សប្តាហ៍នេះ អតីតប្រមុខការទូតអាមេរិកលោក រិច ធីល័រសិន (Rex Tillerson) បានរិះគន់អតីតចៅហ្វាយនាយរបស់លោកគឺលោក ដូណាល់ត្រាំ ថាជាមនុស្សខ្វះវិន័យ និងចង់តែបំពានច្បាប់។ ប៉ុន្តែ លឺសម្តីរិះគន់ភ្លាម លោក ត្រាំ ចេញមុខឆ្លើយវិញភ្លែតទាំងកំរោលថា អតីតមន្ត្រីរបស់លោកជា «មនុស្សឆ្កួត»។
ក្នុងបទសម្ភាសន៍ជាមួយទូរទស្សន៍ CBS អតីតរដ្ឋមន្ត្រីការបរទេសអាមេរិកលោក រិច ធីល័រសិន បានរិះគន់ដោយឥតលាក់លៀមពីទំនាក់ទំនងរវាងលោក និងប្រធានាធិបតីអាមេរិកលោក ដូណាល់ ត្រាំជាពិសេសអត្តចរិតរបស់ត្រាំផ្ទាល់។ លោកអះអាងថា លោក ត្រាំ នេះជាមនុស្សដែលគ្មានវិន័យធ្វើអ្វីៗតាមអំពើចិត្តខ្លួនឯង។
តាមសម្រង់បទសម្ភាសន៍ដែលចុះផ្សាយក្នុងទូរទស្សន៍ CBS ដែលចេញផ្សាយនៅថ្ងៃព្រហស្បតិ៍ទី ៦ ខែធ្នូ លោក ធីល័រសិននិយាយបែបនេះ៖ «វាជារឿងលំបាកបំផុតសម្រាប់ខ្ញុំដែលត្រូវមកធ្វើការជាមួយបុរសម្នាក់ដែលគ្មានវិន័យច្បាស់លាស់ មិនចូលចិត្តអាន មិនអាចរបាយការណ៍សង្ខេប និងមិនចូលចិត្តតាមដានលម្អិតពីរឿងអ្វីទាំងអស់ ខណៈដែលខ្ញុំធ្លាប់មានប្រវត្តិធ្វើការងារក្នុងក្រុមហ៊ុន ExxonMobil ដែលជាទីកន្លែងដែលមានវិន័យតឹងរ៉ឹង និងមាននីតិវិធីធ្វើការងារច្បាស់លាស់»។
ក្រៅពីពិបាកធ្វើការងារដោយសារគ្មានវិន័យ លោក ធីល័រសិន បានពន្យល់បន្ថែមថា លោកតែងតែដាស់តឿនប្រធានាធិបតី ដោយសារលោកចង់តែធ្វើអ្វីៗដែលបំពានច្បាប់ផងនោះ។ ធីល័រសិន និយាយបែបនេះ៖ «ខ្ញុំគិតថា យើងទាំងពីរមានភាគខុសប្លែកគ្នាច្រើនលើរបៀបរបបធ្វើការងារ។ ខ្ញុំត្រូវនិយាយទៅកាន់លោក ត្រាំ ថា លោក ប្រធានាធិបតី ខ្ញុំយល់ពីអ្វីដែលលោកចង់ធ្វើ ប៉ុន្តែលោកមិនអាចធ្វើវាតាមរបៀបដែលលោកចង់បានទេ ដ្បិតថា វាបំពានច្បាប់ និងសន្ធិសញ្ញាអន្តរជាតិ»។
លោកបន្តដូច្នេះ៖«លោក ត្រាំ គាត់ចាប់ផ្តើមធុនទ្រាន់។ ខ្ញុំគិតថា គាត់ចាប់ផ្តើមធុញនឹងខ្ញុំដែលតែងតែប្រាប់គាត់ពីអ្វីដែលគាត់មិនអាចធ្វើបាន និងបន្តប្រាប់គាត់ពីអ្វីដែលគាត់ធ្វើបានជាប្រចាំបែបនេះ»។
