ជាក់របស់លោក Randall Schrive មន្ត្រីជាន់ខ្ពស់នៃមន្ទីរបញ្ចកោណអាមេរិកទទួកបន្ទុកតំបន់អាស៊ី កាលពីចុងខែសីហាកន្លងទៅ។
បើពិតទៅសហរដ្ឋអាមេរិកកាលពីឆ្នាំ២០១៧ បានអនុម័តច្បាប់ CAATSA ដើម្បីដាក់ទណ្ឌកម្មប្រឆាំងនឹងរុស្ស៊ី ដោយសារតែវិមានក្រេមឡាំងបានលេបត្របាក់តំបន់គ្រីមៀ (Crimea) ពីអ៊ុយក្រែនក្នុងឆ្នាំ២០១៤ និងបានលូកលាន់ការបោះឆ្នោតអាមេរិក កាលពីឆ្នាំ២០១៦ផង។ ក្រោមច្បាប់នេះ បណ្ដាប្រទេសណាដែលមានទំនាក់ទំនងក្នុងវិស័យការពារជាតិ និងចែករំលែកព័ត៌មានចារកម្មជាមួយរុស្ស៊ី អាចនឹងទទួលរងទណ្ឌកម្មនេះផងដែរ។ ជាក់ស្តែងរដ្ឋបាលអាមេរិកកាលពីចុងខែកញ្ញា បានសម្រេចប្រើប្រាស់ច្បាប់ CAATSA ដើម្បីដាក់ទណ្ឌកម្មលើយោធាចិន ដែលបានទិញមីស៊ីល និងនាវាចម្បាំងពីរុស្ស៊ី។
ឥណ្ឌាមិនមែនជាប្រទេសតែមួយដែលចង់បានប្រព័ន្ធការពារអាកាសពីរុស្ស៊ី
ខែលមីស៊ីល S-400 របស់រុស្ស៊ី ជាប្រព័ន្ធការពារអាកាសទំនើបបំផុតក្នុងលោក ដែលអាចបើកប្រតិបត្តិការក្នុងចម្ងាយ ៤០០គីឡូម៉ែត្រ និងបាញ់ចំគោលដៅក្នុងរយៈកម្ពស់អតិបរមា៣០គីឡូម៉ែត្រ។
ឥណ្ឌាមិនមែនជាប្រទេសតែមួយដែលចង់ទិញប្រព័ន្ធនេះពីរុស្ស៊ីឡើយ។ បណ្តាប្រទេសផ្សេងទៀតរួមមាន ចិន តួកគី អារ៉ាប៊ីសាអ៊ូឌីត និងកាតា បានសម្រេចទិញ ឬគ្រោងទិញប្រព័ន្ធខែលS-400 នេះ ផងដែរ។
មន្ត្រីនិងអ្នកនយោបាយអាមេរិកបានបង្ហាញកង្វល់ជុំវិញជំហររបស់តួកគីក្នុងការបញ្ជាទិញប្រព័ន្ធមីស៊ីលពីរុស្ស៊ី។ ចំណែក អារ៉ាប៊ីសាអ៊ូឌីតកាលពីខែមិថុនា បាននិយាយថាខ្លូននឹងពិចារណាប្រើប្រាស់វិធានការចំបាច់គ្រប់បែបយ៉ាង ប្រសិនបើ រដ្ឋាភិបាលកាតាហ៊ានទិញអាវុធជាមួយរុស្ស៊ី។ ទោះបីជាមានការគំរាមយ៉ាងនេះក្តី រុស្ស៊ីបានបញ្ជាក់ថា ការផ្តត់ផ្គង់មីស៊ីលទៅឲ្យកាតានឹងនៅតែបន្ត។ ជាមួយគ្នានេះ រដ្ឋមន្ត្រីការបរទេសកាតា លោក Mohammed bin Abdulrahman Al Thani បាននិយាយថា ការទទួលយកប្រព័ន្ធការពារអាកាសនេះជាការសម្រេចចិត្តដោយផ្អែកលើអធិបតេយ្យភាព៕