អន្តរជាតិ
×![]()
កាលចុងសប្តាហ៍កន្លងទៅ ចិន និងអាមេរិកបានឈានដល់ការសម្រេច «ដំណើរការថ្មី»មួយស្របពេលដែលភាគីផ្អាកសង្គ្រាមពាណិជ្ជកម្មរយៈពេល ៩០ថ្ងៃសិន។ នេះបើតាមសេចក្តីថ្លែងការណ៍របស់ក្រសួងពាណិជ្ជកម្មចិនកាលពីថ្ងៃទីអាទិត្យ ទី២៣ ខែធ្នូក្រោយជំនួបថ្នាក់អនុរដ្ឋមន្ត្រីកាលពីពីរថ្ងៃមុន។ 
យោងតាមសេចក្តីថ្លែងការណ៍ក្រសួងពាណិជ្ជកម្មចិន ភាគីអាមេរិក និងចិនបានរៀបចំកិច្ចពិភាក្សាកម្រិត«អនុរដ្ឋមន្ត្រី»មួយ តាមទូរសព្ទកាលពីសុក្រកន្លងទៅ។ក្នុងកិច្ចពិភាក្សានេះ ភាគីទាំងពីរបានពិភាក្សាគ្នាលើបញ្ហាសំខាន់ៗមួយចំនួន ក្នុងនោះក៏មាន តុល្យភាពពាណិជ្ជកម្ម និងការពង្រឹងកិច្ចការពារកម្មសិទ្ធិបញ្ញាជាដើម ដែលជាបញ្ហារសើបបំផុតនៅក្នុងសង្គ្រាមពាណិជ្ជកម្មរវាងអាមេរិកនិងចិន។
មិនត្រឹមតែប៉ុណ្ណោះ ក្រសួងពាណិជ្ជកម្មចិន បានបញ្ជាក់ទៀតថា ភាគីទាំងពីរក៏បានពិភាក្សាស្តីពីគម្រោងរៀបចំជំនួបលើកក្រោយៗទៀតផងដែរ។ នេះគឺជំនួបតាមទូរសព្ទលើកទីពីរហើយក្នុងពេលត្រឹមមួយសប្តាហ៍ប៉ុណ្ណោះ រវាងក្រុងវ៉ាស៊ីនតោន និងក្រុងប៉េកាំង ក្នុងគោលដៅពិភាក្សារកផ្លូវដោះស្រាយបញ្ហាជម្លោះពាណិជកម្ម ដែលកំពុងឆាបឆេះ។
ទន្ទឹមនឹងនេះដែរ សភាក្រុងប៉េកាំងបានប្រកាសកាលពីថ្ងៃអាទិត្យទី២៣ ខែធ្នូថា ខ្លួនកំពុងសិក្សាលើច្បាប់គ្រប់គ្រងលើការវិនិយោគបរទេសថ្មីមួយដែលការពារការលួចយកបច្ចេកវិទ្យា និងសិទ្ធិផ្សេងទៀតរបស់បណ្តាក្រុមហ៊ុនបរទេស និងក្រុមហ៊ុនចិនដែរ។ គម្រោងតាក់តែងច្បាប់ថ្មីនេះ ទំនងជាឆ្លើយតប ការរិះគន់របស់របស់ក្រុមមន្ត្រីមកពីបណ្តាប្រទសលោកខាងលិច ជុំវិញការលួចយកបច្ចេកវិទ្យា និងកម្មសិទ្ធិបញ្ញា ព្រមទាំងភាពអយុត្តិធម៌នៃការបើកចំហទ្វារទីផ្សារចិន ដើម្បីទទួលយកក្រុមហ៊ុនបរទេសជាដើម។
គួរបញ្ជាក់ថា ការផ្អាកសង្គ្រាមពាណិជ្ជកម្មរយៈពេល៩០ថ្ងៃ ដែលមានគោលដៅរកផ្លូវដោះស្រាយការខ្វែងគំនិតគ្នារវាងអាមេរិក និងចិនក្នុងបញ្ហាពាណិជ្ជកម្ម ត្រូវបានធ្វើឡើងរវាងប្រធានាធិបតីអាមេរិក ដូណាល់ ត្រាំ និងសមភាគីចិន ស៊ី ជិនភីង កាលពីដើមខែធ្នូ នៅក្រៅកិច្ចប្រជុំ G-20 នៅអាហ្សង់ទីន៕
Tag:
សង្គ្រាមពាណិជ្ជកម្ម
សេដ្ឋកិច្ច
អាមេរិក
ចិន
© រក្សាសិទ្ធិដោយ thmeythmey.com
