ក្រោយបង្ខំឲ្យលាលែង លោក ត្រាំ រិះគន់លោក ម៉ាធីស

អន្តរជាតិ

ក្រោយបង្ខំឲ្យលាលែង លោក ត្រាំ រិះគន់លោក ម៉ាធីស

26, Dec 2018 , 8:39 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែធ្នូ បានរិះគន់រដ្ឋមន្ត្រីការពារជាតិដែលទើបប្រកាសលាលែង ជេម ម៉ាធីស និងទស្សនៈរបស់លោកចំពោះសម្ព័ន្ធមិត្តអាមេរិក។ លោក ត្រាំ ចោទប្រមុខការពារជាតិរូបនេះនេះថា មើលមិនឃើញការចំណាយពិតប្រាកដរបស់យោធាអាមេរិកនៅជុំវិញពិភពលោក ដែលត្រូវបានកេងចំណេញស្រស់ៗដោយសម្ព័ន្ធមិត្តអាមេរិកផ្ទាល់។ យ៉ាងណាមិញ ចាប់ពីពេលនេះ លោក ត្រាំ លែងឲ្យមានការកេងចំណេញបែបនេះទៀតហើយ។

ទំនងលាក់ក្នុងចិត្តយូរមកហើយនោះ លោក ដូណាល់ ត្រាំ បានវាយប្រហារលោក ជេម ម៉ាធីស ដែលសុំលាលែងពីតំណែងរដ្ឋមន្ត្រីការពារជាតិមិនទាន់បានមួយសប្ដាហ៍ផងនោះ។ លោក ត្រាំ មិនសប្បាយចិត្តនឹងប្រព័ន្ធផ្សព្វផ្សាយដែលផ្ដោតខ្លាំងលើការលាលែងពីតំណែងរបស់លោក ម៉ាធីស និងលិខិតសុំលាលែង ដែលបានបង្កប់អត្ថន័យរិះគន់លោកប្រធានាធិបតីជុំវិញបញ្ហានៅស៊ីរី និងការប្រកាន់ជំហរតឹងរ៉ឹងជាមួយសម្ព័ន្ធមិត្តអាមេរិក។

តាមសំណេរជាបន្តបន្ទាប់លើបណ្ដាញសង្គម Twitter លោក ត្រាំ បានរិះគន់លោក ម៉ាធីស ចំៗ ដែលជារឿងមិនធ្លាប់មានរវាងអ្នកទាំងពីរ។ លោកប្រធានាធិបតីអាមេរិកសរសេរថា អាមេរិកបានទទួលបន្ទុកការចំណាយរបស់យោធាប្រទេសអ្នកមានជាច្រើននៅជុំវិញពិភពលោក ហើយក្នុងពេលដំណាលគ្នានេះ ប្រទេសទាំងនោះបែរជាកេងចំណេញមួយទំហឹងពីអាមេរិក និងអ្នកបង់ពន្ធអាមេរិកលើវិស័យពាណិជ្ជកម្មទៅវិញ។

«ឧត្តមសេនីយ៍ ម៉ាធីស មិនបានឃើញរឿងនេះជាបញ្ហាឡើយ។ តែបញ្ហានេះកំពុងត្រូវបានដោះស្រាយ។» នេះជាការសរសរបន្ថែមរបស់លោក ត្រាំ នៅថ្ងៃទី២៤ ខែធ្នូ។ សំណេររបស់លោក ត្រាំ ជាការបើកកកាយឲ្យឃើញពីភាពមិនត្រូវគ្នារវាងលោក និងលោក ម៉ាធីស លើគោលនយោបាយអាមេរិកលើឆាកអន្តរជាតិ ដែលទំនងជាកប់ទុកច្រើនឆ្នាំមកនេះ។ ក្នុងលិខិតលាលែង លោក ម៉ាធីស បានអះអាងថា លោក ត្រាំ មានសិទ្ធិរើសរដ្ឋមន្ត្រីការពារជាតិដែលមានគំនិតស្របនឹងលោក។

ទោះត្រូវបង្ខំឲ្យចាកចេញពីតំណែងប្រមុខមន្ទីរបញ្ចកោណក្ដី លោក ម៉ាធីស បានចុះហត្ថលេខារួចហើយលើលិខិតដកទ័ពចេញស៊ីរីផ្លូវការតាមការចង់របស់លោក ត្រាំ ។ ការដកទ័ពនេះ ធ្វើឲ្យសម្ព័ន្ធមិត្តអាមេរិកមិនសប្បាយចិត្ត ឯអ្នកនយោបាយក្នុងស្រុកអាមេរិកខ្លះក៏បារម្ភថា លោក ត្រាំ កំពុងអនុវត្តនយោបាយដែលមិនងាយទស្សទាយ និងដើរតែឯងលើវិស័យសន្តិសុខពិភពលោក។

យ៉ាងណាមិញ លោក ត្រាំ បានទាត់ការព្រួយបារម្ភទាំងនេះ និងជាចាត់ទុករឿងខុសឆ្គងផងសម្រាប់អ្នកណាដែលគិតថា លោកមិនចូលចិត្តសម្ព័ន្ធមិត្តអាមេរិកនោះ។ មេដឹកនាំអាមេរិករូបនេះបកស្រាយថា អ្វីដែលមិនចូលចិត្តនោះ គឺប្រទេសខ្លះដែលជាមិត្តអាមេរិក បែរជាកេងចំណេញពីអាមេរិកទៅវិញ តែពេលនេះ អាមេរិកបានទទួលការគោរពម្ដងទៀតហើយ៕