ONE Championship
កីឡាជាតិ
ជាតិ
លោក Joe Conway រាប់ពីឆ្វេងទី៣
×![]()
ដោយ: ថ្មីៗ
លោក Joe Conway អ្នកចាត់ការរបស់ ចាន់ រតនា កីឡាកររបស់ ONE មានឱកាសបានមកស្រុកខ្មែរជាលើកដំបូងក្នុងឆ្នាំ ២០១៥ លោកមិននឹកស្មានថាខ្លួនអាចភ្ជាប់និស្ស័យជាមួយតារាប្រដាល់ គុនខ្មែរដ៏មានប្រជាប្រិយភាពរបស់កម្ពុជា ចាន់ រតនា ឡើយ។ 
Conway ជាមួយជើងខ្លាំងប្រចាំ ONE Championship ចាន់ រតនា សព្វថ្ងៃមានទំនាក់ទំនងជិតស្និតជាងមិត្តភក្តិធម្មតាទៅទៀត។ ពួកគាត់បានចាប់ដៃគ្នាដើរប្រមូលផ្តុំអ្នកស្នេហាវិស័យក្បាច់គុនពីប្រទេសមួយទៅប្រទេសមួយ ក្នុងឆន្ទៈលើកស្ទួយកីឡានេះដើម្បីប្រឡូកក្នុងពិភពគុនក្នុងស្តង់ដារកំរិតខ្ពស់។
អ្នកទាំងពីរក៏បានបញ្ចូលសមាជិកថ្មីទៀតផងដែររួមមានជើងខ្លាំងមកពីប្រទេសភូមា ភូ ថាវ និងកីឡារករខ្មែរ-អាមេរិក អម សុផាណារិទ្ធ។
Conway រំលឹកដល់ដំណើររឿងដែលលោកបានជួប ចាន់ រតនា នៅឯក្លិប «សិល្បៈ» កាលគាត់មកដល់កម្ពុជាដំបូង៖
«ខ្ញុំពិតជារំភើប ជាមួយអ្វីដែលពួកគាត់កំពុងធ្វើណាស់ ទាំងការបង្ហាត់ក្បាច់គុន និងការចាក់ដោតវប្បធម៌របស់ក្បាច់គុនខ្មែរ និងក៏ដូចជាយុទ្ធគុនខម»។
«ពេលនោះខ្ញុំបង្កើតកម្មវិធីសប្បុរសធម៌មួយហៅថា ប្រយុទ្ធដើម្បីកម្ពុជា «Fight For Cambodia» ដើម្បីរៃអង្គៀសលុយសំរាប់ទ្រទ្រង់វិស័យអប់រំ និង វិស័យក្បាច់គុន ដែលជាអ្វីដែលក្លឹប«សិល្បៈ»ព្យាយាមធ្វើសព្វថ្ងៃនេះ»។
Conway មានស្រុកកំណើតនៅទីក្រុងបូស្តុន ហើយគាត់មានជំនាញខាងធនាគារ និងហិរញ្ញវត្ថុ គាត់ជឿជាក់ថាខ្លួនអាចប្រើប្រាស់ជំនាញរបស់ខ្លួនដើម្បីជួយផ្សព្វផ្សាយពិភពលោកឲ្យបានខ្ទរខ្ទារបន្ថែមពីកីឡាករក្បាច់គុនកម្ពុជា។
បន្ទាប់ពីបានធ្វើយុទ្ធនាការសប្បុរសធម៌នោះមក គាត់មើលឃើញថាសប្បុរសធម៌អាចជួយច្រើនណាស់ ប៉ុន្តែគាត់ត្រូវផ្តោតលើវិធីផ្សេងខុសគ្នាបន្តិច។
សព្វថ្ងៃគាត់មានក្រុមហ៊ុនគ្រប់គ្រងមួយដែលមានសាខានៅសហរដ្ឋអាមេរិក ប្រទេសភូមា និងប្រទេសកម្ពុជា។ ទស្សនៈវិស័យនៃក្រុមហ៊ុននោះគឺជឿថាក្បាច់គុនអាចផ្លាស់ប្តូរជីវិតមនុស្សឲ្យប្រសើរឡើង ជាជំនឿមួយដែល Conway បានឃើញផ្ទាល់ភ្នែកខ្លួនឯងតែម្តង។
«យើងជួយគ្នាច្រើនទាក់ទងនឹងការឲ្យតម្លៃ ក៏ដូចជាឆន្ទះក្នុងការប្រើប្រាស់ក្បាច់គុនចម្រុះសម្រាប់ជួយផ្លាស់ប្តូរជីវិតរបស់ពួកគាត់ឲ្យល្អឡើង។ យើងព្យាយាមធ្វើយ៉ាងណា ចូលរួមជួយពិភពលោកតាមរយៈក្បាច់គុន។ យើងជឿថាក្បាច់គុនបង្រួបបង្រួមមនុស្សជាតិចូលគ្នា»។
