អន្តរជាតិ
ត្រាំ មិនជឿរបាយការណ៍រដ្ឋបាលលោកដែលព្រមានពីការខាតបង់សេដ្ឋកិច្ចធំធេងដោយសារប្រែប្រួលអាកាសធាតុឡើយ
×![]()
ដោយ: ថ្មីៗ
ប្រធានាធិបតីអាមេរិកលោក ដូណាល់ ត្រាំ បានអះអាងពេញៗ មាត់នៅថ្ងៃចន្ទទី ២៦ ខែវិច្ឆិកាថា លោកមិនជឿរបាយការណ៍របស់រដ្ឋបាលលោកផ្ទាល់ដែលព្រមានពីការខាតបង់សេដ្ឋកិច្ចធ្ងន់ធ្ងរដោយសារការប្រែប្រួលអាកាសធាតុបើសិនអាមេរិកមិនព្រមកាត់បន្ថយកម្រិតឧស្ម័នកាបូនិចបញ្ចេញទៅបរិយាកាសឡើយ។
«ខ្ញុំមិនជឿលើរបាយការណ៍ទាំងនោះឡើយ»។ នេះជាសម្តីរបស់លោកប្រធានាធិបតីអាមេរិកលោក ដូណាល់ ត្រាំ ថ្លែងទៅកាន់អ្នកសារព័ត៌មាននៅសេតវិមានពេលនិយាយដល់របាយការណ៍ថ្មីមួយដែលចេញផ្សាយដោយរដ្ឋបាលអាមេរិកផ្ទាល់ ក្នុងគោលដៅព្រមានពីការខាតបង់ធំធេងផ្នែកសេដ្ឋកិច្ចដោយសារការប្រែប្រួលអាកាសធាតុ។
តាមពិតទៅលោក ត្រាំ ផ្តល់យោបល់លើរបាយការណ៍របស់ទីភ្នាក់ងារជាតិទទួលបន្ទុកវាយតម្លៃអាកាសធាតុដែលត្រូវបានចេញផ្សាយកាលពីថ្ងៃសុក្រសប្តាហ៍មុន។ ចំណុចស្នូលនៃរបាយការណ៍នេះគឺ ព្រមានថា អាមេរិកនឹងអាចខាតបង់រាប់រយពាន់លានដុល្លារដោយសារការប្រែប្រួលអាកាសធាតុត្រឹមចុងសតវត្សទី ២១នេះ បើសិនជាអាមេរិកមិនដាក់ចេញដំណោះស្រាយម៉ត់ចត់និងមានប្រសិទ្ធិភាពដើម្បីបន្ថយកម្រិតឧស្ម័នកាបូនិចបញ្ចេញទៅបរិយាកាសទេនោះ។
យោងតាមទីភ្នាក់ងារព័ត៌មាន AFP លោក ត្រាំ អះអាងថា លោកបានអានរបាយការណ៍នោះរួចរាល់ហើយ។ លោកបានទទួលស្គាល់ដែរថា ផ្នែកខ្លះនៃរបាយការណ៍ខាងលើអាចទទួចយកបាន។ ប៉ុន្តែលោកនៅការពារជំហរមួយគឺ អាមេរិកមិនកាត់បន្ថយកម្រិតឧស្ម័នកាបូនិចទៅកាន់បរិយាកាសឡើយ វាលែងតែប្រទេសផ្សេងទៀតធ្វើបានសិន។
«អ្នកឯងត្រូវតែឲ្យជប៉ុន ចិន និងបណ្តាប្រទេសអាស៊ី និងប្រទេសដទៃទៀតដោះស្រាយបញ្ហាទាំងនោះសិន។ ឥឡូវនេះយើងជាប្រទេសល្អស្អាតជាងគេ។ វាជារឿងសំខាន់ណាស់សម្រាប់ខ្ញុំ។ ប៉ុន្តែប្រសិនបើយើងស្អាតល្អហើយ ប៉ុន្តែអ្នកផ្សេងទៀតលើពិភពលោកនៅតែគគ្រិច វាមិនមែនជារឿងល្អទេ។ ខ្ញុំចង់មានខ្យល់អាកាសល្អស្អាត ទឹកស្អាត ហើយវាជារឿងសំខាន់មួយ»។ លោក ត្រាំ អះអាងបែបនេះ។
អាចថាវាមិនមែនជារឿងចម្លែកទេដែលប្រធានាធិបតី ត្រាំ មិនជឿថា មានការប្រែប្រួលអាកាសធាតុនេះ ដ្បិតតាំងពីឃោសនាបោះឆ្នោតឆ្នាំ ២០១៦ លោកតែងតែអះអាងថា វាជារឿងបោកប្រាស។ ក្រោយស្បថចូលកាន់តំណែងមេដឹកនាំរូបនេះថែមទាំងសម្រេចដកអាមេរិកចេញកិច្ចព្រមព្រៀងអាកាសធាតុក្រុងប៉ារីស ធ្វើឲ្យពិភពលោកទាំងមូលថ្កោលទោសថែមទៀត។
ប៉ុន្តែវាជារឿងចម្លែកដែលលោក ទាត់ចោលរបាយការណ៍ដែលសិក្សានិងចងក្រងដោយស្ថាប័នស្ថិតក្រោមចំណុះរដ្ឋបាលរបស់លោកផ្ទាល់ផង។ របាយការណ៍ដែលមានកម្រាស់លើស ១០០០ទំព័រនេះ ត្រូវបានចងក្រងឡើងដោយអ្នកវិទ្យាសាស្ត្រច្រើនជាង ៣០០នាក់ឯណោះ៕
Tag:
អាមេរិក
ប្រែប្រួលអាកាសធាតុ
ដូណាល់ ត្រាំ
© រក្សាសិទ្ធិដោយ thmeythmey.com
