អន្តរជាតិ
កាសែតបក្សទម្លាយថា មហាសេដ្ឋីដ៏ល្បីល្បាញ ជេក ម៉ា ក៏សមាជិកបក្សកុម្មុយនីស្តដែរ
× ភាពភ្ញាក់ផ្អើលមួយកើតឡើង បន្ទាប់ពីកាសែតរបស់បក្សកុម្មុយនីស្តចិន People’s Daily ទទួលស្គាល់ជាផ្លូវការសប្តាហ៍នេះថា ស្ថាបនិកក្រុមហ៊ុនបច្ចេកវិទ្យាយក្ស អាលីបាបា ជេក ម៉ា ស្ថិតក្នុងចំណោមសមាជិកបក្សកុម្មុយនីស្តចិនជាង ៨០លាននាក់។ យ៉ាងណាមិញក្រុមហ៊ុនអាលីបាបាបានអះអាងថា សមាជិកភាពក្នុងបក្សនយោបាយនេះគ្មានផលប៉ះពាល់អ្វីឡើយលើដំណើរការក្រុមហ៊ុនជារួម។
ព័ត៌មាននេះពីសមាជិកភាពរបស់លោក ជេក ម៉ា បែកខ្ចរខ្ចាយបន្ទាប់ពីកាសែតចិន People’s Daily ចុះផ្សាយព័ត៌មានស្តីពីមនុស្សសំខាន់ៗចំនួន ១០០នាក់ដែលបានរួមចំណែកយ៉ាងសំខាន់ក្នុងការជំរុញឲ្យមានការកែទម្រង់ និងបើកចំហសេដ្ឋកិច្ចចិនកន្លងមក។
ក្នុងចំណោមមនុស្ស ១០០នាក់នោះមានលោក ជេក ម៉ាប្រធានក្រុមហ៊ុនអាលីបាបា, លោក Robin Li ប្រធានក្រុមហ៊ុន Baidu និងលោក Pony Ma ជានាយកប្រតិបត្តិនៃក្រុមហ៊ុន Tencent។ ប៉ុន្តែអ្វីដែលសំខាន់នោះ កាសែតបក្សមួយនេះបន្ថែមព័ត៌មានថា លោក ជេក ម៉ា ជាសមាជិកបក្សកុម្មុយនីស្តចិននោះ។
យ៉ាងណាក៏ដោយ ទីភ្នាក់ងារព័ត៌មាន Reuters ផ្សាយថា គេមិនទាន់ដឹងច្បាស់ពីគោលដៅពិតប្រាកដនៅពីក្រោយការសម្រេចចិត្តរបស់កាសែតបក្សកុម្មុយនីស្តចិនដែលទម្លាយព័ត៌មានទំនាក់ទំនងរវាងលោក ជេក ម៉ា ជាមួយបក្សនៅពេលនេះឡើយ។
ប៉ុន្តែគេសន្និដ្ឋានថា វាអាចពាក់ព័ន្ធនឹងគោលបំណងរបស់បក្សដែលកំពុងព្យាយាមជំរុញឲ្យរាល់ក្រុមហ៊ុន សហគ្រាសឯកជនទាំងអស់ដើរឲ្យស្របតាមគុណតម្លៃរបស់បក្សជាពិសេសលើការអភិវឌ្ឍបច្ចេកវិទ្យាដែលកំពុងអភិវឌ្ឍយ៉ាងឆាប់រហ័សនេះជាដើម។
យោងតាមទស្សនាវដ្តី Forbes លោក ជេក ម៉ា ដែលជាស្ថាបនិកក្រុមហ៊ុនអាលីបាបា ក្លាយជាមហាសេដ្ឋកិច្ចម្នាក់ដែលមានទ្រព្យច្រើនបំផុតរហូតដល់ ៣៥,៨ ពាន់លានដុល្លារ។ លោកបានក្លាយជាមនុស្សដ៏មានឥទ្ធិពលបំផុតក្នុងវិស័យជំនួញ និងដើរតួនាទីជាទីប្រឹក្សារបស់មេដឹកនាំពិភពលោកជាច្រើនពីអាស៊ីដល់អឺរ៉ុបផងដែរ។ ប៉ុន្តែកាលពីខែកញ្ញាកន្លងទៅ លោកបានប្រកាសពីគម្រោងចូលនិវត្តន៍ពីការងារជាប្រធានក្រុមហ៊ុនអាលីបាបា និងទៅប្រឡូកក្នុងការងារសប្បុរសធម៌វិញ។
យ៉ាងណាមិញ ក្រុមហ៊ុនអាលីបាបា បដិសេធបកស្រាយឬផ្តល់យោបល់ជុំវិញសមាជិកភាពរបស់លោក ជេក ម៉ា ក្នុងបក្សកុម្មុយនីស្តចិន។ ប៉ុន្តែក្រុមហ៊ុនបានបញ្ជាក់ថា ទំនាក់ទំនងនយោបាយរបស់ថ្នាក់ដឹកនាំមិនមានឥទ្ធិពលអ្វីលើដំណើរការជាប្រក្រតីរបស់ក្រុមហ៊ុនឡើយ ដ្បិតអ្វីដែលសំខាន់នោះគឺក្រុមហ៊ុនគោរពច្បាប់ និងបទបញ្ញត្តិដែលមានយ៉ាងខ្ជាប់ខ្ជួនក្នុងការធ្វើជំនួញ៕
Tag:
ជេក ម៉ា
ចិន
People’s Daily
បក្សកម្មុយនីស្តចិន
© រក្សាសិទ្ធិដោយ thmeythmey.com