អន្តរជាតិ
អ្នកនយោបាយថៃវ័យ៧៤ឆ្នាំម្នាក់ចង់ក្លាយជានាយករដ្ឋមន្ត្រី ដោយយកគំរូតាមលោកមហាធៀ លោកមហាធៀ មហាម៉ាត់ នាយករដ្ឋមន្ត្រីម៉ាឡេស៊ី (ឆ្វេង), លោក Wan Nor ប្រធានគណបក្ស Prachachart (ស្តាំ)
× អ្នកនយោបាយជើងចាស់មួយរូប ឈ្មោះថា Wan Muhamad Noor Matha ដែលត្រូវបានគេស្គាល់ថា Wan Nor បាននិយាយថា លោកអាចក្លាយជានាយករដ្ឋមន្ត្រីថៃ ដោយយកគំរូតាមភាពជោគជ័យរបស់នាយករដ្ឋមន្ត្រីម៉ាឡេស៊ី មហាធៀ មហាម៉ាត់។
ថ្លែងនៅក្នុងកម្មវិធីរបស់បក្សមួយ នៅថ្ងៃអាទិត្យទី២៣ ខែធ្នូ លោក Wan Nor ដែលសព្វថ្ងៃជាប្រធានគណបក្ស Prachachart បានបញ្ជាក់ថា លោកត្រៀមខ្លួនរួចរាល់ក្នុងការប្រើប្រាស់គំរូនៃភាពជោគជ័យរបស់លោកមហាធៀ ដើម្បីក្លាយជានាយករដ្ឋមន្ត្រីថៃ។ ទោះបីជាយ៉ាងនេះក្តី លោកសង្ឃឹមថា បក្សលោកអាចដណ្តើមកៅអីបានត្រឹម២០ប៉ុណ្ណោះក្នុងសភា ក្នុងការបោះឆ្នោតថ្នាក់ជាតិនាពេលខាងមុខ។
ស្ថិតក្នុងវ័យ៧៤ឆ្នាំ លោក Wan Nor ធ្លាប់មានបទពិសោធន៍នយោបាយក្រាស់ក្រែល ក្នុងនោះរួមមាន ជាអតីតប្រធានសភាថៃ និងអតីតរដ្ឋមន្ត្រីដឹកជញ្ជូនជាដើម។ បើតាមកាសែត Bangkok Post លោកបានលើកឡើងបែបនេះ៖«វាមិនមែនត្រឹមជាក្តីស្រមៃឡើយ ក្នុងការក្លាយជានាយករដ្ឋមន្ត្រីនោះ។ នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានបង្កើតប្រវត្តិសាស្ត្រ ដោយក្លាយជានាយកដ្ឋមន្ត្រីចាស់ជាងគេបំផុតក្នុងលោក ទោះបីជាគណបក្សលោកកាន់កាប់ត្រឹម១៤កៅអីប៉ុណ្ណោះក្នុងរដ្ឋសភា»។
ទាក់ទិននឹងគោលនយោបាយរបស់បក្សវិញ លោក Wan Nor បានគូសបញ្ជាក់ថា គណបក្សលោកគឺប្រឆាំងដាច់ខាតទៅនឹងអំពើភេរវកម្ម និងអំពើហិង្សាគ្រប់ទម្រង់ទៅលើប្រជាជន ព្រមទាំងរដ្ឋប្រហារយោធាផងដែរ។ សុភមង្គលពិតប្រាកដរបស់ជាតិ គឺពឹងផ្អែកលើសុភមង្គលប្រជាជនតែម្តង។
គួរបញ្ជាក់ផងដែរថា លោក មហាធៀ ដែលក្នុងឆ្នាំនេះបានក្លាយជាប្រធានសម្ព័ន្ធភាព Pakatan Harapan បានឈ្នះការបោះឆ្នោតថ្នាក់ជាតិឆ្នាំ២០១៨។ ស្ថិតក្នុងវ័យ៩៣ឆ្នាំ លោកបានស្បថចូលកាន់តំណែងជានាយករដ្ឋមន្ត្រីម៉ាឡេស៊ី កាលពីថ្ងៃ១០ ខែឧសភា ឆ្នាំ២០១៨កន្លងទៅ៕
Tag:
ថៃ
នយោបាយ
មហាធៀ មហាម៉ាត់
© រក្សាសិទ្ធិដោយ thmeythmey.com