កីឡាជាតិ
ជាតិ
ស្ថានភាពផ្លូវបត់បែនលើភ្នំប្រសិទ្ធិ៍ ធ្វើឲ្យការប្រកួតកង់ភ្នំថ្នាក់ជាតិកាន់តែស្វិតស្វាញខ្លាំង
× ការប្រកួតកីឡាប្រណាំងកង់ជ្រើសរើសជើងឯកថ្នាក់ជាតិលើវិញ្ញាសាកង់ភ្នំបានបញ្ចប់យ៉ាងជោគជ័យ កាលពីថ្ងៃទី២៩ ខែធ្នូ ឆ្នាំ២០១៨ ដោយនៅឆ្នាំនេះមានអត្តពលិកជាង៥០នាក់ចូលរួម។ មិនត្រឹមតែប៉ុណ្ណោះព្រឹត្តិការណ៍នេះ ទទួលបានការវាយតម្លៃខ្ពស់ពីថ្នាក់ដឹកនាំលើបច្ចេកទេសរៀបចំ និងសមត្ថភាពរបស់កីឡាករទៀតផង។
ស្ថានភាពផ្លូវបត់បែនឡើងចុះរួមជាមួយឧបសគ្គលើភ្នំប្រសិទ្ធិ៍ ធ្វើឲ្យការប្រកួតប្រណាំងកង់ជ្រើសរើសជើងឯកថ្នាក់ជាតិឆ្នាំ២០១៨ ទទួលបានការទាក់ទាញកាន់តែខ្លាំងពីសំណាក់កីឡាករនិងអ្នកគាំទ្រ។ លើសពីនេះ ធ្វើឲ្យការប្រកួតមានការប្រកួតប្រជែងខ្លាំង និងស្វិតស្វាញជាងមុន។ មានភាពស្វិតស្វាញ ក៏ព្រោះតែសមត្ថភាព ក៏ដូចជាបច្ចេកទេសរបស់កីឡាករមានការកើនឡើង។
កត្តានេះ ធ្វើឲ្យព្រឹត្តិការណ៍នេះ ទទួលបានការវាយតម្លៃខ្ពស់ពីថ្នាក់ដឹកនាំសហព័ន្ធកីឡាទោចក្រយានបានវាយតម្លៃខ្ពស់។ លោកឧកញ៉ា វង្ស ខាន់ពៅ អគ្គលេខាធិការសហព័ន្ធបានលើកឡើងថា៖«ការប្រកួតជើងឯកថ្នាក់ជាតិលើវិញ្ញាសាកង់ភ្នំរបស់យើងបានបញ្ចប់ដោយជោគជ័យ និងប្រព្រឹត្តទៅយ៉ាងរលូន។ ខ្ញុំសង្កេតឃើញថា កីឡាករកីឡាការិនីពិសេសយុវជន មានសមត្ថភាព និងបច្ចេកទេសរីកចម្រើនគួរឲ្យកត់សម្គាល់ ដែលធ្វើឲ្យការប្រកួតមានភាពប្រកួតប្រជែង និងតានតឹងជាងមុន»។
អគ្គលេខាធិការរូបនេះបន្ថែមថា៖«បើធៀបនឹងការប្រកួតកន្លងមក ឆ្នាំនេះមានបច្ចេកទេសកើនឡើងខ្លាំង ពិសេសការប្រកួតរវាងក្រុមជំនាញ ដោយសារផ្លូវប្រកួតលំបាកខ្លាំងមែនទែន គឺត្រូវជិះកង់ឡើងចុះភ្នំ កាត់ព្រៃ និងថ្មតូចជាច្រើន បើអ្នកអត់មានបច្ចេកទេសខ្ពស់ គឺមិនអាចជិះបាននោះទេ។ ក្មេងៗជាអត្តពលិកមានការខិតខំហ្វឹកហាត់ខ្លាំង ធ្វើឲ្យការប្រកួតប្រជែងមានលក្ខណៈប្លែកនិងអស្ចារ្យជាងមុន»។
ក្រោយឆ្លងកាត់ការប្រកួតដ៏ស្វិតស្វាញពេញមួយព្រឹកកាលពីថ្ងៃទី២៩ ខែធ្នូ ឆ្នាំ២០១៨ កីឡាករជម្រើសជាតិ យឿន ភីយុទ្ធ បានគ្រងជើងឯកលើវិញ្ញាសាជំនាញក្រោយប្រើពេល៥៨នាទី៥៦វិនាទី រីឯលេខ២បានទៅ សាំង សីហា ជាមួយ៥៩នាទី៧វិនាទី និងលេខ៣បានទៅ ហួត លយរស្មី ក្រោយប្រើពេល១ម៉ោង១នាទី៧វិនាទី។
ចំណែកវិញ្ញាសាកង់ភ្នំកម្រិតយុវជន កីឡាករ វ៉ុន សាវីន មកពីក្លិប Flying Bike ទទួលបានចំណាត់ថ្នាក់លេខ១ក្រោយប្រើពេល៥៣នាទី៥៨វិនាទី រីឯកីឡាករ សាន ណាម៉ា បានលេខ២ក្រោយប្រើពេល៥៦នាទី៥វិនាទី និងលេខ៣បានទៅកីឡាករ ប៊ុន សេងប៉ាវ ជាមួយពេលវេលា៥៧នាទី៥៤វិនាទី។ ចំណែកផ្នែកនារី ជើងឯកបានទៅកីឡាការិនីថ្នាលជម្រើសជាតិ យឹម ចាន់លាង, លេខ២ វង្ស ស៊ូខេង និងលេខ៣ ហ៊ុល សុគន្ធា៕
Tag:
ប្រណាំងកង់
វង្ស ខាន់ពៅ
ជើងឯកថ្នាក់ជាតិ
ភ្នំប្រសិទ្ធិ៍
© រក្សាសិទ្ធិដោយ thmeythmey.com