អន្តរជាតិ
បងធំអាស៊ានឥណ្ឌូណេស៊ី ដាក់ដំណើរការមូលដ្ឋានទ័ពក្បែរសមុទ្រចិនខាងត្បូងទប់ស្កាត់ការឈ្លានពីខាងក្រៅ
× រដ្ឋាភិបាលក្រុងហ្សាការតា ថ្មីៗនេះ បានដំណើរការមូលដ្ឋានកងទ័ពមួយ ដែលមានទីតាំងក្បែរសមុទ្រចិនខាងត្បូង ដែលជាកន្លែងឥណ្ឌូណេស៊ី និងចិន ធ្លាប់មានរឿងប្រទាំងប្រទើសជាមួយនឹងគ្នា។ ការសម្រេចបើកមូលដ្ឋានកងទ័ពនេះ ធ្វើឡើងក្នុងគោលដៅដើម្បីទប់ទល់ជាមួយនឹងការគំរាមកំហែងសន្តិសុខពីបណ្តាប្រទេសខាងក្រៅ។
រដ្ឋាភិបាលឥណ្ឌូណេស៊ី នៅថ្ងៃ ១៨ ធ្នូកន្លងទៅ បានប្រកាសដំណើរការមូលដ្ឋានកងទ័ពមួយនៅលើប្រជុំកោះ Natuna ជាមួយនឹងការប្តេជ្ញាចិត្តការពារមិនឲ្យរដ្ឋខាងក្រៅណាមួយមកបំពានដែនអធិបតេយ្យ និងសន្តិសុខរបស់ខ្លួនបានឡើយ។ នេះបើយោងតាមការចុះផ្សាយរបស់សារព័ត៌មាន South China Morning Post។
នាឱកាសនៃកម្មវិធីប្រកាសដំណើរការជាផ្លូវការ មេទ័ពជើងគោកឥណ្ឌូណេស៊ី លោក Marshal Hadi Tjahjanto បានអះអាងថា មូលដ្ឋាននេះ ត្រូវបានសាងសង់ឡើងដើម្បីបម្រើការងារការពារ និងប្រឆាំងទៅនឹងការគំរាមកំហែងសន្តិសុខ ជាពិសេសនោះនៅតាមតំបន់ព្រំដែនតែម្តង។
តាមប្រភពព័ត៌មានដដែលនោះមួយថ្ងៃបន្ទាប់ពីការប្រកាសដាក់ដំណើរការមូលដ្ឋាននេះ ប្រធានាធិបតី ឥណ្ឌូណេស៊ី លោក ចូកូ វីដូដូ ក៏បានចេញថ្លែងការណ៍ម៉ឺងម៉ាត់ពីការត្រៀមខ្លួនរួចជាស្រេចក្នុងការបង្ហាញពីភាពជាម្ចាស់នៃតំបន់ប្រជុំកោះ Natuna ដែលមានប្រជាជនរស់នៅប្រមាណជាង១៦ម៉ឺននាក់ហើយនោះ។
ខណៈមិនបញ្ចេញឈ្មោះភាគីដែលប៉ុនប៉ងរំលោភលើតំបន់ Natuna នោះ លោកប្រធានាធិបតី បានសង្កត់ធ្ងន់យ៉ាងដូច្នេះថា៖« ប្រសិនបើអ្នកឲ្យយើង ប្រយុទ្ធ គ្មានបញ្ហាឡើយ។ យើង អាចប្រយុទ្ធបាន»។
សូមជម្រាបផងដែរថា ប្រជុំកោះ Natuna ជាបណ្តុំកោះដែលសំបូរទៅដោយធនធានធម្មជាតិដែលឥណ្ឌូណេស៊ី បានអះអាងថាស្ថិតនៅក្នុងតំបន់សេដ្ឋកិច្ចផ្តាច់មុខរបស់ខ្លួន។ Natuna ក៏ស្ថិតនៅក្បែរតំបន់ជម្លោះសមុទ្រចិនខាងត្បូង ដែលមានចិន ជាភាគី ប្រកាសជាម្ចាស់កម្មសិទ្ធិស្ទើរតែទាំងស្រុកនៃតំបន់នោះ។
នៅឆ្នាំ២០១៦កន្លងទៅ ឥណ្ឌូណេស៊ី និងចិន បានមានការប្រឈមមុខផ្នែកការទូតគ្នាខ្លាំង ក្រោយពីឥណ្ឌូណេស៊ី បានរឹបអូសនាវានេសាទរបស់ពលរដ្ឋចិន ដោយឥណ្ឌូណេស៊ី ចោទថា បានបំពានចូលក្នុងដែនអធិបតេយ្យខ្លួនក្នុងតំបន់ Natuna។ គឺពេលនោះហើយ ដែលឥណ្ឌូណេស៊ី ប្រកាសសាងសង់មូលដ្ឋានកងទ័ពនៅទីនោះ ហើយថែមទាំងប្តេជ្ញាមិនឲ្យបាត់បង់ទឹកដីរបស់ខ្លួនសូម្បីមួយសង់ទីម៉ែតក៏ដោយ៕
Tag:
ឥណ្ឌូណេស៊ី
ចិន
អាស៊ាន
© រក្សាសិទ្ធិដោយ thmeythmey.com