អ្នកកាសែតថ្មីៗចូលរួមកម្មវិធីរាយការណ៍ព័ត៌មានបញ្ហា«អាស៊ីចុងបូព៌ា»របស់ក្រសួងការបរទេសអាមេរិក

អន្តរជាតិ

អ្នកកាសែតថ្មីៗចូលរួមកម្មវិធីរាយការណ៍ព័ត៌មានបញ្ហា«អាស៊ីចុងបូព៌ា»របស់ក្រសួងការបរទេសអាមេរិក

28, Nov 2018 , 4:21 pm

រូបភាព

ដោយ: ថ្មីៗ

សេអ៊ូល៖ លោក តន ចាន់រិទ្ធារ៉ា អ្នកសារព័ត៌មាននៃការិយាល័យអន្តរជាតិរបស់សារព័ត៌មានថ្មីៗ (Thmey Thmey) កំពុងស្ថិតនៅទឹកដីកូរ៉េខាងត្បូង ដើម្បីចូលរួមកម្មវិធីដំណើររាយការណ៍អ្នកសារព័ត៌មានស្ដីពី «អាស៊ីចុងបូព៌ា»។ កម្មវិធីដែលរៀបចំដោយមជ្ឈមណ្ឌលអន្តរជាតិ Meridian ដោយសហការជាមួយក្រសួងការបរទេសអាមេរិក នឹងជួយអ្នកសារព័ត៌មានតំបន់ដែលចូលរួមយល់ស៊ីជម្រៅពីគោលនយោបាយរបស់អាមេរិក និងសម្ព័ន្ធមិត្តចំពោះសកម្មភាពរបស់កូរ៉េខាងជើង។ ក្រៅពីកូរ៉េខាងត្បូង សិក្ខាកាមនឹងបន្តដំណើរទៅកាន់សហរដ្ឋអាមេរិកទៀត។

អ្នកសារព័ត៌មានចំនួន១២នាក់មកពីប្រទេសចំនួន១២នៅតំបន់អាស៊ី បានចូលរួមក្នុងកម្មវិធីដំណើររាយការណ៍អ្នកសារព័ត៌មានស្ដីពីអាស៊ីចុងបូព៌ា។ លោក តន ចាន់រិទ្ធារ៉ា នៃសារព័ត៌មានថ្មី ត្រូវបានជ្រើសរើសឲ្យចូលរួមក្នុងកម្មវិធីនេះជាមួយអ្នកសារព័ត៌មានមកពីថៃ វៀតណាម ចិន នូវែលសេឡង់ ម៉ុងហ្គោលី សិង្ហបុរី មីយ៉ាន់ម៉ា ជប៉ុន ឥណ្ឌូណេស៊ី និងកោះតៃវ៉ាន់ដែរ។

កម្មវិធីដំណើររាយការណ៍អ្នកសារព័ត៌មានស្ដីពីអាស៊ីចុងបូព៌ា គឺជាកម្មវិធីមួយក្នុងចំណោម៦ សម្រាប់អ្នកសារព័ត៌មានក្នុងតំបន់ដើម្បីស្វែងយល់ពីនយោបាយនានារបស់រដ្ឋបាលក្រុងវ៉ាស៊ីនតោន និងដៃគូរបស់ខ្លួនប្រឈមមុខនឹងការគំរាមរបស់ក្រុងព្យុងយ៉ាងដូចជាកម្មវិធីនុយក្លេអ៊ែរ និងសកម្មភាពយោធាផ្សេងទៀត។ ជំនួបរវាងមេដឹកនាំអាមេរិក និងកូរ៉េខាងជើងនៅសិង្ហបុរី ក៏ជាប្រធានបទមួយសម្រាប់អ្នកចូលរួមស្វែងយល់ដែរ។

កម្មវិធីដំណើរទស្សនកិច្ចរាយការណ៍នេះ ធ្វើនៅកូរ៉េខាងត្បូង និងអាមេរិកចាប់ពីថ្ងៃទី២៨ ខែវិច្ឆិកា ដល់ថ្ងៃទី៧ ខែធ្នូ។ អ្នកសារព័ត៌មានទាំង១២នាក់ នឹងធ្វើដំណើរទៅកាន់រដ្ឋធានីសេអ៊ូល រួចបន្តដំណើរទៅកាន់រដ្ឋធានីវ៉ាស៊ីនតោន និងចុងក្រោយទីក្រុងញូវយ៉ក។ ក្នុងដំណើររយៈពេលវែងនេះ អ្នកចូលរួមនឹងមជួបជាមួយមន្ត្រីអាមេរិក និងកូរ៉េខាងត្បូង ព្រមទាំងអ្នកជំនាញផ្នែកបញ្ហាកូរ៉េខាងជើងដើម្បីជជែក និងផ្លាស់ប្ដូរយោបល់ ក៏ដូចជាធ្វើទស្សនកិច្ចនៅទីតាំងសំខាន់ៗមួយចំនួនដូចជាតំបន់គ្មានយោធា (DMZ) ជាដើម៕