ត្រាំ ចង់បង្កើនពន្ធលើរថយន្តនាំចូលដល់ ២៥ភាគរយ តែអឺរ៉ុបព្រមានចាត់វិធានតបតវិញភ្លាម

អន្តរជាតិ

ត្រាំ ចង់បង្កើនពន្ធលើរថយន្តនាំចូលដល់ ២៥ភាគរយ តែអឺរ៉ុបព្រមានចាត់វិធានតបតវិញភ្លាម

29, Nov 2018 , 9:59 pm

រូបភាព

ដោយ: ថ្មីៗ

ប្រធានាធិបតីអាមេរិកលោក ដូណាល់ ត្រាំ បង្ហើបនៅថ្ងៃពុធទី ២៨ ខែវិច្ឆិកាថា លោកពេញចិត្តចំពោះការដំឡើងពន្ធបន្ថែមលើរថយន្តនាំចូលដើម្បីការពារឧស្សាហកម្មរថយន្តក្នុងស្រុក។ ភ្លាមៗនោះ អឺរ៉ុបបានព្រមានថា រាល់ការដាក់ដំឡើងពន្ធពីសំណាក់រដ្ឋបាលអាមេរិកនឹងប្រឈមវិញភ្លាមនឹងការដាក់ពន្ធសងសឹកពីខាងអឺរ៉ុបដែរ។

នៅសប្តាហ៍នេះ ក្រុមហ៊ុនផលិតរថយន្តអាមេរិក General Motors (GM) បានប្រកាសកាត់បន្ថយបុគ្គលិករាប់ពាន់នាក់ដោយបិទរោចក្រប៉ុន្មានកន្លែងនៅរដ្ឋអូហៃយ៉ូ និងរដ្ឋមីឈីហ្កែន។ ដំណឹងនេះធ្វើឲ្យប្រធានាធិបតី ដូណាល់ ត្រាំ ដែលកំពុងធ្វើសង្គ្រាមពាណិជ្ជកម្មមិនពេញចិត្តទាល់តែសោះ។

ក្នុងសារដែលសរសេរបង្ហោះលើគណនីTwitter ផ្លូវការរបស់ខ្លួន លោក ត្រាំ បានអះអាងថា វិធានការប្រើប្រាស់ពន្ធដែលមានលើប្រភេទរថយន្តដឹកជញ្ជូនធុនតូច សម្រាប់ប្រភេទរថយន្តធម្មតាដែលនាំចូលនឹងជួយដល់ក្រុមហ៊ុនផលិតរថយន្តក្នុងស្រុក។

លោកនិយាយដូច្នេះ៖ «ហេតុផលដែលក្រុមហ៊ុនផលិតរថយន្តដឹកជញ្ជូនធុនតូចនៅអាមេរិកស្ថិតក្នុងស្ថានភាពល្អដូចបច្ចុប្បន្នគឺ ក្នុងរយៈពេលជាច្រើនឆ្នាំមកនេះយើងដាក់ពន្ធនាំចូលក្នុងកម្រិត ២៥ភាគរយលើប្រភេទរថយន្តទាំងនោះ។ បើសិនជាយើងដាក់ពន្ធដូចគ្នាចំពោះរថយន្តធម្មតា រថយន្តកាន់តែច្រើននឹងត្រូវផលិតនៅក្នុងស្រុកយើង»។

លោក ត្រាំ បានឆ្លៀតប្រាប់ទៅសភាអាមេរិកដែរថា លោក មានអំណាចទូលំទូលាយក្នុងការចាត់ការបញ្ហាពន្ធរថយន្តនេះ ហើយម្យ៉ាងដោយសារបញ្ហាក្នុងក្រុមហ៊ុន GM ថ្មីៗនេះ រដ្ឋបាលលោកក៏កំពុងសិក្សាមើលពីបញ្ហាដំឡើងពន្ធនេះដែរ។

តាមពិតទៅ លោក ត្រាំ ខឹងក្រុមហ៊ុនរថយន្ត GM ខ្លាំងដែលសម្រេចកាត់បន្ថយបុគ្កលិកនេះ។ កាលពីថ្ងៃអង្គារលោក ត្រាំ ក៏បានព្រមានកាត់ផ្តាច់ការឧបត្ថម្ភធនសម្រាប់ក្រុមហ៊ុន GM ដែលរដ្ឋបាលអាមេរិកផ្តល់ឲ្យក្រោយវិបត្តិសេដ្ឋកិច្ចពិភពលោកឆ្នាំ ២០០៨ដែរ។

ដោយឡែក ប្រធានាធិបតីបញ្ចេញយោបល់បែបនេះ ស្របពេលដែលក្រសួងពាណិជ្ជកម្មអាមេរិកបញ្ចប់ការចងក្រងរបាយការណ៍ផ្តល់យោបល់របស់ខ្លួនជុំវិញការសម្រេចចិត្តថាតើការដាក់ដំឡើងពន្ធនេះសមហេតុផលឬអត់។ ប៉ុន្តែស្ថាប័ននេះមិនទាន់បានដាក់ឆ្លងរបាយការណ៍ផ្លូវការទៅកាន់ប្រធានាធិបតី ត្រាំនៅឡើយទេ។

យ៉ាងណាក៏ដោយចុះ បើតាមទីភ្នាក់ងារព័ត៌មាន AFP ស្នងការពាណិជ្ជកម្មសហភាពអឺរ៉ុប Cercilia Malmstrom បានព្រមានពីផលប៉ះពាល់ដែលកើតឡើងដោយសារគម្រោងដាក់ដំឡើងពន្ធប្រឆាំងរថយន្តនាំចូលរបស់រដ្ឋបាលលោក ត្រាំដែរ។ តំណាងសហភាពអឺរ៉ុបនេះមានគូសបញ្ជាក់ថា អឺរ៉ុបមានវិធានការតបតរួចរាល់ស្រេចហើយ បើអាមេរិកហ៊ានដំឡើងពន្ធនោះ។

ក្នុងឆ្នាំនេះ អឺរ៉ុបបានដាក់ចេញវិធានការប្រឆាំងអាមេរិករួចហើយ បន្ទាប់ពីលោក ត្រាំ បញ្ជាឲ្យដំឡើងពន្ធលើដែកថែប និងអាលុយមីញ៉ូម។ ប៉ុន្តែកាលពីខែកក្កដាកន្លងមកនេះ លោក ត្រាំ និងប្រធានគណៈកម្មការអឺរ៉ុបលោក ហ្សង់ក្លូដ ចាំងគឺ (Jean-Claude Juncker) បានឯកភាពគ្នាថា មិនមានការដាក់ពន្ធថ្មីទៀតទេ ខណៈដែលការចរចាជុំវិញបញ្ហាពន្ធនេះនៅបន្តទៅមុខនោះ៕