កីឡាជាតិ
ជាតិ
លោក កែវ រ៉េមី ស្នើគ្រូឧទ្ទេស ITF ចូលរួមពង្រឹងសុក្រឹតភាពក្នុងកាត់ក្តីការប្រកួតលំដាប់ពិភពលោក លោក កែវ រ៉េមី (ស្តាំ) និងលោក Kim Ung Chol ចូលរួមបើកវគ្គបណ្តុះបណ្តាលចៅក្រមកីឡាតេក្វាន់ដូ ITF
× គ្រូឧទ្ទេសខ្សែក្រវាត់ខ្មៅ៩ដាន់ លោក Kim Ung Chol ប្រធានគណៈកម្មការរៀបចំការប្រកួតអន្តរជាតិមកពីប៊ុលហ្គារី បានចែករំលែកបទពិសោធ និងបច្ចេកទេសកីឡាតេក្វាន់ដូ ITF ដល់ចៅក្រម គ្រូបង្វឹក និងកីឡាករកម្ពុជា។ តាមរយៈគ្រូឧទ្ទេសនេះ លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ស្នើឲ្យអាជ្ញាកណ្តាល ចៅក្រមអន្តរជាតិ ដែលចូលរួមកាត់ក្តីក្នុងការប្រកួតជើងឯកពិភពលោកនៅប្រទេសប៊ុលហ្គារីឆ្នាំ២០១៩ ខាងមុខ កាត់ក្តីឲ្យយុត្តិធម៌ដល់កម្ពុជា។
ប្រធានសហព័ន្ធកីឡាតេក្វាន់ដូ ITF កម្ពុជាលោក កែវ រ៉េមី ស្នើឲ្យអាជ្ញាកណ្តាល ចៅក្រមអន្តរជាតិ ដែលចូលរួមកាត់ក្តីក្នុងការប្រកួតជើងឯកពិភពលោកនៅប្រទេសប៊ុលហ្គារីនាឆ្នាំ២០១៩ ខាងមុខ កាត់ក្តីឲ្យយុត្តិធម៌សម្រាប់កីឡាករកម្ពុជា។ សំណើរនេះ ត្រូវបានលោក កែវ រ៉េមី ស្នើតាមរយៈលោក Kim Ung Chol ប្រធានគណៈកម្មការរៀបចំការប្រកួតអន្តរជាតិ ដែលជាគ្រូឧទ្ទេសក្នុងវគ្គបណ្តុះបណ្តាលចៅក្រមកីឡាតេក្វាន់ដូ ITF។
ការស្នើបែបនេះរបស់លោក កែវ រ៉េមី បន្ទាប់ពីលោកយល់ថា អាជ្ញាកណ្តាល ចៅក្រមអន្តរជាតិនៅប៉ែកអឺរ៉ុបមួយចំនួន កាត់ក្តីមិនឈរលើគោលការណ៍យុត្តិធម៌ ដែលជាហេតុធ្វើឲ្យកម្ពុជាពិបាកក្នុងការប្រជែងដណ្តើមមេដាយកម្រិតពិភពលោក។ «យើងហៅគ្រូឧទ្ទេសមកពីប៊ុលហ្គារី គឺចំតែម្តង ដោយសារនៅឆ្នាំ២០១៩ ការប្រកួតជើងឯកពិភពលោកគេរៀបចំនៅប្រទេសប៊ុលហ្គារីតែម្តង។ ដូច្នេះតាមរយៈលោក Kim Ung Chol ប្រធានគណៈកម្មការរៀបចំការប្រកួតអន្តរជាតិ យើងនឹងស្នើតាមរយៈគាត់ ឲ្យប្រាប់ចៅក្រមអន្តរជាតិនៅប៉ែកអឺរ៉ុប កាត់ក្តីឲ្យយុត្តិធម៌សម្រាប់កម្ពុជា»។ ការលើកឡើងបែបនេះរបស់លោក កែវ រ៉េមី ធ្វើឡើងក្នុងពិធីបើកវគ្គបណ្តុះបណ្តាលចៅក្រមកីឡាតេក្វាន់ដូ ITF កាលពីថ្ងៃទី២២ ខែធ្នូ ឆ្នាំ២០១៨។
