អ្នកស្លាប់ដោយដោយសាររលកយក្សស៊ូណាមិកាលពីចុងសប្តាហ៍កន្លងទៅកើនឡើងដល់ជាង ៤០០នាក់ហើយគិតត្រឹមថ្ងៃអង្គារទី ២៥ ខែធ្នូ ហើយប្រជាជនរាប់ពាន់នាក់ផ្សេងទៀតកំពុងដង្ហោយរកជំនួយសង្គ្រោះបន្ទាន់។ ក្រុមការងារមនុស្សធម៌ និងក្រុមសង្គ្រោះបានព្រមានថា កង្វះខាតគ្រឿងបរិក្ខារ ស្បៀងអាហារ ទឹកស្អាត និងថ្នាំសង្កូវដោយសារជនរងគ្រោះច្រើនពេក។
នៅថ្ងៃអង្គារ ប្រជាជនឥណ្ឌូណេស៊ីរាប់ពាន់នាក់នៅកោះជ្វា និងកោះស៊ូម៉ាត្រា បន្តដង្ហោយរកជំនួយមនុស្សធម៌ ក្រោយរងការវាយប្រហារដោយសារគ្រោះមហន្តរាយរលកយក្សស៊ូណាមិកាលពីថ្ងៃសៅរ៍។ខាងអ្នកជំនាញបារម្ភខ្លាំងពីបញ្ហាសុខភាពប្រជាពលរដ្ឋ ដ្បិតអ្នកស្លាប់កើនឡើងដល់ ៤២៩ នាក់ទៅហើយ និងការបញ្ចុះសាកសពក៏ប្រឈមបញ្ហាទៀត។
ទីភ្នាក់ងារព័ត៌មាន AFP ផ្សាយថា ប្រតិបត្តិការរុករក និងសង្គ្រោះនៅតែបន្ត ព្រោះមកដល់ថ្ងៃអង្គារនេះមនុស្សបាត់ខ្លួនមានរហូតដល់ ១៥៤នាក់ឯណោះ។ អាជ្ញាធរប្រើប្រាស់សុនខដើម្បីហិតក្លិន និងរុករកអ្នកបាត់ខ្លួន និងសាកសពអ្នកស្លាប់ដែរ។ ប៉ុន្តែឥឡូវនេះ កង្វះស្បៀងនិងថ្នាំសង្កូវកំពុងក្លាយជាបញ្ហាធ្ងន់ធ្ងរ។
វេជ្ជបណ្ឌិត Rizal Alimin ដែលមកពីអង្គការសង្គមស៊ីវិល Aksi Cepat Tanggap បានប្រាប់អ្នកសារព័ត៌មានថា ក្មេងៗជាច្រើននាក់កំពុងធ្លាក់ខ្លួនឈឺដោយខ្លះគ្រុនក្តៅ និងខ្លះឈឺក្បាល ហើយពួកគេមិនមានទឹកស្អាតគ្រប់គ្រងសម្រាប់បរិភោគឡើយ។ ក្រៅពីទឹកស្អាត វេជ្ជបណ្ឌិតខាងលើអះអាងថា ស្បៀងអាហារ និងថ្នាំសង្កូវក៏មានស្តួចស្តើងទៀត ដែលវាធ្វើឲ្យជនរងគ្រោះដែលកំពុងត្រូវការជំនួយស្រាប់នោះត្រូវប្រឈមបញ្ហាកាន់តែច្រើន។
«យើងមានថ្នាំសង្កូវតិចតួចជាងធម្មតា។ វាមិនមែនជារឿងល្អឡើយសម្រាប់ប្រជាជនដែលត្រូវជម្លៀសពីទីកន្លែងរងគ្រោះ។ វាមិនមានទឹកស្អាតគ្រប់គ្រាន់ ហើយពួកគេត្រូវការចំណីអាហារ ខណៈដែលមនុស្សភាគច្រើនខ្វះកន្លែងសម្រាកនិងត្រូវដេកលើកម្រាលឥដ្ឋ»។នេះជាសម្តីរបស់វេជ្ជបណ្ឌិត Rizal Alimin។
ដោយឡែក អ្នកស្ម័គ្រចិត្តមនុស្សធម៌ម្នាក់មកពីស្ថាប័ន Tagana លោក Abu Salim បានមានប្រសាសន៍ថា ក្រុមការងារលោកផ្តោតសំខាន់លើការ ជួយប្រជាជនរងគ្រោះរកកន្លែងស្នាក់នៅ និងចែកចាយជំនួយជាពិសេសចំណីអាហារ។ ប៉ុន្តែ ក្រុមការងារមនុស្សធម៌នៅតែមិនអាចចែកជំនួយដល់ប្រជាជនខ្លះដែលបានរត់ភៀសខ្លួនទៅទីខ្ពស់ៗឆ្ងាយពេក បន្ទាប់ពីមានរលកយក្សស៊ូណាមិកើតឡើង។ បច្ចុប្បន្ន ជំនួយមនុស្សធម៌ភាគច្រើនត្រូវបានដឹកជញ្ជូនទៅតាមផ្លូវថ្នល់ ហើយរដ្ឋាភិបាលឥណ្ឌូណេស៊ីត្រឹមប្រើប្រាស់កាណូតធំៗពីរដើម្បីដឹកជំនួយទៅចែកចាយតាមបណ្តាកោះដែលរងគ្រោះប៉ុណ្ណោះ។
ក្រោយមានគ្រោះមហន្តរាយនេះដែរ ប្រជាពលរដ្ឋឥណ្ឌូណេស៊ីដែលបានជម្លៀសទៅកាន់ទីតាំងសុវត្ថិភាពនមិនហ៊ានត្រឡប់ទៅផ្ទះសម្បែងខ្លួនវិញឡើយ ដ្បិតបារម្ភខ្លាចរលកយក្សស៊ូណាមិកើតឡើងជាថ្មីទៀត។
សូមបញ្ជាក់ថា គ្រោះមហន្តរាយរលកយក្សស៊ូណាមិដ៏សាហាវដែលកើតឡើងកណ្តាលយប់ថ្ងៃសៅរ៍កើតឡើងបន្ទាប់ពីមានភ្នំភ្លើង Anak Krakatau ផ្ទុះ ហើយកោះស៊ូម៉ាត្រា និងកោះជ្វា ជាទីតាំងដែលរងគ្រោះខ្លាំងជាងគេ។ វាជាគ្រោះមហន្តរាយធ្ងន់ធ្ងរបំផុតមួយដែលកើតឡើងនៅឥណ្ឌូណេស៊ីរាប់ចាប់ពីខែកញ្ញា។ កាលពីខែកញ្ញា ប្រជាជនឥណ្ឌូណេស៊ីយ៉ាងហោចណាស់ ២០០០នាក់បានស្លាប់ដោយសារគ្រោះមហន្តរាយរញ្ជួយដីនៅក្រុង Palu នៃកោះស៊ូឡាវេស៊ី (Sulawesi)។ គ្រោះរញ្ជួយដីនេះក៏បានបង្កើតឲ្យមានរលកយក្សស៊ូណាមិទ្រង់ទ្រាយធំដែរ៕