អ្នកវិទ្យាសាស្ត្រចិនម្នាក់ត្រូវបណ្តេញពីបក្ស ដោយសង្ស័យថាបានទទួលសញ្ជាតិកាណាដា

អន្តរជាតិ

អ្នកវិទ្យាសាស្ត្រចិនម្នាក់ត្រូវបណ្តេញពីបក្ស ដោយសង្ស័យថាបានទទួលសញ្ជាតិកាណាដា

25, Dec 2018 , 9:19 pm

រូបភាព

លោក Bu Jianjie

ដោយ:

អាជ្ញាធរចិននៅថ្ងៃចន្ទទី ២៤ ខែធ្នូ បានឲ្យដឹងថា អ្នកវិទ្យាសាស្ត្រទទួលបន្ទុកផ្នែកនាវាមុជទឹកម្នាក់ ត្រូវបានបណ្ដេញពីបក្សកុម្មុយនីសចិន និងដាក់ឲ្យស្ថិតក្រោមការស៊ើបអង្កេត ពីបទបានទទួលសញ្ជាតិកាណាដាដោយខុសច្បាប់ និងសកម្មភាពមិនប្រក្រតីផ្សេងៗទៀត។

លោក Bu Jianjie អតីតប្រធានវិទ្យាស្ថានស្រាវជ្រាវ 718 នៃឧស្សាហកម្មសាងសង់នាវាចិន កំពុងប្រឈមមុខនឹងការស៊ើបអង្កេតផ្នែកព្រហ្មទណ្ឌលើសំណុំរឿងជាច្រើនករណី។ យោងតាមសេចក្តីថ្លែងការណ៍មួយ របស់គណៈកម្មការកណ្តាលសម្រាប់ត្រួតពិនិត្យវិន័យចិន បានឲ្យដឹងថា៖ «លោក Bu Jianjie បានល្មើសនឹងបទបញ្ជារបស់បក្ស ដោយពុំបានរាយការណ៍អំពីរឿងផ្ទាល់ខ្លួន ជុំវិញរឿងដែលលោកបានទទួលសញ្ញាតិកាណាដា»។

ក្រៅពីបទចោទនេះ លោក Bu Jianjie ក៏ទទួលរងការចោទប្រកាន់មួយចំនួនទៀត រួមមាន ការធ្វើជំនួញមិនត្រឹមត្រូវតាមច្បាប់, អំពើកេងបន្លំ និងស៊ីសំណូកជាដើម។ បើតាមការចុះផ្សាយរបស់សារព័ត៌មានហុងកុង South China Morning Post ស្ថាប័នឃ្លាំមើលវិន័យរបស់បក្សកុម្មុយនីសចិននេះ បានអះអាងថា លោក Bu ជាមនុស្សពោរពេញដោយភាពលោភលន់ និងបានធ្វើឲ្យបាត់បង់វិន័យទាំងអស់។

មែនទែនទៅ លោក Bu កាលពីឆ្នាំ២០០៦ បានចំណាយពេលក្នុងកាណាដា ក្នុងតួនាទីជាសាស្ត្រាចារ្យនៅសាកលវិទ្យាល័យ Western Ontario និងសាលកវិទ្យាល័យ Queen ។ យោងតាមរបាយការណ៍កាលពីឆ្នាំ២០០៦ នៅពេលលោកបានត្រឡប់ទៅកាន់ប្រទេសចិនវិញ លោកបានប្រាប់អាជ្ញាធរចិនថា លោកបានលះបង់ឱកាសរស់នៅក្នុងប្រទេសកាណាដា។

មេធាវីម្នាក់ដែលដឹងពីច្បាស់ពីច្បាប់សញ្ជាតិរបស់ចិន បានលើកឡើងថា សេចក្តីថ្លែងការណ៍របស់គណៈកម្មការកណ្តាលសម្រាប់ត្រួតពិនិត្យវិន័យចិន បានអះអាងថា លោក Bu មានបំណងទទួលយកសញ្ជាតិកាណាដា ស្របពេលដែលលោកកំពុងកាន់លិខិតឆ្លងដែនចិនរបស់លោក។ មេធាវីដែលសុំមិនបញ្ចេញឈ្មោះ ដោយលើកឡើងថា វាជារឿងរសើបនោះ បានបកស្រាយបែបនេះ៖ «ច្បាប់របស់ចិនអនុញ្ញាតឲ្យប្រជាជនមានសញ្ជាតិត្រឹមតែមួយប៉ុណ្ណោះ ហើយខ្ញុំគិតថា ចិននឹងមិនបណ្តោយឲ្យលោក Bu ទៅរស់នៅកាណាដានោះឡើយ»។

សូមបញ្ជាក់ថា ទំនាក់ទំនងរវាងក្រុងអូតាវ៉ា និងក្រុងប៉េកាំងមានភាពតានតឹងយ៉ាងខ្លាំង ចាប់តាំងពីដើមខែធ្នូមកម្ល៉េះ ពោលគឺនៅពេលដែលប្រធានហិរញ្ញវត្ថុរបស់ក្រុមហ៊ុន Huawei លោកស្រី Meng Wanzhou ត្រូវបានឃាត់ខ្លួននៅកាណាដា តាមការស្នើសុំរបស់សហរដ្ឋអាមេរិក។ គិតមកត្រឹមពេលនេះ ពលរដ្ឋកាណាដាចំនួនបីរូបហើយ ត្រូវបានរាយការណ៍ថា ត្រូវបានឃាត់ខ្លួនក្នុងប្រទេសចិន។ យ៉ាងណាមិញ គេពុំទាន់មានភស្តុតាងណាមួយ បង្ហាញថា ករណីរបស់លោក Bu ជាប់ពាក់ព័ន្ធនឹងវិវាទការទូតរវាងប្រទេសទាំងពីរនេះនៅឡើយទេ៕