ចិន ពន្លឿនការបង្កើតច្បាប់ការពារកម្មសិទ្ធិបញ្ញានិងទប់ស្កាត់ចោរកម្មបច្ចេកវិទ្យាផ្គាប់ចិត្តអាមេរិក

អន្តរជាតិ

ចិន ពន្លឿនការបង្កើតច្បាប់ការពារកម្មសិទ្ធិបញ្ញានិងទប់ស្កាត់ចោរកម្មបច្ចេកវិទ្យាផ្គាប់ចិត្តអាមេរិក

26, Dec 2018 , 10:36 am

រូបភាព

ដោយ:

ក្រុងប៉េកាំង កំពុងពន្លឿនដំណើរការនីតិកម្ម ដើម្បីពិនិត្យសេចក្តីព្រាងច្បាប់ថ្មីមួយមានគោលដៅការពារកម្មសិទ្ធិបញ្ញា និងលើកទឹកចិត្តដល់ការផ្ទេរបច្ចេកវិទ្យាដោយស្ម័គ្រចិត្ត។ ច្បាប់នេះហាមដាច់ខាតលើអំពើចោរកម្មបច្ចេកវិទ្យា។ ចំណាត់ការនេះទំនងធ្វើឡើងដើម្បីឆ្លើយតបការទាមទាររបស់ក្រុងវ៉ាស៊ីនតោន ខណៈប្រទេសទាំងពីរកំពុងព្យាយាមបញ្ចប់សង្គ្រាមពាណិជ្ជកម្ម។

សេចក្តីព្រាងច្បាប់ស្តីពីការវិនិយោគបរទេស ត្រូវបានបញ្ជូនទៅកាន់គណៈកម្មាធិការអចិន្ត្រៃយ៍នៃសភាប្រជាជនចិន កាលពីថ្ងៃអាទិត្យ ទី២៣ខែធ្នូ ដើម្បីត្រួតពិនិត្យជាលើកដំបូង។ យោងតាមការចុះផ្សាយរបស់ទីភ្នាក់ងារព័ត៌មាន Xinhua សេចក្តីព្រាងច្បាប់ថ្មីនេះ ចែងថា គោលនយោបាយគាំទ្ររបស់រដ្ឋាភិបាលទាំងអស់ ក៏នឹងអនុវត្តលើបណ្តាក្រុមហ៊ុនបរទេសផងដែរ។

នេះមានន័យថា បណ្តាក្រុមហ៊ុនបរទេស នឹងទទួលបានឱកាសស្មើគ្នាដូចក្រុមហ៊ុនក្នុងស្រុកចិនដែរ ដើម្បីចូលប្រកួតប្រជែងក្នុងទីផ្សារចិនដោយស្មើភាពរាប់ទាំងលទ្ធកម្មសាធារណៈរបស់រដ្ឋាភិបាលចិនជាដើម។ គេកត់សម្គាល់ថា សេចក្តីព្រាងច្បាប់ថ្មីនេះ ជាការវិវត្តដ៏ប្រសើរមួយ បើធៀបទៅនឹងសេចក្តីព្រាងច្បាប់លើកមុន ដែលត្រូវបានចេញផ្សាយ ដោយក្រសួងពាណិជ្ជកម្មចិន កាលពីខែមករាឆ្នាំ២០១៥កន្លងទៅ។ ប៉ុន្តែវាពុំត្រូវបានអនុម័តឡើយ គិតមកដល់ពេលនេះ។

ទោះបីជារដ្ឋាភិបាលចិននឹងនៅតែមានសិទ្ធិដកហូតទ្រព្យសម្បត្តិរបស់ក្រុមហ៊ុនបរទេសតាមច្បាប់ក្រោមកាលៈទេសៈពិសេសក៏ដោយក្តី សេចក្តីព្រាងច្បាប់ថ្មីនេះតម្រូវឲ្យដំណើរនៃការដកហូតនេះត្រូវតែធ្វើតាមច្បាប់ ព្រមទាំងរាប់បញ្ចូលសំណងដែលអាចទទួលយកបាន និងយុត្តិធម៌ផងដែរ។

អ្វីដែលពិសេសនោះ ជំពូកមួយស្តីពីកិច្ចការពារកម្មសិទ្ធិបញ្ញា ត្រូវបានដាក់បញ្ចូលបន្ថែមទៅក្នុងសេចក្តីព្រាងច្បាប់ថ្មីនេះ ដែលជាបញ្ហារសើបនៅក្នុងសង្គ្រាមពាណិជ្ជកម្មរវាងអាមេរិកនិងចិន។ បើតាមសារព័ត៌មានដដែល ក្នុងសេចក្តីព្រាងច្បាប់ថ្មីនេះ ចិននឹងជំរុញឲ្យមានកិច្ចសហប្រតិបត្តិការផ្នែកបច្ចេកវិទ្យា ដោយផ្អែកលើ លក្ខខណ្ឌដែលយល់ព្រមដោយស្ម័គ្រចិត្ត។ លក្ខខណ្ឌទាំងនេះ គួរតែត្រូវបានចរចា ដោយក្រុមអ្នកវិនិយោគិនបរទេស ហើយវិធានការរដ្ឋបាលដែលបង្ខំឲ្យមានការផ្ទេរបច្ចេកវិទ្យាត្រូវតែហាមឃាត់។

សហរដ្ឋអាមេរិក តែងតែរិះគន់រដ្ឋាភិបាលចិន ចំពោះបញ្ហាមួយចំនួន រួមមាន កង្វះខាតនៃការបើកចំហទីផ្សារចិន, ការលម្អៀងរបស់រដ្ឋាភិបាលទៅលើក្រុមហ៊ុនក្នុងស្រុក និងភាពខ្វះខាតនៃកិច្ចការពារកម្មសិទ្ធិបញ្ញាជាដើម។ បញ្ហាទាំងនេះហើយ ជាបញ្ហាស្នូលនៃជម្លោះពាណិជ្ជកម្ម ដែលកំពុងឆាបឆេះ៕