ក្រុមហ៊ុនកូរ៉េ KCI ទទួលប្រាក់ជិត៣លានដុល្លារពីរដ្ឋាភិបាលកម្ពុជា សម្រាប់ការងារគម្រោងកែលម្អផ្លូវ

ជាតិ

សង្គមជាតិ

សេដ្ឋកិច្ច

ក្រុមហ៊ុនកូរ៉េ KCI ទទួលប្រាក់ជិត៣លានដុល្លារពីរដ្ឋាភិបាលកម្ពុជា សម្រាប់ការងារគម្រោងកែលម្អផ្លូវ

03, Nov 2018 , 6:59 pm

រូបភាព

ដោយ: ថ្មីៗ

ភ្នំពេញ៖ ក្រុមហ៊ុនទីប្រឹក្សាបច្ចេកទេស Korea Consultants International (KCI) ទទួលបានទឹកប្រាក់ជិត៣លានដុល្លារពីរដ្ឋាភិបាលកម្ពុជា សម្រាប់ការងារអនុវត្តគម្រោងកែលម្អហេដ្ឋារចនាសម្ព័ន្ធ។ ក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេស Korea Consultants International (KCI) បានចុះហត្ថលេខាលើអនុស្សរណៈនៃការយោគយល់គ្នា កាលពីថ្ងៃទី៣១ តុលា។

ការងារត្រួតពិនិត្យ និងគាំទ្រការអនុវត្តគម្រោងនេះ មានតម្លៃទឹកប្រាក់សរុបប្រមាណ ៣ ,៣១៧ ,៦៤០ ដុល្លារអាមេរិក ដែលក្នុងនោះក្រុមហ៊ុន KCI ទទួលបានទឹកប្រាក់ចំនួន២, ៨៨៤ ,៩០៤ ដុល្លារសហរដ្ឋ អាមេរិក។ នេះបើតាមអនុស្សរណៈយោគយល់គ្នារវាងភាគីទាំងពីរ។

កន្លងមករាជរដ្ឋាភិបាលកម្ពុជា បានទទួលប្រាក់កម្ចីសម្បទានពីធនាគារអភិវឌ្ឍន៍អាស៊ី (លេខ. ៣៥៧៦-CAM (COL) ចំនួន ៧០លានដុល្លារអាមេរិក ដើម្បីអនុវត្តគម្រោងកែលម្អ និងលើកកម្រិតបណ្ដាញផ្លូវជាតិលេខ១ ពីគីឡូម៉ែត្រ០៦៣+៣០០ ដល់គីឡូម៉ែត្រ ១៥៩+០០០ (អ្នកលឿង-បាវិត) និងផ្លូវជាតិលេខ ៦ ពីគីឡូម៉ែត្រ ៣១៧+៦៣០ ដល់គីឡូម៉ែត្រ ៣៦៧-៥១២ (ក្រុងសៀមរាប-ក្រឡាញ់) ដែលមានប្រវែងសរុប ១៤៥,៥៨ គីឡូម៉ែត្រ ។ ផ្លូវទាំងនេះ ត្រូវប្ដូរពីកម្រាលកៅស៊ូ DBST ទៅកម្រាលកៅស៊ូ AC ព្រមទាំងដាក់លូសងខាងផ្លូវដើម្បីរំដោះទឹកភ្លៀងផងដែរ។

គម្រោងនេះ គ្រោងចំណាយពេល៥៤ខែ ពោលគឺ រយៈពេលសាងសង់ ១៨ខែ និងថែទាំរយៈពេល៣៦ខែ ដោយចាប់ផ្ដើមអនុវត្តចាប់ពីខែមករា ឆ្នាំ២០១៩ ដល់ខែមិថុនា ឆ្នាំ២០២៣ ។ នេះបើតាមក្រសួងសាធារណៈការ និងដឹកជញ្ជូន៕