អតីតសមាជិកគណៈរដ្ឋមន្ត្រីថៃ៖ លោកប្រាយុទ្ធ មិនសក្តិសមក្លាយជានាយករដ្ឋមន្ត្រីថ្មីឡើយ

អន្តរជាតិ

អតីតសមាជិកគណៈរដ្ឋមន្ត្រីថៃ៖ លោកប្រាយុទ្ធ មិនសក្តិសមក្លាយជានាយករដ្ឋមន្ត្រីថ្មីឡើយ

25, Dec 2018 , 5:11 pm

រូបភាព

រូបភាព៖ Business Times

ដោយ:

អតីតសមាជិកគណៈរដ្ឋមន្ត្រីរបស់រដ្ឋាភិបាលរបបសឹកថៃ បានចេញសេចក្តីថ្លែងការណ៍វាយប្រហារ និងរិះគន់លោកនាយករដ្ឋមន្ត្រី ប្រាយុទ្ធ ចន្ទ អូចា ពាក់ព័ន្ធនឹងបញ្ហាដឹកនាំប្រទេសកន្លងមក ថាជាការដឹកនាំបក្សពួកនិយម និងពុករលួយ។ អតីតសមាជិករូបនេះ ថែមទាំងបានអះអាងថា លោក ប្រាយុទ្ធ មិនសក្តិសមនឹងធ្វើជាប្រមុខរដ្ឋាភិបាលទៀតផង។

ថ្មីៗនេះ អតីតឧបនាយករដ្ឋមន្ត្រីថៃ លោក Pridiyathorn Devakula បានចេញផ្សាយអត្ថបទមួយអំពីជំហររបស់លោកទៅកាន់ប្រមុខរបបសឹកថៃបច្ចុប្បន្ន។ អត្ថបទរបស់លោក ត្រូវបានចេញផ្សាយសាធារណៈតាមរយៈគេហទំព័រក្នុងស្រុក ក្រោមចំណងជើងថា «ប្រាំបីហេតុផល លោក ប្រាយុទ្ធ ចន្ទ អូចា មិនសក្តិសមធ្វើជានាយករដ្ឋមន្ត្រី»។ នេះបើយោងតាមការចុះផ្សាយរបស់សារព័ត៌មាន The Nation នៅថ្ងៃ២៥ ធ្នូ។

តាមប្រភពព័ត៌មានដដែលនោះ ហេតុផលទាំងប្រាំបី ដែលអតីតសហការីរបស់លោកប្រាយុទ្ធ លើកឡើងនោះ រួមមានពាក់ព័ន្ធនឹងបញ្ហា កង្វះគោលការណ៍សារពើពន្ធ ជាពិសេសនោះលើការចំណាយលើវិស័យយោធា, ទំនាក់ទំនងស្អិតល្មួតជាមួយនឹងចិនលើសការកំណត់, ការលើកកម្ពស់យោធាឲ្យខ្ពស់ជាងជនស៊ីវិល, បក្សពួកនិយម, ពុករលួយ និងមិនសូវមានឆន្ទៈក្នុងការប្រព្រឹត្តរឿងត្រឹមត្រូវជាដើម។

តាមរយៈលិខិតចំហរផ្ទាល់ខ្លួនដដែលនោះ អតីតឧបនាយករដ្ឋមន្ត្រី ដែលធ្លាប់ទទួលបន្ទុកកិច្ចការសេដ្ឋកិច្ចរូបនេះ ក៏បានចោទលោកនាយករដ្ឋមន្ត្រី ប្រាយុទ្ធ ថា ជាអ្នកនៅពីក្រោយនៃការបង្កើតគណបក្ស Phalang Pracharat ដែលជាបក្សមានទំនោរទៅរករបបសឹក និងប្រើប្រាស់ថវិការដ្ឋដើម្បីទាក់ទាញទឹកចិត្តប្រជាជនក្នុងគោលដៅត្រួសត្រាយផ្លូវសម្រាប់ការបន្តកាន់អំណាចទៀត។

ការចោទប្រកាន់បែបនេះ ពិតប្រាកដណាស់ ថា ធ្វើឲ្យរដ្ឋាភិបាលសឹកថៃ នៅមិនសុខឡើយ។ តាមការអះអាងរបស់អ្នកនាំពាក្យរដ្ឋាភិបាលថៃ លោក Buddhipong Punnakanta លោកនាយករដ្ឋមន្ត្រី ប្រាយុទ្ធ បានច្រានចោទការប្រកាន់ទាំងអស់ពិសេសពាក់ព័ន្ធនឹងការបំពានអំណាចទ ហើយលោក ក៏មិនមានខ្លាចរអារទៅនឹងការចោទប្រកាន់អ្វីឡើយ ពោលគឺ លោក នៅតែមានឆន្ទៈបម្រើប្រជាជនដដែល។

បន្ថែមពីនេះ លោកឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ Prawit Wongsuwan បានចាត់ទុកលិខិតចំហរបស់អតីតសហការរីរបស់ខ្លួនថា គ្មានមូលដ្ឋានច្បាស់លាស់ និងជាលិខិតដែលមានកើតចេញពីកំហឹងនិងអារម្មណ៍ផ្ទាល់ខ្លួន និងមានការយល់ច្រលំពីកិច្ចការមួយចំនួនក្រោមការដឹកនាំរបស់លោកនាយករដ្ឋមន្ត្រី ប្រាយុទ្ធ ចន្ទ អូចា ។

គួរជម្រាបផងដែរថា រាជាណាចក្រថៃ ត្រូវបានដឹកនាំដោយរបបសឹក ដែលមានលោកឧត្តមសេនីយ៍ ប្រាយុទ្ធ ចន្ទ អូចា ជាប្រមុខ តាំងពីថ្ងៃទី២២ ឧសភា ឆ្នាំ២០១៤ មកម្ល៉េះ។ នៅថ្ងៃ២៤ កុម្ភៈ ឆ្នាំ២០១៩ខាងមុខដ៏ខ្លីនេះ ថៃ នឹងមានការបោះឆ្នោតសកលលើកដំបូងក្នុងរយៈពេលបួនឆ្នាំដើម្បីជ្រើសរើសមេដឹកនាំថ្មី។ ថ្មីៗនេះ លោកប្រាយុទ្ធ ក៏រងការចោទប្រកាន់ថា មានជាប់ពាក់ព័ន្ធនឹងការបែងចែកចំនួនអាសនៈតាមមណ្ឌលបោះឆ្នោតផងដែរ៕