តុលាការអាមេរិក បង្គាប់កូរ៉េខាងជើងឲ្យបង់ជំងឺចិត្ត៥០១លានដុល្លារដល់គ្រួសារនិស្សិត Warmbier

អន្តរជាតិ

តុលាការអាមេរិក បង្គាប់កូរ៉េខាងជើងឲ្យបង់ជំងឺចិត្ត៥០១លានដុល្លារដល់គ្រួសារនិស្សិត Warmbier

25, Dec 2018 , 6:19 pm

រូបភាព

ដោយ: តន ចាន់រិទ្ធារ៉ា

តុលាការអាមេរិក បានបញ្ជាឲ្យកូរ៉េខាងជើងបង់ប្រាក់ចំនួន៥០១លានដុល្លារដល់គ្រួសារនិស្សិត Otto Warmbier ដែលស្លាប់កាលពីឆ្នាំមុន។ ចៅក្រមតុលាការប្រចាំ District of Columbia សន្និដ្ឋាននៅថ្ងៃទី២៤ ខែធ្នូ ថា និស្សិតសាកលវិទ្យាល័យរូបនេះ ទំនងជារងគ្រោះដោយសារការធ្វើទារុណកម្ម។ យ៉ាងណាមិញ គេមិនរំពឹងថា កូរ៉េខាងជើងបង់លុយដ៏ច្រើននេះឡើយ ខណៈមានការលើកឡើងថា អាមេរិកអាចយករឿងនេះដើម្បីបង្ខំឲ្យព្យុងយ៉ាងចូលតុចរចាវិញ។

និស្សិត Otto Warmbier បានបាត់បង់ជីវិតបន្ទាប់ពីត្រូវបានកូរ៉េខាងជើងដោះលែងកាលពីឆ្នាំមុន។ ទៅដល់អាមេរិក យុវជនវ័យ២២ឆ្នាំរូបនេះ ស្ថិតក្នុងអាការៈសន្លប់ស្ដូកស្ដឹង មិនស្គាល់គ្រួសារឯង ហើយក៏ផុតដង្ហើមនៅប៉ុន្មានថ្ងៃបន្ទាប់មក។ ក្រុមគ្រួសាររបស់ Warmbier ក៏ប្ដឹងកូរ៉េខាងជើងទៅតុលាការអាមេរិកក្រោមច្បាប់ស្ដីពីអភ័យឯកសិទ្ធិរដ្ឋាភិបាលបរទេស ដែលបើកសិទ្ធិឲ្យជនជាតិអាមេរិកប្ដឹងរដ្ឋាភិបាលបរទេស ដែលមិនត្រូវបានការពារដោយអភ័យឯកសិទ្ធិការទូត។

ទីភ្នាក់ងារព័ត៌មាន AFP ផ្សាយថា ប្រធានចៅក្រមនៃតុលាការប្រចាំរដ្ឋធានី Washinton DC លោកស្រី Beryl Howell បានកាត់ក្ដីឲ្យកូរ៉េខាងជើងចាញ់ និងបញ្ជាឲ្យបង់ប្រាក់ចំនួន ៥០១,១៣៤,៦៨៣ ដុល្លារដល់គ្រួសារជនរងគ្រោះ។ ក្នុងសាលក្រមថ្ងៃទី២៤ ខែធ្នូ លោកស្រី Howell សរសេរថា កូរ៉េខាងជើងត្រូវទទួលខុសត្រុវចំពោះការធ្វើទារុណកម្ម ការចាប់ខ្លួន និងការសម្លាប់ក្រៅប្រព័ន្ធច្បាប់លើនិស្សិត Warmbier ។

លោកស្រីចៅក្រមរូបនេះបន្ថែមថា កូរ៉េខាងជើងមិនបានដាក់ភស្តុតាងដើម្បីការពារខ្លួនឡើយអំឡុងពេលសវនាការនេះ។ ជុំវិញការសងលុយជំងឺចិត្ត គេក៏មិនរំពឹងថា កូរ៉េខាងជើងនឹងអនុវត្តតាមសាលក្រមនេះដែរ។ ជារដ្ឋដ៏ឯកោមួយបំផុតមួយលើពិភពលោក កូរ៉េខាងជើងក៏ទំនងជាមិនមានទ្រព្យសម្បត្តិច្រើននៅអាមេរិក ដែលអាចរឹបអូសជាសំណងបានដែរ។

Warmbier ត្រឡប់ទៅកាន់អាមេរិកវិញ បន្ទាប់ពីត្រូវបានកូរ៉េខាងជើងចាប់ឃុំខ្លួនអស់១៧ខែ។ រូបគេត្រូវបានចាប់ខ្លួនដោយរងការចោទថា ធ្វើសកម្មភាពប្រឆាំងរដ្ឋតាមរយៈការលួចយកខិត្តបណ្ណពីសណ្ឋាគារក្នុងទីក្រុងព្យុងយ៉ាង។ អាការៈរបស់យុវជនរូបនេះស្ថិតក្នុងភាពធ្ងន់ធ្ងរ គឺភ្នែករបស់គេហើមត្រចៀកក៏ថ្លង់ ហើយធ្មេញវៀច។ គ្រូពេទ្យដែលបានពិនិត្យសុខភាព Warmbier អះអាងថា លលាដ៏ក្បាលរបស់គេមានបញ្ហាកង្វះឈាមហូរទៅខួរក្បាល។

តាមពិតទៅ ការកាត់ក្ដីឲ្យកូរ៉េខាងជើងបង់ប្រាក់សន្ធឹកសន្ធាប់បែបនេះ គឺអាមេរិកដឹងមុនហើយថា គ្មានថ្ងៃកូរ៉េខាងជើងធ្វើតាមឡើយ។ ប៉ុន្តែវាអាចយុទ្ធសាស្ត្រមួយរបស់ក្រុងវ៉ាស៊ីនតោនការបង្ខំឲ្យក្រុងព្យុងយ៉ាងត្រឡប់ចូលតុចរចាវិញ។ ការប្រឹងប្រែងផ្នែកការទូតកំពុងធ្វើឡើងយ៉ាងខ្លាំងពីសំណាក់រដ្ឋបាលប្រធានាធិបតី ដូណាល់ ត្រាំ ដែលចង់បានជំនួបទីពីរ ជាមួយមេដឹកនាំកូរ៉េខាងជើង គីម ជុងអ៊ុន នៅដើមឆ្នាំក្រោយ៕