នាថ្ងៃសុក្រ ទី៧ ខែធ្នូ ខាងមុខនេះ ចាន់ រតនា នឹងត្រូវប្រឈមមុខជាមួយជើងខ្លាំងមិនធ្លាប់ចាញ់របស់ឥណ្ឌូណេស៊ី នៅក្នុងព្រឹត្តិការណ៍ដ៏ធំនៅអាស៊ី ONE: DESTINY OF CHAMPIONS ដែលត្រូវប្រព្រឹត្តទៅនៅទីក្រុងកូឡាឡាំពួរ ប្រទេសម៉ាឡេស៊ី។
ក្នុងការប្រកួតអន្តរជាតិដ៏ធំនោះនឹងមានវត្តមាន រតនា និងកីឡាការិនីទើបរះថ្មី អឹម សុវណ្ណារី បង្ហាញខ្លួនតំណាងឲ្យកម្ពុជាផងដែរ។
ឆាកក្បាច់គុននៅតំបន់អាស៊ីអាគ្នេន៍កំពុងមានការរីកចម្រើនខ្លាំង ដោយសារមានស្ថាប័នយក្សជាច្រើនបានដឹកនាំវិស័យនេះ រួមមានទាំងស្ថាប័នកីឡាប្រដាល់ ONE Championship ជាដើមដែលបានផ្តល់ឱកាសឲ្យកម្ពុជាបញ្ចេញសមត្ថភាព ឡើងប្រយុទ្ធក្នុងកំរិតស្តង់ដារខ្ពស់។
Conway មើលឃើញពីទេពកោសល្យរបស់កីឡាករកម្ពុជា ប៉ុន្តែក៏ទទួលស្គាល់ថាកម្ពុជាត្រូវតែមានការផ្លាស់ប្តូរច្រើន បើចង់មានវត្តមានប្រយុទ្ធជាមួយកីឡាករខ្លាំងៗរបស់ពិភពលោកបាន។
លោក ថា៖ «នៅក្នុងប្រទេស ម្នាក់ៗមានកំរិតប្រហាក់ប្រហែលគ្នា។ ប៉ុន្តែបើត្រូវឡើងប្រកួតកំរិតអន្តរជាតិវិញ បានយើងឃើញថាក្លឹបហាត់របស់គេ មានលុយទ្រទ្រង់ មានទាំងអ្នកជំនាញខាងបំប៉នសុខភាព ទាំងគ្រូបង្វឹកផ្នែកកម្លាំង និងមានអ្នកគ្រប់គ្រងគេត្រឹមត្រូវ ពេលនោះហើយដែលយើងនឹងឃើញពីភាពខុសគ្នាខ្លាំងតែម្តង ថាយើងត្រូវតែមានគ្នាជាក្រុមគ្រប់គ្រាន់ គឺជារឿងសំខាន់ណាស់»។
តែក្នុងមួយឆ្នាំ ២០១៨ យើងឃើញមានចលនាក្នុងវិស័យកីឡាជាច្រើនបានផុសផុលឡើង ក្នុងនោះមានការសម្ភោធជាផ្លូវការរបស់សហព័ន្ធយុទ្ធគុនចម្រុះ និងមានកីឡាករកីឡាការិនីខ្លាំងៗជាច្រើនចាប់ផ្តើមចុះកុងត្រាជាមួយ ONE Championship និង ONE Super Series។
Conway និងក្រុមរបស់គាត់ទាំងមូលទន្ទឹងមើលសន្ទុះនៃការផ្លាស់ប្តូរកម្ពុជាសំរាប់ឆ្នាំ ២០១៩ ទោះលទ្ធផលយ៉ាងណាក៏ដោយ ក៏គាត់ជឿជាក់ថាកម្ពុជាកំពុងបោះជំហានទៅផ្លូវដ៏ត្រឹមត្រូវ។
«ខ្ញុំបាននិយាយជាមួយ ហ៊ុន ចាន់រាជ (អ្នកដឹកនាំក្លឹបCambodia Top Team) ទាក់ទងនឹងសហព័ន្ធយុទ្ធគុនចម្រុះកម្ពុជា ដោយសារខ្លួនស្នេហាវិស័យក្បាច់គុន និងកីឡាករដូចគ្នា ដូច្នេះយើងពិភាក្សាគ្នាពីវិធីធ្វើការជាមួយគ្នាសំរាប់លើកស្ទួយវិស័យនេះ»។
«ខ្ញុំមានទំនុកចិត្តខ្ពស់លើអនាគតក្បាច់គុនចម្រុះរបស់កម្ពុជា និង ភូមាខ្លាំងទៅថ្ងៃមុខ»។
អត្ថបទ៖ Matias Andres
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
11 ម៉ោង
