ការប្រកួតពានរង្វាន់ UEFA Champions League បានបញ្ចប់ជំនួបសប្តាហ៍ទី៥ កាលពីរាត្រីថ្ងៃពុធ ដោយ Borussia Dortmund, Atletico Madrid, Barcelona, Porto និង Schalke 04 កក់កៅអីទៅកាន់វគ្គបន្ត ខណៈ Monaco និង PSV Eindhoven បាត់បង់ឱកាស១០០ភាគរយហើយ។
នៅក្នុងពូល A ក្រុម Atletico Madrid បានយកឈ្នះភ្ញៀវ Monaco ២-០ ខណៈ Borussia Dortmund បញ្ចប់ក្នុងលទ្ធផលដោយគ្មានការស៊ុតបាល់បញ្ចូលទីជាមួយ Club Brugge។ Atletico Madrid (១២ពិន្ទុ) និង Borussia Dortmund (១០ពិន្ទុ) ត្រូវឈានទៅវគ្គបន្ត ប៉ុន្តែត្រូវរង់ចាំការប្រកួតចុងក្រោយដើម្បីកំណត់ចំណាត់ថ្នាក់លេខមួយ និងលេខពីរក្នុងពូល។ Club Brugge (៥ពិន្ទុ) ធ្លាក់ទៅលេងក្របខណ្ឌ Europa League ខណៈ Monaco មានតែ១ពិន្ទុប៉ុណ្ណោះពីការប្រកួត៥លើក។
សម្រាប់ពូល B ក្លិប Barcelona (១៣ពិន្ទុ) ធានាបាននូវចំណាត់ថ្នាក់លេខ១ក្នុងពូល ដោយទុកឲ្យ Tottenham Hotspur និង Inter Milan ដែលមាន៧ពិន្ទុដូចគ្នា ប្រជែងយកចំណាត់ថ្នាក់លេខ២ ។ Barcelona បានយកឈ្នះម្ចាស់ផ្ទះ PSV Eindhoven ២-១ ស្របពេលដែល Tottenham Hotspur ស៊ី Inter Milan ១-០ ។ PSV ដែលមានតែមួយពិន្ទុ នៅសល់តែការប្រកួតបង្គ្រប់កិច្ចប៉ុណ្ណោះ។
ងាកទៅពូល C មិនទាន់មានក្រុមណាមួយកក់កៅអីទៅវគ្គបន្តនោះឡើយ ដោយ Napoli, Paris Saint-Germain និង Liverpool នៅមានឱកាសដូចគ្នា ខណៈ Red Star Belgrade ព្យាយាមរកកៅអីនៅ Europa League។ Napoli ឈ្នះ Red Star Belgrade ៣-១ ស្របពេលដែល PSG ឈ្នះ Liverpool ២-១។ បច្ចុប្បន្ន Napoli មាន៩ពិន្ទុ PSG មាន៨ពិន្ទុ Liverpool មាន៦ពិន្ទុ និង Red Star Belgrade មាន៤ពិន្ទុ។
ដោយឡែកពូល D ឯណោះវិញ Porto បានយកឈ្នះ Schalke ៣-១ ខណៈ Lokomotiv Moscow ស៊ី Galatasaray ២-០ ។ Porto (១៣ពិន្ទុ) និង Schalke 04 (៨ពិន្ទុ) ជាប់ចំណាត់ថ្នាក់លេខ១ និងលេខ២ដោយស្វ័យប្រវត្តិ ខណៈ Galatasaray (៤ពិន្ទុ) និង Lokomotiv Moscow (៣ពិន្ទុ) ត្រូវប្រជែងពិន្ទុគ្នាសម្រាប់កៅអី Europa League។
Atletico Madrid, Borussia Dortmund, Barcelona, Porto និង Schalke 04 ត្រូវឡើងទៅកាន់វគ្គបន្តទៅវគ្គ១៦ក្រុមចុងក្រោយជាមួយ Bayern Munich, Ajax, Manchester City, Real Madrid, Roma, Manchester United និង Juventus។
ក្រុមដែលត្រូវទៅលេងវគ្គ៣២ក្រុមចុងក្រោយនៅ Europa League មាន Club Brugge, Benfica និងVelencia ក្រុមដែលសល់មួយប្រកួតបង្គ្រប់កិច្ចមាន Manaco, PSV, AEK Athens និង Young Boys ខណៈក្រុមផ្សេងទៀតមិនច្បាស់ពីទីតាំងរបស់ខ្លួននោះឡើយ៕