វគ្គបណ្តុះបណ្តាលចៅក្រមកីឡាតេក្វាន់ដូ ITF ក្រោមបទឧទ្ទេសរបស់គ្រូបង្វឹកជនជាតិកូរ៉េខ្សែក្រវាត់ខ្មៅ៩ដាន់ លោក Kim Ung Chol មកពីប៊ុលហ្គារី មានសិក្ខាកាម៥៨រូបចូលរួម។ វគ្គបណ្តុះបណ្តាលផ្តោតទាំងទ្រឹស្តី និងការអនុវត្តនេះ រៀបចំចន្លោះពីថ្ងៃទី២១-២៤ ខែធ្នូ ឆ្នាំ២០១៩។ វគ្គនេះផ្តោតសំខាន់លើបច្ចេកទេសកាត់ក្តីលើវិញ្ញាសាសម្តែងមេគុន។
«ដើម្បីឲ្យអាជ្ញាកណ្តាល ចៅក្រម មានសុក្រិតភាពក្នុងការកាត់ក្តី យើងត្រូវមានវគ្គបំប៉នលើបច្ចេកទេសមេគុន ព្រោះលក្ខណវិនិច្ឆ័យលើវិញ្ញាសាមេគុន យើងផ្តោតលើ៤ចំណុច ភាពជាក់លាក់ លំនឹង ការគ្រប់គ្រងដណ្តើម និងរលកនៃការវាយ។ បើពួកគាត់មិនយល់ពីបច្ចេកទេសទាំងនេះទេ នឹងធ្វើឲ្យការកាត់ក្តីក្នុងការប្រកួតមានភាពលំអៀង»។ នេះជាគោលបំណងនៃវគ្គបណ្តុះបណ្តាលចៅក្រម ដែលលើកឡើងដោយលោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា។
ធនធានអាជ្ញាកណ្តាលចៅក្រមកីឡាតេក្វាន់ដូ ITF ទាំងកម្រិតជាតិនិងអន្តរជាតិនៅមានចំនួនតិចតួចនៅឡើយ។ បើតាមលោក បួនហ៊ីង សុធីយ៉ា បច្ចុប្បន្នសហព័ន្ធមានអាជ្ញាកណ្តាលចៅក្រមអន្តរជាតិតែពីររូបប៉ុណ្ណោះ គឺលោក បួនហ៊ីង សុធីយ៉ា និងលោក ហ៊ឹម លីដា។ ដើម្បីវិវត្តខ្លួនពីអាជ្ញាកណ្តាលចៅក្រមជាតិទៅអន្តរជាតិ កីឡាករនីមួយៗត្រូវមានកម្រិតខ្សែក្រវាត់ខ្មៅ៤ដាន់ជាមុនសិន មុនប្រឡងយកសញ្ញាបត្រពីសហព័ន្ធកីឡាតេក្វាន់ដូ ITF អន្តរជាតិ។
អគ្គលេខាធិការខាងលើរំពឹងថា សិក្ខាកាមទាំង៥៨រូបខាងលើនឹងទទួលបានចំណេះដឹងថ្មីៗដើម្បីអភិវឌ្ឍសមត្ថភាពក្នុងការកាត់ក្តីឲ្យកាន់តែល្អប្រសើរ ពិសេសនឹងយកចំណេះដឹងទាំងនេះទៅចែករំលែកដល់ក្មេងៗជំនាន់ក្រោយនៅតាមមូលដ្ឋានរៀងៗខ្លួន៕
Tag:
តេក្វាន់ដូ ITF
កែវ រ៉េមី
បួនហ៊ីង សុធីយ៉ា
© រក្សាសិទ្ធិដោយ thmeythmey.com