ជាតិ
សេដ្ឋកិច្ច
កសិកម្មតាមកិច្ចសន្យា ជួយកសិករគេចផុតពីគំនាបតម្លៃរបស់ប្រទេសជិតខាង និងពួកឱកាសនិយម
× ភ្នំពេញ៖ កសិកម្មតាមកិច្ចសន្យា ជាយន្តការដែលក្រុមហ៊ុនត្រូវរកទីផ្សារពិតប្រាកដជាមុនសិន រួចទើបចុះកិច្ចសន្យាជាមួយកសិករ និងបណ្ដុះបណ្ដាលឲ្យពួកគាត់ដាំស្រូវ ឬដំណាំផ្សេងៗឲ្យស្របតាមទីផ្សារនោះ។ ក្រុមហ៊ុនធានាប្រមូលទិញពីកសិករ ដែលជាធម្មតាក្នុងតម្លៃខ្ពស់ជាងទីផ្សារ ព្រោះការដាំដុះដែលមានការតម្រង់ទិសបែបនេះបានបង្កើតតម្លៃបន្ថែម និងច្រើនជាប្រភេទកសិកម្មសរីរាង្គ។ ខុសពីកសិករដែលគ្មានក្រុមហ៊ុនចុះកិច្ចសន្យាជាមួយ។ ដូចដែលកន្លងមក ប្រទេសថៃ ធ្លាប់បានទម្លាក់តម្លៃអង្កររបស់ខ្លួន ដែលទាញឲ្យចុះថោកដល់ស្រូវកសិករខ្មែរទូទៅ ដែលមិនចុះកិច្ចសន្យា ព្រោះថាពាណិជ្ជករដែលប្រមូលទិញនោះ ពិបាកប្រកួតប្រជែងនឹងអង្ករថៃ។ ពេលខ្លះកសិករ ដោយគ្មានការធានាទិញ ត្រូវលក់ស្រូវឲ្យពួកឈ្មួញ និងអាចប៉ះឈ្មួញឆ្លៀតឱកាសបន្ទាបតម្លៃស្រូវពួកគាត់។
លោក សុង សារ៉ន អគ្គនាយកក្រុមហ៊ុន Amru Rice លើកឡើងថា កសិកម្មតាមកិច្ចសន្យា ជួយកសិករគេចពីការកៀបសង្កត់តម្លៃរបស់ប្រទេសជិតខាង និងពួកឱកាសនិយម។
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក សុង សារ៉ន អគ្គនាយកក្រុមហ៊ុន Amru Rice ដូចតទៅនេះ៖
Amru Rice ដែលជាក្រុមហ៊ុននាំមុខ និងគំរូមួយចំពោះការអនុវត្តកសិកម្មកិច្ចសន្យា កំពុងពង្រីកវិសាលភាពយន្តការនេះជាបន្តបន្ទាប់តាមបណ្ដាខេត្តមួយចំនួន។ ឆ្នាំ២០១៨នេះ Amru Rice ស្រូបយកស្រូវ ៥ម៉ឺនតោនពីកសិករដែលចុះកិច្ចសន្យាជាមួយខ្លួន ធៀបនឹង ៣ម៉ឺនតោននៅឆ្នាំ២០១៧ ។ ក្រុមហ៊ុននេះ មានផែនការពង្រីកការចុះកិច្ចសន្យាកសិកម្មនេះឲ្យដល់ ១០ម៉ឺនគ្រួសារនៅក្នុងរយៈពេល១០ឆ្នាំខាងមុខ ដោយសព្វថ្ងៃគ្របដណ្ដប់ចំនួន ១ម៉ឺនគ្រួសារ។
ទោះជាយន្តការល្អ ប៉ុន្តែជារួមការអនុវត្តកសិកម្មតាមកិច្ចសន្យានេះនៅកម្ពុជា ហាក់មានវិសាលភាពតូចនៅឡើយ ដែលទាមទារការជំរុញបន្ថែមពីរដ្ឋាភិបាល និងប្រឹងប្រែងរបស់ផ្នែកឯកជន៕
Tag:
អង្ករ
សុង សារ៉ន
កសិកម្មតាមកិច្ចសន្យា
© រក្សាសិទ្ធិដោយ thmeythmey.com