អន្តរជាតិ
អ្នកនាំពាក្យក្រសួងការបរទេសចិន Hua Chunying នាសន្និសីទសារព័ត៌មានប្រចាំថ្ងៃទី២៤ ខែធ្នូ (រូបភាពពីវេបសាយក្រសួងការបរទេសចិន)
×![]()
ដោយ: តន ចាន់រិទ្ធារ៉ា
ក្រុងប៉េកាំង នៅថ្ងៃទី២៤ ខែធ្នូ បានទាត់ចោលការទាមទាររបស់អាមេរិក និងកាណាដាឲ្យដោះលែងជនជាតិកាណាដាចំនួន២នាក់ ដែលកំពុងជាប់ឃុំខ្លួនក្រោមបទចោទពាក់ព័ន្ធការធ្វើសកម្មភាពប៉ះពាល់សន្តិសុខចិន។ ការចាប់ខ្លួនជនជាតិកាណាដាទាំង២ នាក់ ធ្វើឡើងបន្ទាប់កាណាដាចាប់ខ្លួនមន្ត្រីក្រុមហ៊ុនបច្ចេកវិទ្យា Huawei តាមសំណើអាមេរិក ប៉ុន្តែត្រូវបានដោះលែងឲ្យនៅក្រៅឃុំបណ្ដោះអាសន្ន។ ជុំវិញការទាមទារឲ្យដោះលែងនេះ ចិនក៏រិះគន់លោកខាងលិចថា អនុវត្តស្តង់ដាពីរជាន់ទៀតផង។
ចិន មិនពេញចិត្ត និងប្រឆាំងដាច់ខាតចំពោះសេចក្ដីថ្លែងការណ៍របស់អាមេរិក និងកាណាដា។ នេះជាការលើកឡើងរបស់លោកស្រី Hua Chunying អ្នកនាំពាក្យក្រសួងការបរទេសចិននៅថ្ងៃទី២៤ ខែធ្នូ តបទៅនឹងការស្នើឲ្យដោះលែងជនជាតិកាណាដាពីរនាក់។ តាមពិតទៅ ជនជាតិកាណាដាដល់ទៅ៣នាក់ ត្រូវបានឃាត់ខ្លួន តែក្នុងនោះមានពីរនាក់រងការចោទប្រកាន់ធ្ងន់ធ្ងរទាក់ទងសន្តិសុខជាតិ ឯម្នាក់ទៀតនឹងត្រូវបញ្ជូនទៅកាណាដាវិញ។
ទោះជាមិនមានការនិយាយផ្លូវការក្ដី ការចាប់ខ្លួនជនជាតិកាណាដាទាំងនេះ ត្រូវបានមើលឃើញថា ជាការសងសឹករបស់ចិនចំពោះការឃាត់ខ្លួននាយកហិរញ្ញរបស់ក្រុមហ៊ុនចិន Huawei តែម្ដង។ ក្រោយៗមក កាណាដា និងអាមេរិកក៏ទទូចឲ្យចិនដោះលែងជនជាតិកាណាដាពីរនាក់ គឺលោក Michael Kovrig និងលោក Michael Spavor ។ ក្រៅពីប្រទេសទាំងពីរនេះ បារាំង អង់គ្លេស អាល្លឺម៉ង់ និងសហភាពអឺរ៉ុបក៏ចេញមុខបង្ហាញក្ដីបារម្ភដែរ។
ក្រសួងការបរទេសបារាំង បានស្នើឲ្យអាជ្ញាធរចិនធានាថា ជនជាតិកាណាដាទទួលបានការយកចិត្តទុកដាក់ ហើយសិទ្ធិការពារខ្លួនរបស់ពួកគេ នឹងត្រូវបានគោរព។ ឯសហភាពអឺរ៉ុបវិញយល់ថា ការចាប់ខ្លួនជនជាតិកាណាដានេះ បង្កជាការព្រួយបារម្ភចំពោះជនបរទេសដែលកំពុងស្រាវជ្រាវ និងរកស៊ីដោយស្របច្បាប់ក្នុងទឹកដីចិន។ ចំណែកស្ថាប័នផ្ដល់យោបល់ចំនួនប្រាំមួយ របស់អាល្លឺម៉ង់ចាត់ទុកសកម្មភាពរបស់ចិន ជាការនាំទៅការមិនទុកចិត្ត និងភាពមិនច្បាសលាស់។
ក្នុងសន្និសីទសារព័ត៌មានប្រចាំថ្ងៃ លោកស្រី Hua បានបដិសេធការព្រួយបារម្ភទាំងអម្បាលម៉ាននេះ។ អ្នកនាំពាក្យរូបនេះក៏រិះគន់ប្រទេសខាងលើដែលប្រើប្រាស់ស្តង់ដាសិទ្ធិមនុស្សផ្សេងគ្នាលើជនជាតិនៃប្រទេសដទៃ។ មន្ត្រីដដែលនេះបានចោទជាសំណួរថា៖ «តើសំណុំរឿងនេះមានអ្វីទាក់ទងនឹងអង់គ្លេស ឬសហភាពអឺរ៉ុប? តើប្រទេសទាំងនេះនៅឯណា ពេលកាណាដាចាប់ខ្លួនពាណិជ្ជករចិនដោយខុសច្បាប់ តាមសំណើអាមេរិក?»
ជុំវិញករណីជនជាតិកាណាដាដែលកំពុងជាប់ឃុំខ្លួនវិញ អ្នកនាំពាក្យខាងលើអះអាងថា ស្ថាប័នពាក់ព័ន្ធរបស់ចិនបានធានាពីសិទ្ធិស្របច្បាប់របស់ពួកគេតាមច្បាប់កំណត់ និងបានសម្រួលការងារដល់ភាគីកាណាដាឲ្យជួបជនសង្ស័យផង។ លើសពីនោះ លោកស្រី Hua ក៏ស្នើឲ្យប្រទេសនានាគោរពអធិបតេយ្យប្រព័ន្ធយុត្តិធម៌របស់ចិនទៀតផង៕
Tag:
ចិន
អាមេរិក
កាណាដា
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ម៉ោង
