អន្តរជាតិ
សមាជិកសភាហ្វីលីពីន ស្នើយកថ្ងៃ ១២កក្កដា ជាថ្ងៃឈប់សម្រាកប្រារព្ធជ័យជម្នះសមុទ្រចិនខាងត្បូង
× សមាជិកសភាមួយរូបរបស់ហ្វីលីពីន បានដាក់សំណើសេចក្តីព្រាងច្បាប់មួយស្តីការឈប់សម្រាក ឬបុណ្យជាតិរយៈពេលមួយថ្ងៃ ដើម្បីរម្លឹកពីជ័យជម្នះ នៃការចេញសាលក្រមតុលាការមជ្ឈត្តការអចិន្ត្រៃយ៍ទីក្រុងឡាអេលើសំណុំរឿងសមុទ្រចិនខាងត្បូងជាមួយចិន។ សំណើរបស់សមាជិកសភារូបនេះ ក៏ធ្វើឡើងក្នុងគោលបំណងដើម្បីបណ្តុះស្មារតីប្រជាជនហ្វីលីពីនឲ្យស្រលាញ់សមុទ្រចិនខាងត្បូងផងដែរ។
តំណាងរាស្ត្រហ្វីលីពីនមួយ គឺលោក Alejano, Gary C មកពីក្រុង Quezon បានថ្លែងប្រាប់សារព័ត៌មាន South China Morning Post ថា លោក ចង់ឲ្យមានថ្ងៃបុណ្យជាតិមួយថ្ងៃដើម្បីរម្លឹកដល់សាលក្រមទីក្រុងឡាអេ ស្តីពីជ័យជម្នះរបស់ហ្វីលីពីនលើរឿងក្តីសមុទ្រចិនខាងត្បូង ដែលហ្វីលីពីនហៅថា សមុទ្រខាងលិចហ្វីលីពីននោះ។
តាមប្រភពព័ត៌មានដដែលនោះ អ្នកតំណាងរាស្ត្ររូបនេះ បានអះអាងថា តាមរយៈសំណើនៃសេចក្តីព្រាងច្បាប់ស្តីពីការដាក់ថ្ងៃ១២ កក្កដា ជាថ្ងៃឈប់សម្រាក នឹងអាចបណ្តុះស្មារតីរបស់ពលរដ្ឋហ្វីលីពីន និងមោទកភាពរបស់ជាតិផងដែរ។ អ្នកតំណាងរាស្ត្រ ក៏បានបន្ថែមផងដែរថា ការណ៍ ដែលលោក ធ្វើសំណើបែបនេះ ក៏ព្រោះតែលោក មិនពេញចិត្តលើចំណាត់ការរបស់រដ្ឋាភិបាល ដែលហាក់ដូចជាមិនសូវអើពើនឹងសាលក្រមមួយនេះ។
តាមអ្នកតំណាងរាស្ត្រ ដែលជាអ្នករិះគន់លោកប្រធានាធិបតី រ៉ូឌ្រីហ្គោ ឌូទើតេ មិនសំចៃមាត់ផងដែរនោះ ប្រសិនបើសេចក្តីព្រាងច្បាប់នេះ ត្រូវបានអនុម័តក្លាយជាច្បាប់មែននោះ អង្គភាពពាក់ព័ន្ធរបស់រដ្ឋាភិបាលហ្វីលីពីនមួយចំនួនពិសេសវិស័យអប់រំ ក៏តម្រូវឲ្យដាក់បញ្ចូលជាព្រឹត្តិការណ៍័ប្រវត្តិសាស្ត្រនៃជ័យជម្នះហ្វីលីពីនប្រឆាំងនឹងចិនទៅក្នុងកម្មវិធីសិក្សាផងដែរ។
គួររម្លឹកផងដែរថា នៅថ្ងៃទី១២ កក្កដា ឆ្នាំ២០១៦ មជ្ឈត្តការនៃតុលាការអចិន្ត្រៃយ៍ ក្រុងឡាអេ នៃប្រទេសហូឡង់ បានប្រកាសសាលក្រមជាឯកច្ឆ័នលើបណ្តឹងរបស់ហ្វីលីពីនប្រឆាំងចិន។ សាលក្រមលក្ខណៈចាប់បង្ខំនេះ បានបកស្រាយថា ចិន មិនមានមូលដ្ឋានផ្នែកច្បាប់ទាក់ទងនឹងសិទ្ធិប្រវត្តិសាស្ត្រដើម្បីទាមទារលើតំបន់ចំណុចទាំងប្រាំបួនត្រេ(Nine-Dash Line) ដែលស្ទើរតែស្មើនឹងតំបន់ទាំងស្រុងនៃសមុទ្រចិនខាងត្បូងឡើយ។
ដំណើរការរឿងក្តីរបស់ហ្វីលីពីនប្រឆាំងនឹងចិនពេលនោះ មិនមានការចូលរួមពីភាគីចិនឡើយ ដែលហេតុនេះហើយ ធ្វើឲ្យរដ្ឋាភិបាលចិន ប្រកែកមិនទទួលស្គាល់ សាលក្រម និងថែមទាំងចាត់ទុកសាលក្រមនោះ ដូចជាសម្រាមយ៉ាងដូច្នេះឯង។ គួរកត់សម្គាល់នោះ ទោះបីមានសាលក្រមនេះនៅនឹងដៃក៏ដោយ រដ្ឋាភិបាលហ្វីលីពីនរបស់លោក ឌូទើតេ មិនដែលអនុវត្តឡើយ ដោយសារមិនចង់មានជម្លោះជាមួយនឹងចិន។
សមុទ្រចិនខាងត្បូង គឺជាដែនអធិបតេយ្យមួយ ដែលមានរឿងចម្រូងចម្រាស់នៃការកម្មសិទ្ធិគ្រប់គ្រង។ រដ្ឋអាស៊ាន រួមមាន ព្រុយណេ ម៉ាឡេស៊ី ហ្វីលីពីន និងវៀតណាម បានទាមទារគ្រប់គ្រងតំបន់មួយចំនួននៃសមុទ្រនេះ តាមច្បាប់អន្តរជាតិ ខណៈ ចិន ប្រកាសខ្លួនថា ជាម្ចាស់កម្មសិទ្ធិនៃដែនសមុទ្រនេះស្ទើរតែទាំងស្រុងតែម្តង៕
Tag:
ចិន
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com