ជាតិ
សេដ្ឋកិច្ច
បក្សប្រជាជន ប្រជុំបីថ្ងៃ ពីវិធីធ្វើឲ្យកម្ពុជា មានចំណូលមធ្យមកម្រិតខ្ពស់ នៅឆ្នាំ២០៣០ សន្និបាតរបស់គណៈកម្មាធិការកណ្តាលគណបក្សប្រជាជនកម្ពុជា កាលពីឆ្នាំ២០១៦។ រូបពីគណបក្សប្រជាជនកម្ពុជា
× គណៈកម្មាធិការកណ្តាលគណបក្សប្រជាជនកម្ពុជា នឹងធ្វើសន្និបាតរយៈពេល៣ថ្ងៃ គឺចាប់ពីថ្ងៃទី១៨ ដល់ថ្ងៃ២០ ខែធ្នូ ឆ្នាំ២០១៨ ដើម្បីពិភាក្សាពីការអភិវឌ្ឍសេដ្ឋកិច្ច ជាពិសេសផ្តោតសំខាន់ទៅលើប្រាក់ចំណូលរបស់ប្រជាជន។
សម្តេច ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សកាន់អំណាច បានប្រកាសពីកិច្ចប្រជុំនេះ ក្នុងឱកាសចូលរួមធ្វើជាអធិបតីនៃពិធីសម្ពោធដាក់ឲ្យប្រើប្រាស់វារីអគ្គិសនីសេសាន២ នៅខេត្តស្ទឹងត្រែង នាព្រឹកថ្ងៃទី១៧ ខែធ្នូ ឆ្នាំ២០១៨។ មេដឹកនាំរូបនេះ បានថ្លែងយ៉ាងដូច្នេះថា៖«គណបក្សប្រជាជនកម្ពុជា នឹងប្រើពេលបីថ្ងៃ ដើម្បីពិភាក្សាអំពីកិច្ចការទាំងឡាយ ដែលខ្លួនត្រូវធ្វើចំពោះមុខការជឿទុកចិត្តរបស់ប្រជាជន ធ្វើយ៉ាងម៉េចនាំប្រទេសរបស់យើង ដែលមានប្រាក់ចំណូលមធ្យមកម្រិតទាប ឲ្យទៅជាប្រទេស មានប្រាក់ចំណូលមធ្យមកម្រិតខ្ពស់ នៅឆ្នាំ២០៣០»។
រាល់មន្ត្រីរាជការ ដែលជាមន្ត្រីគណបក្សប្រជាជនកម្ពុជា ហើយត្រូវចូលរួមក្នុងកិច្ចប្រជុំនេះ ត្រូវសុំច្បាប់សម្រាកក្នុងអំឡុង៣ថ្ងៃនេះ។ ប្រធានគណបក្សកាន់អំណាច លើកឡើងបែបនេះថា៖«សង្ឃឹមថា មន្ត្រីរាជការទាំងអស់ បានសុំច្បាប់រួចរាល់អស់ហើយ ដើម្បីចូលធ្វើការងារបក្ស»។
លោក ឈឹម ផលវរុណ អ្នកនាំពាក្យម្នាក់របស់គណបក្សកាន់អំណាច បានប្រាប់សារព័ត៌មានថ្មីៗ តាមទូរសព្ទបន្ថែមថា សមាជិកគណៈកម្មាធិការកណ្តាល មានប្រមាណ៥០០ទៅ៦០០នាក់ រួមទាំងថ្នាក់ដឹកនាំតាមក្រសួងផ្សេងទៀត នឹងត្រូវចូលរួមកក្នុងកិច្ចប្រជុំនេះ។ លោក បន្តថា បញ្ហាប្រាក់ចំណូលរបស់ប្រជាជន គឺជាប្រធានបទស្នូលនៃកិច្ចប្រជុំ។
អ្នកនាំពាក្យរូបនេះ បញ្ជាក់យ៉ាងដូច្នេះថា៖«គណបក្សប្រជាជនកម្ពុជា ក្រោមការដឹកនាំរបស់សម្តេច ហ៊ុន សែន មានមហិច្ឆតានិងបានប្តេជ្ញាថា ធ្វើឲ្យកម្ពុជា ក្លាយជាប្រទេស ដែលមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០។ យើងសង្ឃឹមថា យើងនឹងអាចសម្រេចបាន»។
លោក ឈឹម ផលវរុណ បន្តថា ក្រៅពីប្រធានស្នូលនេះ កិច្ចប្រជុំរបស់គណៈកម្មាធិការកណ្តាល នឹងបូកសរុបកិច្ចការងារគណបក្សកន្លងមក និងលើកឡើងពីចំណុចខ្លាំងនិងចំណុចខ្សោយ ជាពិសេសកំណត់គោលនយោបាយ ទៅមុខទៀត។
សូមបញ្ជាក់ថា សន្និបាតរបស់គណៈកម្មាធិការកណ្តាលគណបក្សប្រជាជនកម្ពុជា តែងធ្វើឡើង២ដង ក្នុង១ឆ្នាំ៕
Tag:
ហ៊ុន សែន
CPP
ឈឹម ផលរុណ
GDP
© រក្សាសិទ្ធិដោយ thmeythmey.com