អន្តរជាតិ
×![]()
ដោយ: តន ចាន់រិទ្ធារ៉ា
នៅចុងសប្ដាហ៍មុន សភាគុយបាបានអនុម័តលើសេចក្ដីព្រាងរដ្ឋធម្មនុញ្ញថ្មី ដែលនឹងជំនួសរដ្ឋធម្មនុញ្ញបន្សល់ពីសម័យសង្គ្រាមត្រជាក់។ ក្នុងសេចក្ដីព្រាងរដ្ឋធម្មនុញ្ញនេះ បក្សកុម្មុយនីស្តគុយបា នឹងនៅតែជាកម្លាំងចលករដ៏សំខាន់របស់ប្រទេសនេះដដែល ហើយរដ្ឋក៏បន្តគ្រប់គ្រងលើសេដ្ឋកិច្ចជាតិទៀត ប៉ុន្តែនឹងផ្ដល់ភាពស្របច្បាប់ដល់កម្មសិទ្ធិឯកជនដែលកំពុងកើនឡើង។ អ្វីគួរចាប់អារម្មណ៍ គុយបាក៏នឹងមានប្រព័ន្ធដឹកនាំរដ្ឋថ្មីផងដែរ។
សេចក្ដីព្រាងរដ្ឋធម្មនុញ្ញថ្មីរបស់គុយមាន២២៩មាត្រា ឆ្លងផុតសភាដែលមានសមាជិកសុទ្ធតែមកពីបក្សកុម្មុយនីស្តគុយបា។ ជំហានបន្ទាប់ សេចក្ដីព្រាងរដ្ឋធម្មនុញ្ញនេះ នឹងត្រូវដាក់ឲ្យបោះឆ្នោតក្នុងប្រជាមតិថ្ងៃទី២៤ ខែកុម្ភៈខាងមុខ។
បើតាមការផ្សាយរបស់សារព័ត៌មានរដ្ឋគុយបា ក្នុងច្បាប់កំពូលថ្មីនេះ គុយបានៅតែអនុវត្តនយោបាយបែបកុម្មុយនីស្ត ហើយបក្សកុម្មុយនីស្តគុយបា នឹងបន្តដឹកនាំប្រទេសដដែល។ យ៉ាងណាក្ដី កម្មសិទ្ធិឯកជន នឹងត្រូវបានទទួលស្គាល់ដោយច្បាប់ ហើយគុយបា ក៏ទទួលស្គាល់សារសំខាន់នៃការវិនិយោគពីបរទេស និងបើកទ្វារចំហដល់ការរៀបអាពាហ៍ពិពាហ៍ភេទដូចគ្នាផង។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ការរៀបការរវាងភេទដូចគ្នានេះ ជារឿងចម្រូងចម្រាសមួយនៅគុយបា។ ក្រុមអ្នកការពារសិទ្ធិអ្នកស្រលាញ់ភេទដូចគ្នាបានស្នើឲ្យមានការលុបចោលនិយមន័យក្នុងច្បាប់ដែលកំណត់ថា អាពាហ៍ពិពាហ៍ជាការរួមរស់ជាមួយគ្នារវាងមនុស្សប្រុស និងមនុស្សស្រី ដោយប្តូរទៅជា «ការរួមរស់ជាមួយគ្នារវាងមនុស្សពីរនាក់» ដោយមានសិទ្ធិ និងកាតព្វកិច្ចស្មើគ្នាវិញ។ គណៈកម្មការតាក់តែងរដ្ឋធម្មនុញ្ញ បានស្នើយោបល់ពីប្រជាជនលើរឿងនេះ តែរងការជំទាស់ខ្លាំង ហើយក៏ដកចេញពីសេចក្ដីព្រាងតែម្ដង។
ជំនួសឲ្យការកំណត់និយមន័យច្បាស់លាស់លើការរៀបការរបស់ភេទដូចគ្នា សេចក្ដីព្រាងរដ្ឋធម្មនុញ្ញថ្មីរបស់រដ្ឋសង្គមមួយនេះ បានចំហទ្វារសម្រាប់វិសោធនកម្មនៅពេលអនាគត បើសិនជាកាលៈទេសៈអំណោយផលនោះ។
អ្វីគួរឲ្យកត់សម្គាល់ជាងគេក្នុងសេចក្ដីព្រាងរដ្ឋធម្មនុញ្ញថ្មីនេះ គឺជាការកំណត់អាណត្តិ និងអាយុរបស់ប្រធានាធិបតី ព្រមទាំងការបង្កើតតំណែងនាយករដ្ឋមន្ត្រីដែរ។ អតីតប្រធានាធិបតី ហ្វីដែល កាស្ត្រូ និង រ៉ាអ៊ូល កាស្ត្រូ បានកាន់តំណែងប្រធានាធិបតីសរុបជាង៦ទសវត្សរ៍ មុនពេលលោក Miguel Diaz-Canel ក្លាយជាប្រធានាធិបតីនៅឆ្នាំ២០១៨ នេះ។ យ៉ាងណាមិញ លោក រ៉ាអ៊ូល នៅបន្តកាន់តំណែងអគ្គលេខាបក្សដល់ឆ្នាំ២០២១ ៕
Tag:
គុយបា
© រក្សាសិទ្ធិដោយ thmeythmey.com
