អន្តរជាតិ
ក្រុមប្រឹក្សាសន្តិសុខ UN កោះប្រជុំដើម្បីបន្ថយកម្តៅប្រឈមមុខដាក់គ្នារវាងកងទ័ពរុស្ស៊ី និងអ៊ុយក្រែន
រូបភាព៖ABC
×![]()
ដោយ: ថ្មីៗ
កងទ័ពជើងទឹករុស្ស៊ីបានប្រើប្រាស់អាវុធបាញ់លើកងទ័ពអ៊ុយក្រែន និងរឹបអូសយកនាវាកងទ័ពជើងទឹកអ៊ុយក្រែនបីគ្រឿងដែលបានធ្វើដំណើរឆ្លងកាត់ដែនទឹកខ្លួនក្បែរឧបទ្វីបគ្រីមៀ។ គេបារម្ភថា ការប្រឈមមុខដាក់គ្នានេះនឹងធ្វើឲ្យមានការប៉ះទង្គិចដោយអាវុធកាន់តែធំផង ខណៈក្រុមប្រឹក្សាសន្តិសុខអង្គការសហប្រជាជាតិកោះប្រជុំបន្ទាន់នៅថ្ងៃចន្ទនេះដើម្បីព្យាយាមសម្រួលស្ថានការណ៍។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទទី ២៦ ខែវិច្ឆិកានេះថា កងទ័ពខ្លួនសម្រេចប្រើប្រាស់សព្វាវុធ ដើម្បីបញ្ឈប់យោធាអ៊ុយក្រែនដែលព្យាយាមចូលដែនដឹករបស់ខ្លួនដោយខុសច្បាប់។ រុស្ស៊ីក៏បានបញ្ជាក់ផងដែរថា នាវាកងទ័ពអ៊ុយក្រែនទាំងបីគ្រឿងត្រូវកងទ័ពរុស្ស៊ីចូលឆែកឆេរផងដែរក្រោយករណីនេះកើតឡើង។
បើតាមទីភ្នាក់ងារព័ត៌មាន AFP កងទ័ពអ៊ុយក្រែនបានអះអាងថា ឧបទ្ទវហេតុនេះកើតឡើងនៅថ្ងៃអាទិត្យទី ២៥ វិច្ឆិកានៅពេលនាវាចម្បាំងធុនតូចពីរគ្រឿង និងនាវាធម្មតាមួយគ្រឿងទៀតរបស់កងទ័ព ជើងទឹកអ៊ុយក្រែនធ្វើដំណើរឆ្លងកាត់ជ្រោយ Kerch ដែលជាផ្លូវទឹកចង្អៀតមួយភ្ជាប់ទៅសមុទ្រ Azovដែលជាសមុទ្រដែលរុស្ស៊ី និងអ៊ុយក្រែនប្រើប្រាស់រួមគ្នា។
កងទ័ពអ៊ុយក្រែនបន្តថា ពេលកំពុងធ្វើដំណើរ នាវាកងឆ្មាំការពារសមុទ្ររុស្សីបានបើកមកបុកនាវារបស់ខ្លួន ហើយបន្ទាប់មកក៏បាញ់រះលើនាវាដើម្បីបញ្ឈប់នាវាទាំងបីគ្រឿងនោះតែម្តង។ អ៊ុយក្រែន អះអាងបន្ថែមទៀតថា មុនប្រតិបត្តិការ ខ្លួនថែមទាំងបានផ្តល់ដំណឹងដល់កងទ័ពរុស្ស៊ីជាមុនដែរពីសកម្មភាពនាវាចរណ៍ទៅកាន់សមុទ្រ Azov។
ព្រឹត្តិការណ៍ប៉ះទង្គិចគ្នានេះកើតឡើងបន្ទាប់ពីកងទ័ពជើងទឹកអ៊ុយក្រែនត្អូញត្អែកាលពីខែកញ្ញាជុំវិញសកម្មភាពបង្ករឿងរបស់កងកម្លាំងរុស្ស៊ីនៅតាមព្រំដែនជាពិសេសធ្វើមកលើនាវាអ៊ុយក្រែនដែលធ្វើដំណើរតាមផ្លូវរួមគ្នានោះ។ អ៊ុយក្រែនកន្លងមកនេះក៏បានបង្កើតចំនួននាវាចម្បាំង និងកម្លាំងល្បាតព្រំដែនដែរ បន្ទាប់ពីរុស្ស៊ីពង្រាយនាវាចម្បាំងបន្ថែមប្រាំគ្រឿងទៀតទៅកាន់សមុទ្រ Azov។
