អន្តរជាតិ
រុស្ស៊ីនឹងបញ្ជូនប្រព័ន្ធការពារអាកាស S-400 ឲ្យឥណ្ឌានៅឆ្នាំ២០២០
× ក្រុងញូវដេលី នឹងចាប់ផ្តើមទទួលបានប្រព័ន្ធការពារអាកាស S-400 ដែលទិញពីរុស្ស៊ី ជាលើកដំបូងនាខែតុលា ឆ្នាំ២០២០។ យោងតាមមន្ត្រីការពារជាតិជាន់ខ្ពស់របស់រដ្ឋាភិបាលឥណ្ឌា ការបញ្ជូនប្រព័ន្ធការពារអាកាសទាំងអស់៥គ្រឿងពីរុស្ស៊ី ត្រូវរំពឹងថា នឹងត្រូវបញ្ចប់រួចរាល់ត្រឹមខែមេសា ឆ្នាំ២០២៣។
ថ្លែងបញ្ជាក់នៅឯសភាជាន់ទាបឥណ្ឌា ដើម្បីឆ្លើយតបទៅនឹងសំណួរទាក់ទងនឹងកិច្ចសន្យាទិញសព្វាវុធតម្លៃជាង៥ពាន់លានដុល្លារជាមួយរុស្ស៊ី លោក Subhash Bhamre អនុរដ្ឋមន្ត្រីការពារជាតិឥណ្ឌា បានលើកឡើងថា៖ «ការបញ្ជូននឹងចាប់ផ្តើមពីខែតុលា ឆ្នាំ២០២០ ហើយនិងត្រូវបញ្ចប់ត្រឹមខែមេសា ឆ្នាំ២០២៣»។
ទន្ទឹមនឹងនេះ លោក Bhamre បានសង្កត់ធ្ងន់ថា ឥណ្ឌានឹងមិនបញ្ឈប់គម្រោងបញ្ជាទិញប្រព័ន្ធខែលមីស៊ីលពីរុស្ស៊ីឡើយ ទោះបីរងការគំរាមដាក់ទណ្ឌកម្មពីសហរដ្ឋអាមេរិកក៏ដោយក្តី។ យោងតាមសារព័ត៌មានរុស្ស៊ី Sputnik លោកបានគូសបញ្ជាក់បែបនេះថា រដ្ឋាភិបាលឥណ្ឌាឈ្វេងយល់ពីការវិវត្តទាំងអស់ ដែលអាចប៉ះពាល់ដល់ការបញ្ជាទិញប្រព័ន្ធការពារអាកាស S-400។ ហើយការសម្រេចចិត្តរបស់រដ្ឋាភិបាលនេះគឺធ្វើឡើងដើម្បីពង្រឹងសមត្ថភាពកងទ័ពឥណ្ឌា ក្នុងគោលដៅទប់ទល់នឹងបញ្ហាប្រឈមផ្នែកសន្តិសុខនានា ដែលអាចកើតមានឡើង។
ការលើកឡើងរបស់អនុរដ្ឋមន្ត្រីការពារជាតិរូបនេះបានធ្វើឡើង ក្រោយពីដើមខែតុលាកន្លងទៅ ក្រុងមូស្គូ និងក្រុងញូវដេលី បានបញ្ចប់កិច្ចព្រមព្រៀងស្តីពីការបញ្ជូនប្រព័ន្ធការពារអាកាស S-400 របស់រុស្ស៊ី ដែលមានទំហំទឹកប្រាក់ជាង៥ពាន់លានដុល្លារ។ កិច្ចព្រមព្រៀងនេះ ត្រូវបានចុះហត្ថលេខា អំឡុងទស្សនកិច្ចរយៈពេល២ថ្ងៃរបស់ប្រធានាធិបតីរុស្ស៊ី វ្ល៉ាឌីមៀ ពូទីន ទៅកាន់ឥណ្ឌា ។
កាលពីឆ្នាំ២០១៧ សហរដ្ឋអាមេរិក បានអនុម័តច្បាប់ប្រឆាំងសត្រូវអាមេរិកតាមរយៈការដាក់ទណ្ឌកម្ម (CAATSA) ដើម្បីដាក់ទណ្ឌកម្មប្រឆាំងនឹងរុស្ស៊ី ដោយសារតែវិមានក្រេមឡាំងបានលេបត្របាក់តំបន់គ្រីមៀ ពីអ៊ុយក្រែនក្នុងឆ្នាំ២០១៤ និងបានលូកលាន់ការបោះឆ្នោតអាមេរិក កាលពីឆ្នាំ២០១៦ផង។
ក្រោមច្បាប់នេះ បណ្ដាប្រទេសណាដែលមានទំនាក់ទំនងក្នុងវិស័យការពារជាតិ និងចែករំលែកព័ត៌មានចារកម្មជាមួយរុស្ស៊ី អាចនឹងទទួលរងទណ្ឌកម្មនេះផងដែរ។ ជាក់ស្តែងរដ្ឋបាលអាមេរិកកាលពីចុងខែកញ្ញា បានសម្រេចប្រើប្រាស់ច្បាប់ CAATSA ដើម្បីដាក់ទណ្ឌកម្មលើយោធាចិន ដែលបានទិញមីស៊ីល និងនាវាចម្បាំងពីរុស្ស៊ី។
គួរបញ្ជាក់ផងដែរថា S-400 ជាប្រព័ន្ធមីស៊ីលជំនាន់ចុងក្រោយបង្អស់របស់រុស្ស៊ី ដែលអាចពាំក្បាលគ្រាប់ចំនួនបីប្រភេទ និងមានសមត្ថភាពបាញ់ទម្លាក់គោលដៅ រួមមាន មីស៊ីលបាលីស្ទិក, យន្តហោះចម្បាំង និងដ្រូន ក្នុងរយៈចម្ងាយ ៦០០គីឡូម៉ែត្រ និងរយៈពេលកម្ពស់ចន្លោះពី ១០គីឡូម៉ែត្រ ទៅ២៧គីឡូម៉ែត្រ៕
Tag:
ឥណ្ឌា
ប្រព័ន្ធការពារអាកាសS-400
រុស្ស៊ី
© រក្សាសិទ្ធិដោយ thmeythmey.com