លោក ធីល័រសិន ដែលជាអតីតប្រធានក្រុមហ៊ុនប្រេង Exxon បានបម្រើការងារជារដ្ឋមន្ត្រីការបរទេសអាមេរិកចាប់ពីខែកុម្ភៈឆ្នាំ ២០១៧ ក្រោយពេលលោក ត្រាំ ស្បថចូលកាន់តំណែង។ លោកត្រូវបានលោក ត្រាំ បណ្តេញចេញពីតំណែងនៅក្នុងខែមីនា ឆ្នាំ ២០១៨ ដោយសារមានភាពរកាំរកូសជាមួយចៅហ្វាយនាយខ្លួននេះ។ រឿងដែលធ្ងន់ធ្ងរជាងគេ ពេលកំពុងកាន់តំណែង លោក ធីល័រសិន ថែមទាំងធ្លាប់ហៅលោក ត្រាំ ជាមនុស្សឆ្កួតថែមទៀត។
ត្រឡប់មកវិញ បន្ទាប់ពីបានឃើញបទសម្ភាសន៍ លោក ត្រាំ ខឹងឆេវ ហើយចេញមុខឆ្លើយតបទៅវិញទាំងកំហឹងដែរតាមរយៈសារ twitter របស់ខ្លួននៅថ្ងៃសុក្រទី ៧ ខែធ្នូ។ លោក ត្រាំ បានវាយប្រហារចំៗថា លោក ធីល័រសិន ជាមនុស្សឆ្កួតដែលមិនមានសមត្ថភាពខួរក្បាលគ្រប់គ្រាន់ដើម្បីធ្វើជាប្រមុខការទូតអាមេរិកឡើយ។
«ធីល័រសិនជាមនុស្សឆ្កួត ហើយខ្ញុំមិនបានបណ្តេញគាត់ចេញឲ្យបានលឿនជាងនេះសោះ។ គាត់ជាមនុស្សខ្ជិលច្រអូសរកគ្មាន។ ឥឡូវនេះស្ថានការណ៍ខុសប្លែកពីមុនទាំងស្រុង ហើយយើងមានស្មារតីធ្វើការងារល្អណាស់នៅក្រសួងការបរទេស»។ លោក ត្រាំ សរសេរបែបនេះពេលត្រឡប់មកពីសន្និសីទមួយស្តីពីបញ្ហាឧក្រិដ្ឋកម្មនៅទីក្រុងកាន់សាស។
ខណៈតិះដៀលអតីតរដ្ឋមន្ត្រីខ្លួន លោក ត្រាំ បានព្យាយាមកោតសរសើររដ្ឋមន្ត្រីការបរទេសដែលកំពុងស្ថិតក្នុងតំណែងលោក ម៉ៃ ប៉ុមប៉េអូ ថាធ្វើការងារបានល្អប្រសើរណាស់។ លោក ប៉ុមប៉េអូ តាមពិតទៅជាអតីតសមាជិកសភា និងជាអតីតប្រធានស្ថាប័នចារកម្មមជ្ឈិម (CIA)ដែរ។
តាមពិតទៅ មិនមែនជារឿងចម្លែកទេដែលលោក ត្រាំ ទិតៀនអតីតមន្ត្រីរបស់ខ្លួនពាសវាលពាសកាលដូចគ្នា។ កាលពីថ្មីៗនេះ លោក ត្រាំ បានថ្លែងរិះគន់អតីតរដ្ឋមន្ត្រីយុត្តិធម៌លោក Jeff Session ដែលទើបត្រូវបណ្តេញពីតំណែងកាលពីខែមុន។ លោក ត្រាំ និយាយថា លោក Session គ្មានសមត្ថភាពធ្វើការងារទេដ្បិតថាលោកមិនព្រមបញ្ឈប់ការស៊ើបអង្កេតករណីលូកលាន់ចូលក្នុងការឃោសនាបោះឆ្នោតឆ្នាំ ២០១៦ ពីសំណាក់រុស្ស៊ីដែរ។