ត្រឡប់មកវិញ ការប្រឈមមុខគ្នានៅតាមដែនសមុទ្រនេះជាការវិវត្តមួយប្រកបដោយគ្រោះថ្នាក់រវាងរុស្ស៊ីនិងអ៊ុយក្រែន ស្របពេលដែលភាគីទាំងពីរនៅបន្តប្រឈមមុខគ្នាក្នុងជម្លោះប្រដាប់អាវុធរ៉ាំរ៉ៃនៅភាគខាងកើតអ៊ុយក្រែនផងនោះ។
លោកខាងលិចបានទទូចឲ្យរុស្ស៊ីប្តូរឥរិយាបថ និងឲ្យភាគីទាំងពីរអត់ធ្មត់បញ្ចៀសបញ្ហាឲ្យបាន។ សហភាពអឺរ៉ុបបានស្នើឲ្យរុស្ស៊ីបើកទូលាយឡើងវិញនូវសេរីភាពនៃការធ្វើនាវាចរណ៍ឆ្លងកាត់ជ្រោយ Kerch និងទទូចឲ្យភាគីទាំងពីរបន្ធូរបន្ថយភាពតានតឹងឲ្យបានរហ័សតាមដែលអាចធ្វើបាន។ ចំណែលបក្សសម្ព័ន្ធយោធាណាតូវិញក៏ទទូចឲ្យមានការបញ្ចៀសការប្រឈមមុខគ្នាឬប៉ះទង្គិចគ្នាធ្ងន់ធ្ងរដែរ និងធានាមិនឲ្យមានការកាត់ផ្តាច់សកម្មភាពនាវាចរណ៍របស់អ៊ុយក្រែនទៅកាន់ដែនសមុទ្រ Azov ដែលជាសិទ្ធិការពារដោយច្បាប់អន្តរជាតិដែរ។
ដើម្បីជួយបន្ធូរបន្ថយស្ថានការណ៍នេះ ក្រុមប្រឹក្សាសន្តិសុខអង្គការសហប្រជាជាតិនឹងបើកកិច្ចប្រជុំបន្ទាន់មួយនៅថ្ងៃចន្ទដែរ។ បើតាមឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley កិច្ចប្រជុំនឹងពិភាក្សាពីស្ថានការណ៍ប្រឈមមុខដាក់គ្នា ហើយកិច្ចប្រជុំត្រូវបានស្នើឡើងដោយរុស្ស៊ី និងអ៊ុយក្រែនផ្ទាល់ដែរ។
ដោយឡែក ប្រធានាធិបតីអ៊ុយក្រែនលោក Petro Poroshenko បានស្នើទៅកាន់សភាឲ្យបោះឆ្នោតអនុម័តថា តើគួរប្រើប្រាស់ច្បាប់អាជ្ញាសឹកឬអត់ក្នុងរយៈពេល ៦០ថ្ងៃ ក្នុងកាលៈទេសៈបច្ចុប្បន្ននេះ។ ក្នុងជំហរគាំទ្រច្បាប់អាជ្ញាសឹក លោក Poroshenko បានអះអាងថា ទាហានរបស់ខ្លួនប្រាំមួយនាក់របួសក្នុងនោះមានពីរនាក់របួសធ្ងន់។ លោកបន្តថា ការវាយប្រហារនិងរឹបអូសនាវាចម្បាំងអ៊ុយក្រែនជាកំហុសឆ្គងមួយ ប៉ុន្តែលោកធានថា គ្មានលក្ខខណ្ឌណាមួយដែលអ៊ុយក្រែនត្រូវប្រើប្រាស់សកម្មភាពយោធាប្រឆាំងអ្នកណាមួយឡើយ។
យ៉ាងណាក៏ដោយ ទីភ្នាក់ងារសន្តិសុខរុស្ស៊ីអះអាងផ្ទុយពីការលើកឡើងខាងលើ ដោយបញ្ជាក់ថា ទាហានបីនាក់ប៉ុណ្ណោះដែលរបួស ហើយគ្មានអ្នកណាមួយមានរបួសធ្ងន់ឡើយ៕
Tag:
UNSC
រុស្ស៊ី
អ៊ុយក្រែន
© រក្សាសិទ្ធិដោយ thmeythmey.com
